រាជធានីភ្នំពេញ ៖ កម្មកររោងចក្រ២នាក់មានទំនាស់វាយតប់គ្នាដោយភាគីម្ខាងបានទាញដែកវ៉េវាយសំពងក្បាលភាគីម្ខាងទៀតបណ្ដាលឲ្យរងរបួសបែកក្បាលហូរឈាមកក្លាក់ និងបង្កឲ្យមានការភ្ញាក់ផ្អើលទាំងព្រឹក ភ្លាមៗនោះកម្លាំងនគរបាលបានចុះទៅអន្តរាគមន៍ ប៉ុន្តែមិនបានឃាត់ខ្លួនជនដៃដល់ទេ ដោយសារតែមានការរារាំពីស្ត្រីម្នាក់ដែលជាបងរបស់ជនដៃដល់។ ដោយនគរបាលបាននាំជនរងគ្រោះដែលបែកក្បាលនោះទៅដាក់ពាក្យបណ្ដឹងនៅប៉ុស្តិ៍ចោមចៅទី៣ ហើយក្រោយមកទើបខាងជនដៃដល់ទៅតាមក្រោយ និងធ្វើការសម្រុះសម្រួលគ្នាចេញថ្លៃព្យាបាលរបួសទៅខាងជនរងគ្រោះចំនួន៣០០ដុល្លារបញ្ចប់រឿង។
ហេតុការណ៍នោះបានកើតឡើងកាលពីវេលាម៉ោង១០ព្រឹក ថ្ងៃទី២៥ ខែធ្នូ ឆ្នាំ២០១៧ នៅក្នុងរោងចក្រគ្មានស្លាកយីហោមួយកន្លែង ដែលមានទីតាំងស្ថិតនៅក្នុងបុរីញូវថោន ខាងលិចអាកាសយានដ្ឋានអន្តជាតិភ្នំពេញ ភូមិព្រៃទា សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។ ជនរងគ្រោះបែកក្បាលនោះឈ្មោះ សុខ វៃ អាយុ២៩ឆ្នាំ មុខរបរកម្មកររោងចក្រមានទីលំនៅក្នុងឃុំរំចេក ស្រុកព្រះស្ដេច ខេត្តព្រៃវែង។ ចំណែកជនដៃដល់ឈ្មោះ ឡាំ ឆេងរត្ន័ ស្នាក់នៅផ្ទះជួលក្នុងភូមិកើតហេតុខាងលើ។ តាមប្រភពព័ត៌មានបានឲ្យដឹងថា រោងចក្រខាងលើនោះអត់ដឹងថាជារោងចក្រផលិតអ្វីនោះទេតែគេហៅថារោងចក្រឡៗប៉ុណ្ណោះ ហើយជនរងគ្រោះគឺជាកម្មករដែលទើបចូលធ្វើការនៅទីនោះថ្មី ចំណែកជនដៃដល់គឺជាកម្មករចាស់ដែលធ្វើការនៅទីនោះជាង១០ឆ្នាំកន្លងមកហើយ។
ដោយឡែកនៅមុនពេលកើតហេតុជនដៃដល់បានសួររកខ្សែប៉ុស្តិ៍ផ្សារដែក ប៉ុន្តែជនរងគ្រោះបានឆ្លើយថាអត់ដឹងទេ ហើយត្រូវបានជនសង្ស័យដែលអាងខ្លួនជាកម្មករចាស់ ថៅកែកាន់ជើងផងបានរករឿងព្រមទាំងទាញដែលវ៉េ វាយសំពងទៅលើជនរងគ្រោះ បណ្ដាលឲ្យត្រូវក្បាលបែកហូរឈាម និងត្រូវស្មាផងដែរ។ ប្រភពដដែលបានបន្តទៀតថា ខណពេលនោះ បានបង្កឲ្យមានការភ្ញាក់ផ្អើលពេញក្នុងរោងចក្រ ហើយកម្លាំងនគរបាលបានចុះទៅអន្តរាគមន៍ភ្លាមៗដែរ។ ប៉ុន្តែមិនបានឃាត់ខ្លួនជនដៃដល់ទេដោយសារតែមានការរារាំពីស្ត្រីម្នាក់ដែលជាបងរបស់ជនដៃដល់ ហើយនគរបាលបាននាំជនរងគ្រោះទៅដាក់ពាក្យបណ្ដឹងនៅប៉ុស្តិ៍ ហើយរហូតដល់វេលាល្ងាចថ្ងៃដដែលទើបជនសង្ស័យទៅកាន់ប៉ុស្តិ៍ជួបសម្រុះសម្រួលជាមួយជនរងគ្រោះ និងចេញសំណងចំនួន៣០០ដុល្លារបញ្ចប់រឿងតែម្ដង៕
ចែករំលែកព័តមាននេះ