ខេត្តកំពង់ឆ្នាំង ៖ ផ្លូវលំក្រាលក្រួសក្រហមមួយខ្សែប្រវែង១២គីឡូម៉ែត្រ តភ្ជាប់ពីឃុំក្រាំងលាវ ស្រុករលាប្អៀរ ទៅឃុំក្រាំងស្គា ស្រុកទឹកផុស ដែលជាអំណោយដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ត្រូវបានប្រារព្ធពិធីបើកការដ្ឋានស្ថាបនាកាលពីថ្ងៃទី១៧ វិច្ឆិកា ក្រោមអធិបតីភាពលោកបណ្ឌិតអ៊ុក រ៉ាប៊ុន រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ ជាតំណាងដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន។
ចូលរួមក្នុងពិធីនោះមាន លោកបណ្ឌិតទូច មា៉រីម អភិបាលខេត្ត លោកជំទាវ កែវ ច័ន្ទមុនី តំណាងរាស្ត្រមណ្ឌលកំពង់ឆ្នាំង លោកអភិបាលរងខេត្ត មន្ត្រីរាជការ មេបញ្ជាការកងកម្លាំងប្រដាប់អាវុធ ប្រជាពលរដ្ឋ និងសិស្សានុសិស្សយ៉ាងច្រើនកុះករ ។លោកឈឹម វុទ្ធា អភិបាលស្រុករលាប្អៀរឱ្យដឹងថា ក្រោយពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានប្រកាសផ្តល់ផ្លូវក្រាលក្រួសក្រហមមួយខ្សែប្រវែង១២គីឡូម៉ែត្រ ក្នុងឱកាសផ្តល់ប័ណ្ណកម្មសិទ្ធិដីធ្លីជូនប្រជាពលរដ្ឋកាលពីថ្ងៃទី២៧ តុលា កន្លងទៅ ទើបមានការបើកការដ្ឋានស្ថាបនានៅពេលនេះ ដែលមានទទឹង៦ម៉ែត្រ និងស្ថាបនាដោយក្រសួងអភិវឌ្ឍន៍ជនបទ ជាថវិការបស់រាជរដ្ឋាភិបាល ។
លោកបណ្ឌិតទូច ម៉ារីម អភិបាលខេត្ត បានថ្លែងថា ផ្លូវលំមួយខ្សែនេះជាសមិទ្ធផលថ្មីបន្ថែមទៀត ដែលជាចំណងដៃរបស់សម្តេចតេជោ ហ៊ុន សែន សម្រាប់ប្រជាពលរដ្ឋក្នុងស្រុកចំនួន២គឺស្រុករលាប្អៀរ និងស្រុកទឹកផុស ជាពិសេសប្រជាពលរដ្ឋឃុំក្រាំងលាវ និងឃុំក្រាំងស្គា មានផ្លូវដ៏ល្អ សម្រាប់ធ្វើចរាចរណ៍ទៅមក និងធ្វើឱ្យជីវភាពប្រជាពលរដ្ឋបានល្អប្រសើរកាត់បន្ថយភាពក្រីក្រផងដែរ។មានប្រសាសន៍បើកការដ្ឋានស្ថាបនាផ្លូវលំក្រាលក្រួសក្រហមប្រវែង១២គីឡូម៉ែត្រ ក្នុងឱកាសនោះ លោកបណ្ឌិតអ៊ុក រ៉ាប៊ុន បញ្ជាក់ថា ផ្លូវថ្នល់គឺជាសរសៃឈាមសេដ្ឋកិច្ចជាតិយ៉ាងសំខាន់ បើយើងមានផ្លូវ គឺយើងបានធ្វើឱ្យសេដ្ឋកិច្ច ជីវភាពរស់នៅរបស់ប្រជាពលរដ្ឋកាន់តែប្រសើរឡើង។
បើយើងមានផ្លូវស្អាតធ្វើដំណើរបានងាយស្រួល គឺយើងបានកាត់បន្ថយពេលវេលានៃការធ្វើដំណើរដែលធ្លាប់តែយឺតយូរ មកឆាប់រហ័ស កាត់បន្ថយគ្រោះថ្នាក់ដល់ជីវិតមនុស្សដោយសារតែយើងដឹកអ្នកជំងឺមកមន្ទីរពេទ្យទាន់ពេលវេលា ទាំងអស់នេះគឺជាការចូលរួមចំណែកកាត់បន្ថយភាពក្រីក្ររបស់ប្រជាពលរដ្ឋយើង។ លោកបណ្ឌិតបន្ថែមថា សមិទ្ធផលធំៗសំខាន់ៗជាច្រើនលើគ្រប់វិស័យដែលរាជរដ្ឋាភិបាលសម្រេចបាន ហើយក៏កំពុងបន្តទៀត គឺធ្វើឱ្យសេដ្ឋកិច្ចជាតិកាន់តែរីកចម្រើនជាលំដាប់ ។
លោកបណ្ឌិតអ៊ុក រ៉ាប៊ុន ក៏បានផ្តាំផ្ញើដល់អាជ្ញាធរមូលដ្ឋាន និងប្រជាពលរដ្ឋ សូមជួយបង្កលក្ខណៈដល់ការស្ថាបនា បើមានប៉ះពាល់ផលប្រយោជន៍បន្តិចបន្តួច សុំមេត្តាជួយសម្រួលដើម្បីឱ្យការស្ថាបនាផ្លូវបានងាយស្រួលនិងឆាប់រហ័ស។ ក្នុងឱកាសនោះដែរ លោកបណ្ឌិតក៏បានចែកអំណោយដល់ប្រជាពលរដ្ឋដែលចូលរួមចំនួន២៩៥នាក់ ក្នុងម្នាក់ៗ ទទួលបានសារុង ១និងថវិកា១ម៉ឺនរៀល ឧបត្ថម្ភយុវជនស្ម័គ្រចិត្ត និងមន្ត្រីជំនាញថវិកាចំនួន១លានរៀល ៕
ចែករំលែកព័តមាននេះ