ខេត្តក្រចេះ ៖ បើទោះបីជាមានការអះអាងថា សកម្មភាពការស្រាវជ្រាវរុករកនូវគ្រាប់យុទ្ធភណ្ឌមិនទាន់ផ្ទុះ គឺនៅតែមានសន្ទុះនៃការធ្វើឡើងជាប់ជាប្រចាំ ហើយលទ្ធផលនៃការការស្រាវជ្រាវក៏នៅមានតួរលេខកើនឡើង ដែលអាជ្ញាធរថាបានកាត់បន្ថយនូវអត្រាគ្រោះថ្នាក់យ៉ាងណាក្តី ។ តែពលរដ្ឋនៅតែមានការព្រួយបារម្ភលើករណីការផ្ទុះគ្រាប់យុទ្ធភណ្ឌមិនទាន់ផ្ទុះ ខណៈដែលកន្លងការផ្ទុះគ្រាប់យុទ្ធភណ្ឌ…
ខេត្តក្រចេះ ៖ បើទោះបីជាមានការអះអាងថា សកម្មភាពការស្រាវជ្រាវរុករកនូវគ្រាប់យុទ្ធភណ្ឌមិនទាន់ផ្ទុះ គឺនៅតែមានសន្ទុះនៃការធ្វើឡើងជាប់ជាប្រចាំ ហើយលទ្ធផលនៃការការស្រាវជ្រាវក៏នៅមានតួរលេខកើនឡើង ដែលអាជ្ញាធរថាបានកាត់បន្ថយនូវអត្រាគ្រោះថ្នាក់យ៉ាងណាក្តី ។ តែពលរដ្ឋនៅតែមានការព្រួយបារម្ភលើករណីការផ្ទុះគ្រាប់យុទ្ធភណ្ឌមិនទាន់ផ្ទុះ ខណៈដែលកន្លងការផ្ទុះគ្រាប់យុទ្ធភណ្ឌ បានបង្កឲ្យពលរដ្ឋជាច្រើននាក់បានរងរបួស ។
តាមរបាយការណ៍របស់អាជ្ញាធរខេត្តបានឲ្យដឹងថានៅឆ្នាំ២០១៧ នេះមានគ្រាប់យុទ្ធភណ្ឌមិនទាន់ផ្ទុះប្រភេទចម្រុះ យ៉ាងហោចចំនួន៣០គ្រាប់ ត្រូវបានស្រាវជ្រាវរុករកឃើញនៅតាមតំបន់នានាក្នុងខេត្ត និងចាត់ប្រគល់ឲ្យមន្ត្រីជំនាញស៊ីម៉ាក់ (CMAC) ដើម្បីកម្ទេចចោលតាមលក្ខណៈបច្ចេកទេស ។
ស្រុកស្នួលជាស្រុកមួយនៅតំបន់ភាគខាងកើតនៃខេត្តក្រចេះ ។ ស្រុកមួយនេះជាស្រុកដែលប្រឈមនឹងសង្គ្រាមយ៉ាងក្តៅនាទសវត្សរ៍៧០ ។ ទន្ទឹមគ្នានេះ គ្រាប់យុទ្ធភណ្ឌមិនទាន់ផ្ទុះដែលនៅសេសសល់ពីសង្គ្រាមសម័យ លោក លន់ ណុល សម័យសង្គ្រាមខ្មែរក្រហម និងសម័យរដ្ឋកម្ពុជា គឺនៅតែមានសេសសល់កប់ក្នុងដីដល់បច្ចុប្បន្ននេះ ។ ជាមួយនឹងកាកសំណល់ក្បាលគ្រាប់ដែលនៅសេសសល់ ហើយក៏មិនទាន់ត្រូវបានរុករកឃើញនៅឡើយដែរ ប្រភេទគ្រាប់ទាំងនោះក៏ធ្លាប់បានបង្កការផ្ទុះជាយថាហេតុ បណ្ដាលឲ្យមានពលរដ្ឋជាច្រើននាក់បានរងរបួសធ្ងន់ស្រាលជាបន្តបន្ទាប់ ។
ក្នុងរបាយការណ៍បានបង្ហាញថា មានគ្រាប់យុទ្ធភណ្ឌមិនទាន់ផ្ទុះរហូតដល់ទៅ២៣គ្រាប់ ត្រូវបានកម្លាំងនគរបាលស្រុកស្នួល ស្រាវជ្រាវរកឃើញនៅក្នុងភូមិសាស្ត្រនានាក្នុងស្រុកស្នួល និងប្រគល់ឲ្យទៅមន្ត្រីជំនាញស៊ីម៉ាក់ ។ របាយការណ៍របស់នគរបាលស្រុកស្នួល បានបង្ហាញថា គ្រាប់យុទ្ធភណ្ឌដែលបានរកឃើញទាំងនោះ ជាប្រភេទគ្រាប់អ៊ឹម៧៩ គ្រាប់៨០ គ្រាប់៨១ ក្បាលគ្រាប់៦០ និងក្បាលគ្រាប់៨២ក្បាល គ្រាប់១០៥ និងក្បាលគ្រាប់១៥២ គ្រាប់១២០ គ្រាប់បេ៤០ គ្រាប់បែកដៃ ។
ប្រធានក្រុមកម្ទេចគ្រាប់យុទ្ធភណ្ធមិនទាន់ផ្ទុះប្រចាំនៅស្រុកស្នួល លោក ស៊ីវ វេង បានឲ្យដឹងនៅថ្ងៃទី២៥ ខែធ្នូ ឆ្នាំ២០១៧ នេះថា គ្រាប់យុទ្ធភណ្ឌដែលបានរុករកឃើញនៅក្នុងស្រុកស្នួលសុទ្ធសឹងជាប្រភេទគ្រាប់ចម្រុះ ដែលនៅសេសសល់ពីសម័យសង្គ្រាមជាច្រើនជំនាន់ ។ គ្រាប់ទាំងនេះ នៅគុណភាពផ្ទុះពី៧០ទៅ៨០ភាគរយផងដែរ ។ លោកប្រធានប្រចាំតំបន់រូបនេះ បានលើកឡើងថា ក្រៅពីការចុះស្រាវជ្រាវរុករក ក្រុមការងារជំនាញបានចុះធ្វើការផ្សព្វផ្សាយអប់រំណែនាំ ដល់ពលរដ្ឋឲ្យពួកគាត់យល់ច្បាស់ពីគ្រាប់យុទ្ធភណ្ឌ និងត្រូវរាយការណ៍បន្ទាន់នៅរាល់ការប្រទះឃើញមកអាជ្ញាធរ ដើម្បីមានវិធានការបន្ទាន់ ៕
ចែករំលែកព័តមាននេះ