រាជធានីភ្នំពេញ ៖ ទីបំផុត ការប្រកួតប្រដាល់នៅលើសង្វៀនទូរទស្សន៍ប៉ុស្ដិ៍លេខ៥កាលពីល្ងាចថ្ងៃទី២៣ ធ្នូ ត្រូវបានបញ្ចប់យ៉ាងសោះកក្រោះលាយឡំដោយការខកចិត្តបំផុតសម្រាប់អ្នកគាំទ្រ និងកីឡាកររឿម វណ្ណៈ ខ្លួនឯង បន្ទាប់ពីជើងខ្លាំងដែលត្រូវគេស្គាល់ថាជាជើងឯករងក្នុងព្រឹត្តិការណ៍ប្រកួតនាពេលកន្លងមករូបនេះ…
រាជធានីភ្នំពេញ ៖ ទីបំផុត ការប្រកួតប្រដាល់នៅលើសង្វៀនទូរទស្សន៍ប៉ុស្ដិ៍លេខ៥កាលពីល្ងាចថ្ងៃទី២៣ ធ្នូ ត្រូវបានបញ្ចប់យ៉ាងសោះកក្រោះលាយឡំដោយការខកចិត្តបំផុតសម្រាប់អ្នកគាំទ្រ និងកីឡាកររឿម វណ្ណៈ ខ្លួនឯង បន្ទាប់ពីជើងខ្លាំងដែលត្រូវគេស្គាល់ថាជាជើងឯករងក្នុងព្រឹត្តិការណ៍ប្រកួតនាពេលកន្លងមករូបនេះ ប៉ះប្រកួតជាមួយដៃគូចាស់ជាថ្មី គឺ កីឡាករ ភុន សោភ័ណ្ឌ ហើយបានត្រឹមតែលទ្ធផលស្មើយ៉ាងវេទនា បើធៀបនឹងការប្រកួតកាលពីលើកមុនៗនោះ ។
នេះជាជំនួបលើកទី៣របស់ពួកគេ ក្នុងពេលដែល២លើកមុន គឺ ភុន សោភ័ណ្ឌ ជាអ្នកមានប្រៀប ដោយសារតែគេបានឈ្នះម្ដង និងស្មើម្ដង រហូតដល់ថ្នាក់គណៈកម្មការប្រដាល់សម្រេចឱ្យរឿម វណ្ណៈ ឡើងសងសឹកស្របគ្នាដែលមានការកត់សម្គាល់ថា កីឡាករម្ខាងទៀតមានការធ្លាក់ដៃជាងមុន ប៉ុន្តែចុងក្រោយកីឡាកររឿម វណ្ណៈ បែរជាបានត្រឹមស្មើទាំងចាញ់ប្រៀបគូប្រកួតដាច់តែម្ដង ។
ការប្រកួតដែលបានធ្វើឡើងពេញរយៈពេល៥ទឹក ម្នាក់ៗបានកត់សម្គាល់ឃើញថា កីឡាកររឿម វណ្ណៈ ទទួលលទ្ធផលមិនខុសពីការប្រកួតកាលពីកីឡាកររូបនេះ ប៉ះភុន សោភ័ណ្ឌ លើកទី១នោះទេ បើទោះជាលទ្ធផលគ្រានោះគឺរឿម វណ្ណៈ ចាញ់ពិន្ទុ ហើយការប្រកួតនាគ្រានេះ គឺបានស្មើពិន្ទុក្រោយបញ្ចប់៥ទឹក ។
ហេតុផលដែលមានការលើកឡើងបែបនេះ គឺដោយសារតែគេបានឃើញរឿម វណ្ណៈ ចាញ់ប្រៀបគូប្រកួតដាច់ដោយមានទាំងអ្នកខ្លះយល់ថា ការចាប់កំហុសកីឡាករ ភុន សោភ័ណ្ឌ គឺជាការយិតយោងការបាក់មុខរបស់រឿម វណ្ណៈ នោះផង ។ គិតពីប្រវត្តិនៃការប៉ះគ្នាកាលពីលើកទី១ កីឡាករ ភុន សោភ័ណ្ឌ គឺជាអ្នកនាំមុខដោយជ័យជម្នះ ក្នុងពេលដែលលើកទី២អ្នកទាំងពីរទទួលបានត្រឹមស្មើ តែលទ្ធផលស្មើពិន្ទុនៅក្នុងពេលនោះគេអាចនិយាយបានថាល្អជាងលើកនេះឆ្ងាយណាស់ ដោយសារតែក្នុងពេលនោះ រឿម វណ្ណៈ និងភុន សោភ័ណ្ឌ ពិតជារកចំណុចចាញ់ឈ្នះគ្នាអត់បានមែន ។
ងាកមកកាន់ការប្រកួតដែលទើបបញ្ចប់ជាលើកទី៣នេះវិញ កីឡាករ រឿម វណ្ណៈ មិនមែនឡើងមកសងសឹកនោះទេ ដោយសារតែការប្រកួតទាំងមូល គឺមើលទៅចាញ់ប្រៀបដាច់ឆ្ងាយតែម្ដងបើធៀបនឹងលទ្ធផលដែលគេធ្លាប់ទទួលបានស្មើដូចគ្នាកាលពីលើកមុន ។ ស្ថិតក្នុងទឹកទី១ គេឃើញកីឡាករទាំង២ប្រដំប្រសងគ្នារកចំណុចឈ្នះចាញ់មិនឃើញនោះទេ គឺរហូតដល់ទឹកទី២ទើបគេឃើញឱកាសឈ្នះប្រៀបចាប់ផ្ដើមលេចឡើងទៅលើកីឡាករបង្គោលក្រហមភុន សោភ័ណ្ឌ ។
យ៉ាងណាមិញ នៅទឹកទី៣ និងទឹកទី៤ កីឡាករ រឿម វណ្ណៈ ត្រូវគូប្រកួតវាយត្រូវឡើងទក់សាច់តែម្ដង ដោយអ្នកគាំទ្រភាគច្រើនបានបង្ហាញជំនឿចិត្តថា ឱកាសសងសឹករបស់គេសម្រាប់ការប្រកួតនៅប៉ុស្ដិ៍លេខ៥នេះ គឺនឹងខាតដើមខាតចុងនោះផង ។ នៅក្នុងអំឡុងទឹកទី៤នោះ កីឡាកររឿម វណ្ណៈ ក៏ត្រូវគេឃើញវាយថែមទៅលើគូប្រកួតមួយដៃពេញទំហឹងបណ្ដាលឱ្យភុន សោភ័ណ្ឌ មានបំណងធ្វើសន្លប់ដើម្បីចាប់កំហុសទៅលើគូប្រកួត ប៉ុន្តែដោយសារតែខាងគណៈកម្មការមិនមានការចាប់កំហុសចំពោះ រឿម វណ្ណៈ ទើបការរាប់មួយលើករបស់ភុន សោភ័ណ្ឌ ក្លាយជាការកាត់ពិន្ទុទៅវិញ ដោយខាងគណៈកម្មការបានអះអាងថា សម្រេចកាត់ពិន្ទុដោយសារតែកីឡាកររូបនេះធ្វើស្ទីលដេកដួលរមួលផ្សំគ្រេច ដែលមិនសមជាទឹកចិត្តកីឡាករ ។
ឈានដល់ទឹកទី៥ អ្នកទាំងពីរអត់មានវាយគ្នាស្ទើរតែពេញមួយទឹកតែម្ដង ដោយសារតែកីឡាករម្ខាងៗសុទ្ធតែហត់រៀងខ្លួន ហើយអាចនិយាយបានថាលែងមានកម្លាំងស៊ូ ។ ការប្រកួតនេះ ត្រូវគេមើលឃើញថា កីឡាករបង្គោលក្រហម ភុន សោភ័ណ្ឌ នឹងឈ្នះ១០០ភាគរយ ដោយសារតែការប្រកួត៥ទឹកគេឈ្នះ៣ទឹកពេញ ហើយជាលទ្ធផលដែលឈ្នះដោយបច្ចេកទេសយ៉ាងល្អតែម្ដង ជាពិសេសគឺកម្លាំងវាយម៉ាត់របស់គេ គឺសឹងតែមិនមានមួយស្នៀតណាមួយដែលវាយមិនត្រូវគោលដៅទៅលើផ្ទៃមុខរឿម វណ្ណៈ ឡើយ ។
ទោះបីយ៉ាងណា គណៈកម្មការបានសម្រេចឱ្យអ្នកទាំងពីរស្មើគ្នា ដោយយោងលើហេតុផលថា កីឡាករ ភុន សោភ័ណ្ឌ មានចេតនាស៊ីឡាកដើម្បីចាប់កំហុសទៅលើគូប្រកួតក្នុងពេលថែមខុសបច្ចេកទេស ទើបកីឡាករ ភុន សោភ័ណ្ឌ និងអ្នកគាំទ្រក៏ទទួលយកការសម្រេចនោះ ។ យ៉ាងណាក៏ដោយ គេនៅតែមើលឃើញថា កីឡាករ រឿម វណ្ណៈ ទទួលបានលទ្ធផលស្មើលើកនេះទាំងអាម៉ាស់ ដោយសារតែលោករមែងព្យាយាមវាយថែមខុសបច្ចេកទេសទៅលើគូប្រកួតនៅពេលដឹងថាមិនអាចចូលចុះ ។
អ្នកកត់សម្គាល់ដដែលនោះថែមទាំងលើកឡើងថា ជាសំណាងរបស់រឿម វណ្ណៈ ដោយសារតែគណៈកម្មការចិត្តល្អមិនចាប់កំហុសបែរជាទម្លាក់កំហុសទៅលើកីឡាករ ភុន សោភ័ណ្ឌ ដែលត្រូវចោទថាចង់ធ្វើសន្លប់ស៊ីឡាកទៅវិញនោះដែលការកាត់ក្ដីបែបនេះត្រូវបានអ្នកខ្លះអះអាងថា ជាការយិតយោងកុំឱ្យកីឡាកររឿម វណ្ណៈ រងការអាម៉ាស់ធ្ងន់ជាងនេះ ។
កីឡាករ រឿម វណ្ណៈ មិនអាចសុំការបញ្ជាក់បានទេជុំវិញការលើកឡើងថាលោកទទួលបានលទ្ធផលស្មើដោយសារតែមានការបិទភ្នែកបិទច្រមុះពីគណៈកម្មការ ជាពិសេសគឺលោកអាជ្ញាកណ្ដាល ប៉ុន្តែយោងតាមការទទួលស្គាល់របស់លោកនៅចំពោះគូកន គឺលោកពិតជាបានវាយថែមទៅលើគូប្រកួតម្ដងម្កាលប្រាកដមែន ដោយសារតែលោកខឹងចិត្តរឿងវាយមិនចូលទៅលើភុន សោភ័ណ្ឌ នៅក្នុងថ្ងៃនោះ ។
លោកថា ខឹងចិត្តចំពោះខ្លួនឯងយ៉ាងខ្លាំង ដែលខំហ្វឹកហាត់មុនឡើងរេញណាស់ដែរ ប៉ុន្តែលើកជើងក៏ប៉ះលើកដៃក៏ប៉ះ ហើយធ្វើឱ្យលោកកើតអារម្មណ៍មួរម៉ៅ និងចង់ឈប់ប្រកួតព្រោះតែធ្វើមិនសូវបានដូចចិត្ត ។ លោកបានចាត់ទុកលទ្ធផលដែលខ្លួនជួបប្រទះថាជាករណីស៊យ ដែលអាចបណ្ដាលមកពីគូប្រកួតដឹងខ្យល់ក្នុងការវាយចេញរបស់ខ្លួន ទើបធ្វើឱ្យលោកទប់ជំហរប្រកួតមិនបានល្អ ហើយចេះតែថែមជ្រុលជ្រួសម្ដងម្កាលទៅលើបង្គោលក្រហម ។
យ៉ាងណាក៏ដោយលោកថា ការលើសលស់របស់ខ្លួនមិនដល់ថ្នាក់បណ្ដាលឱ្យគូប្រកួតចង់សន្លប់នោះទេ ទើបលោកយល់ថាការមិនចាប់កំហុសលោក ហើយបែរជាងាកទៅកាត់ពិន្ទុកីឡាករម្ខាងទៀតវិញគឺជារឿងសមស្រប។
លោកបានហៅលទ្ធផលស្មើនៅក្នុងថ្ងៃនោះថា ជារឿងហេងរបស់ខ្លួន ប៉ុន្តែលោកក៏អះអាងថាមិនចង់បានលទ្ធផលបែបហ្នឹងនោះដែរ ក្នុងពេលកន្លងមក លោកក៏មិនចង់បានលទ្ធផលស៊ីឡាកណាមួយដើម្បីមុខមាត់ ។
ងាកទៅកាន់កីឡាករ ភុន សោភ័ណ្ឌ ឯណោះវិញ លោកថាមិនមានបញ្ហានោះទេ បើទោះជាលោកត្រូវឈ្នះ ហើយស្រាប់តែខាងគណៈកម្មការឱ្យលោកត្រឹមស្មើ ដោយសារតែហេតុកាត់ពិន្ទុចំពោះលោកដែលត្រូវរាប់ម្ដងក្នុងទឹកទី៤ ។ លោកថា ការប្រកួតនៅក្នុងពេលនោះ កីឡាករ រឿម វណ្ណៈ បានថែមខុសបច្ចេកទេសមកលើលោកច្រើនដង ប៉ុន្តែការវាយត្រូវមួយដៃដែលបណ្ដាលឱ្យលោកត្រូវរាប់នៅក្នុងពេលនោះ គឺពិតជាមានកម្លាំងខ្លាំងមែន មិនមែនលោកធ្វើពុតហើយចង់ចាប់កំហុសគូប្រកួតនោះទេ ។
លោកថា ទទួលយកលទ្ធផលដោយសារតែការមើលឃើញរបស់គណៈកម្មការគឺអាចវាយតម្លៃថាលោកមិនឈឺហើយធ្វើពុត ដែលផ្ទុយពីអ្វីដែលលោកបានទទួល ។ លោកប្រកាសត្រៀមខ្លួនជួបប្រកួតគ្រប់ពេល ដោយមិនខ្លាចចំពោះការប៉ះគ្នាជាមួយនឹងរឿម វណ្ណៈ នោះទេ ព្រោះលោកដឹងពីកម្លាំង និងបច្ចេកទេសរបស់កីឡាកររូបនេះគ្មានសល់ចន្លោះ ។
លោក សេង កដិកា អ្នករៀបចំការប្រកួតទទួលស្គាល់ថា កីឡាករ រឿម វណ្ណៈ ពិតជាមានកន្លែងខ្លះវាយមិនស្ដាប់លោកអាជ្ញាកណ្ដាល ប៉ុន្តែលោកថា ការវាយខុសបច្ចេកទេសបន្តិចបន្តួច វាមិនដល់ថ្នាក់ធ្វើឱ្យកីឡាករ ភុន សោភ័ណ្ឌ ចង់សន្លប់ និងឈានដល់រាប់៨នោះទេ ទើបលោកយល់ថា ទង្វើបែបនេះគឺជាកំហុសទៅវិញ ដែលលោកក៏ត្រូវតែគាំទ្រឱ្យកាត់ពិន្ទុ ។
លោកថា ការប្រកួតទាំងមូលគឺរឿម វណ្ណៈ ចាញ់ដាច់ ប៉ុន្តែដោយសារតែភុន សោភ័ណ្ឌ ព្យាយាមស៊ីឡាកចង់ចាប់កំហុសគូប្រកួត ទើបបណ្ដាលឱ្យគណៈកម្មការសម្រេចឱ្យស្មើ បើទោះជាលោកក៏ទទួលស្គាល់លទ្ធផលស្មើដែល រឿម វណ្ណៈ ទទួលបានលើកនេះ គឺរាងមិនសូវសមបន្តិចក្ដី ។ លោកប្រកាសថា នឹងចាត់ចែងឱ្យកីឡាករទាំងពីរសងសឹកគ្នាជាថ្មី ដើម្បីឱ្យប្រាកដថា តើការជួបគ្នាលើកក្រោយ អ្នកណានឹងឈ្នះដោយកិត្តិយស ។ លោកថា កីឡាកររឿម វណ្ណៈ អាចទប់កំហឹងដែលធ្លាប់វាយបំបាក់ទៅលើគូប្រកួតមិនបាននៅក្នុងពេលនោះ ទើបចេះតែចង់ថែមបើទោះជាគណៈកម្មការបានធ្វើសញ្ញាមិនឱ្យប្រកួតបន្តក្ដី ។
យ៉ាងណាមិញ លោកមិនទាន់ច្បាស់ថា នឹងដាក់ឱ្យគូនេះប្រកួតសងសឹកគ្នានៅក្នុងពេលណាឱ្យប្រាកដនោះទេ ក្នុងពេលដែលកីឡាករ ភុន សោភ័ណ្ឌ និងរឿម វណ្ណៈ ក៏មិនមែនទំនេរស្រួលផ្គូផ្គងតាមការរៀបចំ ដែលអាចចង់ដាក់ពេលណាក៏បាននោះ ។
លោកថា អ្នកទាំងពីរប៉ះគ្នាគឺទាមទារពេលវេលា ហើយក៏ត្រូវការទុកពេលឱ្យអ្នកទាំងពីរហ្វឹកហាត់ត្រៀមខ្លួនឱ្យបានម៉ត់ចត់ទាំងសងខាងផងដែរ មិនអាចកីឡាករម្ខាងមានពេលគ្រប់គ្រាន់ ហើយកីឡាករម្ខាងទៀតជាប់ប្រកួតនៅសង្វៀនផ្សេង ហើយចេះតែបង្ខំឱ្យប្រកួតគ្នាជាថ្មីបានទេ ៕
ចែករំលែកព័តមាននេះ