រាជធានីភ្នំពេញ ៖ មន្ត្រីជាន់ខ្ពស់ក្រសួងសាធារណការ និងដឹកជញ្ជូនបានថ្លែងថា ការធ្វើដំណើរតាមកាណូតចេញពីតំបន់ភាគខាងជើងក្រុងភ្នំពេញទៅកាន់ក្រុងតាខ្មៅ ខេត្តកណ្តាល នឹងចាប់ផ្តើមមុនពិធីបុណ្យចូលឆ្នាំខ្មែរខាងមុខនេះ ។ លោក វ៉ា…
រាជធានីភ្នំពេញ ៖ មន្ត្រីជាន់ខ្ពស់ក្រសួងសាធារណការ និងដឹកជញ្ជូនបានថ្លែងថា ការធ្វើដំណើរតាមកាណូតចេញពីតំបន់ភាគខាងជើងក្រុងភ្នំពេញទៅកាន់ក្រុងតាខ្មៅ ខេត្តកណ្តាល នឹងចាប់ផ្តើមមុនពិធីបុណ្យចូលឆ្នាំខ្មែរខាងមុខនេះ ។
លោក វ៉ា ស៊ីមសូរិយា អ្នកនាំពាក្យក្រសួងខាងលើនេះបានថ្លែងឲ្យដឹងតាមទូរស័ព្ទនាព្រឹកថ្ងៃទី២៥ ធ្នូ ថា បច្ចុប្បន្ន នាយកដ្ឋានជំនាញនានាកំពុងរៀបចំផែនការនេះ ព្រោះតាមអ្វីដែលលោកទេសរដ្ឋមន្ត្រីចង់បាន គឺធ្វើយ៉ាងណា ឲ្យការដឹកជញ្ជូនតាមផ្លូវទឹកដំណើរការបាន មុនពិធីបុណ្យចូលឆ្នាំប្រពៃណីជាតិខ្មែរខាងមុខនេះ។ លោកបន្តថា នាយកដ្ឋានជំនាញកំពុងសិក្សាពីការធ្វើកាណូតដឹកជញ្ជូននៅក្នុងស្រុក ជាជាងទិញកាណូតនាំចូលពីប្រទេសជិតខាង ព្រោះវាមានភាពស្មុគស្មាញច្រើនលើបែបបទ និងនីតិវិធីនានា ។
លោកបន្តថា តាមគម្រោង ក្រសួងរៀបចំកំពង់ផែចំនួន១៨ទីតាំង ដោយចេញពីតំបន់ព្រែកព្នៅ មកកាន់ក្រុងតាខ្មៅ ប៉ុន្តែជំហានដំបូង ធ្វើតែ២ទៅ៣កំពង់ផែសិន ដើម្បីដំណើរការសាកល្បង ។
ទោះជាយ៉ាងណា លោក វ៉ា ស៊ីមសូរិយា មិនបានបញ្ជាក់ឲ្យដឹងពីទំហំថវិកាត្រូវចំណាយសម្រាប់វិនិយោគក្នុងគម្រោងនេះទេ ។
លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានថ្លែងឲ្យដឹងកាលពីពេលថ្មីៗនេះថា ក្រសួងមានកញ្ចប់ថវិកាមួយចំនួនរួចហើយ ដើម្បីរៀបចំកំពង់ផែតូចៗ ធ្វើជាចំណតមធ្យោបាយដឹកជញ្ជូនតាមផ្លូវទឹក ចេញពីតំបន់ព្រែកព្នៅ ឆ្ពោះទៅក្រុងតាខ្មៅ ខេត្តកណ្តាល ។ លោកបន្តថា ការធ្វើដំណើរតាមផ្លូវទឹកនឹងជួយកាត់បន្ថយការចំណាយ និងការកកស្ទះចរាចរណ៍ ព្រោះវាជាមធ្យោបាយធ្វើដំណើរមួយទៀត ដែលក្រសួងកំពុងគិតគូរ ។
លោកបណ្ឌិត វ៉ាន់ វ៉ាត អ្នកឯកទេសផ្នែកនគរូបនីយកម្ម បានថ្លែងថា បច្ចុប្បន្ន យើងមានកាណូតដឹកជញ្ជូនតាមផ្លូវទឹកហើយ ប៉ុន្តែភាគច្រើនជាការដឹកជញ្ជូនភ្ញៀវទេសចរកម្សាន្ត ប៉ុន្តែនេះជាគម្រោងដឹកជញ្ជូនធម្មតា ដែលវាជាការផ្តល់ជម្រើសធ្វើដំណើរផ្សេងទៀតដល់អ្នកធ្វើដំណើរទៅកាន់គោលដៅទាំងនោះ ។
លោកបន្តថា ៖« ទោះជាយ៉ាងណា ការដឹកជញ្ជូនតាមផ្លូវទឹក មានបញ្ហាប្រឈមច្រើនជាងផ្លូវគោក ។ ហេតុនេះ ការរៀបចំកំពង់ផែឲ្យបានល្អ និងគិតគូរពីសុវត្ថិភាពមានសារសំខាន់ណាស់ ដើម្បីបញ្ចៀសហានិភ័យនានា » ៕
ចែករំលែកព័តមាននេះ