ខេត្តកំពត ៖ ស្ត្រីជាជនសង្ស័យម្នាក់ដែលប៉ុនប៉ងលូកកាបូបលួចលុយនៅក្នុងផ្សារសាមគ្គី ទីរួមខេត្តកំពត ហើយត្រូវម្ចាស់កាបូបដឹងទាន់ក៏ស្រែកផ្អើលឆោឡោ ហើយក៏ដឹងដល់សមត្ថកិច្ចនគរបាលក្រុងកំពត ដែល កំពុងតែល្បាតការពារប្រជាពលរដ្ឋនៅក្នុងផ្សារ និងភ្ញៀវទេសចរណ៍ដែលមកពីតាមបណ្តាខេត្ត មកលេងកម្សាន្តបុណ្យសមុទ្រនៅខេត្តកែប ហើយក៏ឆៀងចូល មកទិញគ្រឿងសមុទ្រនៅក្នុងផ្សារទីរួមខេត្តកំពតនេះ។ ជនសង្ស័យជាស្ត្រីរូបនោះក៏ត្រូវបានសមត្ថកិច្ចក្រ បួចបានបន្ទាប់ពីមានការផ្អើលឆោឡោក្រោយពីធ្វើសកម្មភាព ចំណែកម្ចាស់កាបូបក៏មិនបានដាក់ពាក្យឲ្យ សមត្ថកិច្ចជាលាយលក្ខណ៍អក្សអីដែរ គ្រាន់តែនិយាយផ្ទាល់ មាត់ប្រាប់សមត្ថកិច្ចថា ស្ត្រីជាជនសង្ស័យរូបនេះគ្រាន់តែលូកកាបូបលុយគាត់ភ្លាមគាត់ដឹងទាន់ក៏ចាប់ ដៃជាប់ហើយស្រែកឲ្យគេឯងនៅក្នុងផ្សារជួយតែម្តង។ ស្ត្រីជាជនសង្ស័យរូបនេះក៏មិនយកអ្វីនៅក្នុងកាបូប លុយរបស់គាត់បានដែរ ព្រោះគាត់ដឹងទាន់ចាប់ដៃជាប់ ហើយគេក៏ ទម្លាក់របស់ដែលយកបានចូលក្នុងកាបូបវិញទៅ។ រួចហើយស្ត្រីរងគ្រោះបានប្រគល់ស្ត្រីជាជនសង្ស័យ ឲ្យទៅសមត្ថកិច្ច និងប្រាប់ឈ្មោះខ្លួនដល់សមត្ថកិច្ច ហើយក៏ដើរសំដៅទៅឡើងរថយន្តរបស់ខ្លួនបាត់ទៅ។
លោកវរសេនីយឯក សៅ សំអឿន ស្នងការរងខេត្ត បានឲ្យដឹងថា ហេតុការឃាត់ខ្លួនស្ត្រីជាជនសង្ស័យ ដែលធ្វើសកម្មភាពលូកកាបូបលុយភ្ញៀវ បានកើត ឡើងតាំងពីថ្ងៃទី២៣ ធ្នូ ២០១៧ វេលាម៉ោង៨ និង៣០នាទីព្រឹក ក្នុងផ្សារសាមគ្គីទីរួមខេត្ត បន្ទាប់ពីជន សង្ស័យធ្វើសកម្មភាពលូកកាបូបលុយភ្ញៀវ ហើយមានការផ្អើលឆោឡោ ខណៈសមត្ថកិច្ចកំពុងល្បាត ការពារប្រជាពលរដ្ឋថ្ងៃបុណ្យសមុទ្រផងនោះ ក៏បានអន្តរាគមន៍ឃាត់ខ្លួនបានទាន់ពេលវេលាតែម្តង។ លោកបានបន្តទៀតថា ជនសង្ស័យដែលសមត្ថកិច្ចឃាត់ខ្លួននេះមានឈ្មោះ ឡឹង ង៉ែត ភេទស្រី អាយុ៣៥ឆ្នាំ មានទី លំនៅភូមិត្រពាំងខ្លូត ឃុំអង្គតាសោម ស្រុកត្រាំកក់ ខេត្តតាកែវ។ ជននេះមានដើមកំណើតនៅភូមិក្រាំង ក្រូច ឃុំទៀន ស្រុកកណ្តាលស្ទឹង ខេត្តកណ្តាល។ ចំណែកស្ត្រីរងគ្រោះដែលត្រូវជនសង្ស័យលូកកាបូបលុយនោះ មានអាយុប្រហែលជា៤០ឆ្នាំ គាត់ពុំបាន ប្រាប់ឈ្មោះដល់សមត្ថកិច្ចទេ គ្រាន់តែប្រាប់សមត្ថកិច្ច ថា គាត់ជាភ្ញៀវមានទីលំនៅរាជធានីភ្នំពេញ។
ស្ត្រីជាជនសង្ស័យក្រោយពីសមត្ថកិច្ចធ្វើការស្រាវជ្រាវ និងសាកសួរអស់រយៈជាច្រើនម៉ោងដើម្បីស្រាវជ្រាវរកបក្ខពួក និងបក្ខពួកគេ ប៉ុន្តែជនសង្ស័យរូបនេះបានសារភាពទទួលកំហុសតែខ្លួនឯងម្នាក់គត់ គឺបានសារភាពប្រាប់សមត្ថកិច្ចថា ខ្លួនពិតជាបានប៉ុនប៉ងលូកកាបូបលុយរបស់ស្ត្រីជនរងគ្រោះពិតមែនតែចៃដន្យម្ចាស់គេដឹងទាន់ចាប់ដៃជាប់ខ្លួនឥតយកអ្វីបាននោះទេ។ នៅរសៀលថ្ងៃទី២៥ ធ្នូ ២០១៧នេះ កម្លាំងការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្ត បានកសាងសំណុំរឿងបញ្ជូនជនសង្ស័យទៅសាលាដំបូងខេត្តដើម្បីចាត់ការតាមនីតិវិធី។ នៅល្ងាចថ្ងៃទី២៥ ធ្នូ ២០១៧ ដដែលនេះដែរ បន្ទាប់ពីតុលាការពិនិត្យអង្គហេតុរួចរាល់ ស្ត្រីជាជនត្រូវចោទត្រូវបានលោក តុប ឈុនសុង ចៅក្រមស៊ើបសួរសាលាដំបូងខេត្ត បានចេញដីកាបង្គាប់ឲ្យឃុំខ្លួនដាក់ពន្ធនាគារខេត្តកំពត៕
ចែករំលែកព័តមាននេះ