រាជធានីភ្នំពេញ ៖ រថយន្តដឹកដី១គ្រឿង បានបើកក្នុងល្បឿនយ៉ាងលឿនហើយជែងជាមួយរថយន្តនៅខាងមុខហើយ ក៏បានជ្រុលទៅបុកម៉ូតូ១គ្រឿងជិះគ្នា៤នាក់ ក្នុងនោះមានប្ដី ប្រពន្ធ កូន និងក្មួយ បណ្ដាលឲ្យស្លាប់ទាំងអស់គ្នាភ្លាមៗនៅនឹងកន្លែងកើតហេតុ…
រាជធានីភ្នំពេញ ៖ រថយន្តដឹកដី១គ្រឿង បានបើកក្នុងល្បឿនយ៉ាងលឿនហើយជែងជាមួយរថយន្តនៅខាងមុខហើយ ក៏បានជ្រុលទៅបុកម៉ូតូ១គ្រឿងជិះគ្នា៤នាក់ ក្នុងនោះមានប្ដី ប្រពន្ធ កូន និងក្មួយ បណ្ដាលឲ្យស្លាប់ទាំងអស់គ្នាភ្លាមៗនៅនឹងកន្លែងកើតហេតុ ក្នុងខណៈពេលកំពុងធ្វើដំណើរបញ្ច្រាសទិសគ្នា ហើយអ្នកបើកបររថយន្ត បង្កប្រុងរត់គេចខ្លួន ប៉ុន្តែត្រូវបានកម្លាំងនគរបាលស្រុកអង្គស្នួល រួមជាមួយកម្លាំងនគរបាលប៉ុស្តិ៍លំហាច និងប៉ុស្ដិ៍ដំណាក់អំពិលឃាត់ខ្លួនបាន ដោយកសាងសំណុំរឿងបញ្ជូនទៅសាលាដំបូងខេត្តកណ្ដាលចាត់ការតាមច្បាប់ ។
ហេតុការណ៍ដ៏រន្ធត់នេះ បានកើតឡើងកាលពីវេលាម៉ោង០៤ និង៣០នាទីរសៀលថ្ងៃទី២៤ ធ្នូ ស្ថិតនៅតាមផ្លូវជាតិលេខ៤១ ត្រង់ចន្លោះគីឡូម៉ែត្រ១ និងលេខ២ ក្នុងភូមិព្រៃគោ ឃុំលំហាច ស្រុកអង្គស្នួល ខេត្តកណ្ដាល ។ ជនរងគ្រោះទាំង៤នាក់ដែលស្លាប់ ១-ឈ្មោះម៉ន ជីមី ភេទប្រុស អាយុ២៦ឆ្នាំ ជាកម្មកររោងចក្រកាត់ដេរ (មានពាក់មួកសុវត្តិភាព) ត្រូវជាប្ដីរបស់ឈ្មោះហៀង គឹមសាន អាយុ២៤ឆ្នាំ ជាកម្មការិនីរោងចក្រកាត់ដេរ (មានពាក់មួកសុវត្តិភាព) ៣-ឈ្មោះ ម៉ន សម្បត្តិ ភេទប្រុស អាយុ២ឆ្នាំ ត្រូវជាកូន និង៤- ឈ្មោះខេម ស្រីម៉ី ភេទស្រី អាយុ៩ឆ្នាំ ត្រូវជាក្មួុយ មានពាក់មួកសុវត្តិភាព ជនរងគ្រោះទាំង៤នាក់នេះ មានទីលំនៅក្នុងភូមិត្រពាំងសុក្រម ឃុំបែកចាន ស្រុកអង្គស្នួល ខេត្តកណ្ដាល។ ដោយឡែក អ្នកបើករថយន្តបង្កឈ្មោះ សេង ចាន់ឌឿន អាយុ២៣ឆ្នាំ មានទីលំនៅក្នុងភូមិព្រពាំងស្យា ឃុំស្វាយរំពារ ស្រុកបរសេដ្ឋ ខេត្តពង់ស្ពឺ ។
នគរបាលស្រុកអង្គស្នួលបានឲ្យដឹងថា នៅមុនពេលកើតហេតុ អ្នកទាំង២បានជិះម៉ូតូ១គ្រឿងម៉ាកហុងដាឌ្រីមសេ១២៥ ពណ៌ខ្មៅ ពាក់ស្លាកលេខភ្នំពេញ1CW-4614 ទៅបុណ្យមិត្តភក្ដិនៅក្នុងឃុំត្រពាំងគង ស្រុកសំរោងទង ខេត្តកំពង់ស្ពឺ ។ ដោយពេលនោះ បានយកកូនប្រុសម្នាក់ និងក្មួយស្រីទៀតទៅជាមួយ ដោយទុកកូនស្រីឲ្យនៅផ្ទះ ហើយកម្មវិធីបុណ្យនោះ បានប្រព្រឹត្តទីតាំងពីវេលាល្ងាថ្ងៃសៅរ៍ទី ២៣ ធ្នូ ម្លេ៉ះ ប៉ុន្តែដោយជាប់ធ្វើការ រហូតដល់ព្រឹកថ្ងៃអាទិត្យ ដែលជាថ្ងៃសម្រាកទើបនាំគ្នាទៅបុណ្យ ហើយរហូតដល់ល្ងាចទើបនាំគ្នាត្រឡប់មកផ្ទះវិញ ។
ប្រភពដដែលបន្តទៀតថា ខណៈនោះជនរងគ្រោះខាងលើបានជិះម៉ូតូធ្វើដំណើរក្នុងទិសដៅពីត្បូងទៅជើង លុះពេលទៅដល់ត្រង់ចំណុចកើតហេតុ ស្រាប់តែមានរថយន្តបែនដឹកដី១គ្រឿងម៉ាកនីស្សាន់ ពណ៌ខៀវពាក់ស្លាកលេខ តាកែវ3A -2777 បើករបរក្នុងទិសដៅបញ្ច្រាសទិសគ្នាក្នុងល្បឿនយ៉ាងលឿន បានទៅដល់ ហើយបានជែងយានយន្តដែលនៅខាងមុខ ។ បន្ទាប់មកក៏បានជ្រុលចង្កូតទៅបុកម៉ូតូជនរងគ្រោះបណ្ដាលឲ្យស្លាប់បាត់បង់ជីវិតទាំង៤នាក់រដូករណែលពេញផ្លូវតែម្ដង ហើយក្រោយមកអ្នកបើកបររថយន្តបានប្រុងរត់គេចខ្លួនប៉ុន្តែត្រូវបានកម្លាំងនគរបាលស្រុកអង្គស្នួល រួមជាមួយកម្លាំងនគរបាលប៉ុស្តិ៍ លំហាចនិងប៉ុស្ដិ៍ដំណាក់អំពិលឃាត់ខ្លួនបានភ្លាមៗដែរ។
នៅវេលាម៉ោង១រសៀលថ្ងៃទី២៥ ធ្នូ នេះ អ្នកបររថយន្តខាងលើ ត្រូវបានបញ្ជូនទៅកាន់សាលាដំបូងខេត្តកណ្ដាល ដើម្បីចាត់ការតាមផ្លូវច្បាប់ ។
ចែករំលែកព័តមាននេះ