រាជធានីភ្នំពេញ ៖ បុរស២នាក់បានរងរបួសធ្ងន់ ក្នុងនោះម្នាក់បានសន្លប់បាត់មាត់ឈឹងក្នុងគ្រោះថ្នាក់ចរាចរណ៍មួយកើតឡើងរវាងម៉ូតូស្មាស ពណ៌ខ្មៅ មួយគ្រឿង បើកបរដោយបុរសម្នាក់យ៉ាងលឿន ហើយព្យាយាមបើកវ៉ាម៉ូតូមួយគ្រឿងទៀតនៅពីមុខ ក៏ជ្រុលចង្កូតទៅបុកម៉ូតូគុបមូល ពណ៌ស្លែ មួយគ្រឿងទៀតជិះដោយបុរសម្នាក់ដែលកំពុងបត់ឆ្វេងឆ្លងផ្លូវចំពីក្រោយពេញទំហឹងដួលប្រាវទៅលើថ្នល់កាលពីវេលាម៉ោង៨និង៥៥នាទីយប់ថ្ងៃទី១៨ វិច្ឆិកា តាមបណ្តោយផ្លូវភ្នំពេញ-ហាណូយ សង្កាត់ភ្នំពេញថ្មី ខណ្ឌសែនសុខ ទល់មុខសាលាសង្កាត់ភ្នំពេញថ្មី ។ ជនរងគ្រោះទាំងពីរមិនត្រូវបានគេស្គាល់អត្តសញ្ញាណទេ ។
លោកស៊ិន សុវណ្ណ នាយរងផ្នែកសណ្តាប់ធ្នាប់ចរាចរណ៍ជើងគោកខណ្ឌសែនសុខបានឱ្យដឹងថា មុនពេលកើតហេតុម៉ូតូស្មាស ពណ៌ខ្មៅ បើកបរដោយបុរសម្នាក់យ៉ាងលឿនតាមផ្លូវភ្នំពេញ-ហាណូយក្នុងទិសដៅពីត្បូងទៅជើង ស្រាប់តែមកដល់ចំណុចកើតហេតុក៏ព្យាយាមបើកវ៉ាម៉ូតូមួយគ្រឿងទៀតនៅពីមុខក៏វាក់ជាមួយម៉ូតូគុបមូលពណ៌ស្លែ បើកបរដោយបុរសម្នាក់កំពុងបត់ឆ្លងថ្នល់ទើបចាប់ហ្រ្វាំងមិនទាន់ក៏បុកពីក្រោយពេញទំហឹង បណ្តាលឱ្យម៉ូតូទាំងពីរគ្រឿងដួលបោកក្បាលទៅនឹងថ្នល់ធ្វើឱ្យបុរសម្នាក់ដែលបើកម៉ូតូស្មាសរងរបួសធ្ងន់ធ្ងរ ត្រូវរថយន្តសាមុយដឹកយកទៅសង្គ្រោះបន្ទាន់នៅមន្ទីរពេទ្យឯកជនមួយ ។
ចំណែកបុរសអ្នកបើកម៉ូតូគុបមូល ពណ៌ស្លែ នោះវិញសន្លប់បាត់មាត់ឈឹងត្រូវប្រជាពលរដ្ឋរស់នៅទីនោះឃើញក៏ជួយធ្វើចលនាទើបដឹងខ្លួន ហើយត្រូវបានបងប្អូនដឹកយកទៅផ្ទះបាត់ទៅ ។ ក្រោយកើតហេតុម៉ូតូទាំង២គ្រឿងត្រូវបានប៉ូលិសចរាចរយកទៅរក្សាទុកនៅអធិការដ្ឋាននគរបាលខណ្ឌសែនសុខរង់ចាំការដោះស្រាយ ៕
ចែករំលែកព័តមាននេះ