រាជធានីភ្នំពេញ ៖ និយ័តករទូរគមនាគមន៍កម្ពុជា (នទក) បានព្រមានចំពោះប្រតិបត្តិករ ឬក្រុមហ៊ុនផ្ដល់សេវាទូរស័ព្ទចល័តទាំងអស់នៅកម្ពុជា ឲ្យបញ្ឈប់ជាបន្ទាន់នូវការផ្ញើសារ ឬការផ្សព្វផ្សាយពាណិជ្ជកម្ម និងខលទៅរំខានអតិថិជនរបស់ខ្លួនក្នុងម៉ោងសម្រាក ដែលប៉ះពាល់ និងរំខានដល់សិទ្ធិឯកជនរបស់អ្នកប្រើប្រាស់សេវារបស់ខ្លួន ។
ការបញ្ចេញសារព្រមាននេះ ធ្វើឡើងនៅព្រឹកថ្ងៃទី១៩ ធ្នូ ក្រោយពីទទួលការប្តឹងពីសំណាក់អ្នកប្រើប្រាស់ថា មានក្រុមហ៊ុនផ្តល់សេវាកម្មក្នុងម៉ោងសម្រាក ដែលរំខានដល់ដំណេករបស់ពួកគាត់ ។
និយតករទូរគមនាគមន៍កម្ពុជាបានលើកឡើងថា ៖« ដោយទទួលបានអ៊ីម៉ែលពីសំណាក់អ្នកប្រើប្រាស់ប្ដឹងមកកាន់នាយកដ្ឋាន ការប្រកួតប្រជែង និងការការពារអ្នកប្រើប្រាស់អំពីទូរស័ព្ទ ឬសារផ្សព្វផ្សាយ ដែលផ្ញើមករំខាននៅម៉ោងសម្រាក ជាពិសេសកំឡុងពេលចាប់ពីម៉ោង១០យប់ឡើងទៅ ឬកណ្ដាលអធ្រាត្រជាដើម និយ័តករទូរគមនាគមន៍កម្ពុជា សូមធ្វើការក្រើនរំឭកឡើងវិញ ចំពោះប្រតិបត្តិករផ្ដល់សេវាទូរស័ព្ទចល័តទាំងអស់ឱ្យយកចិត្តទុកដាក់ករណីនេះ »។
អាជ្ញាធរដែលគ្រប់គ្រងក្រុមហ៊ុនទូរគមនាគមន៍ដដែលនេះបានបន្តថា ៖« សូមប្រតិបត្តិករទាំងអស់បញ្ឈប់នូវការផ្ញើសារ ឬខលផ្សព្វផ្សាយអំពីប្រូម៉ូសិនរបស់ខ្លួននៅក្នុងម៉ោងសម្រាក ដែលចាត់ទុកជាការរំខានសិទ្ធិឯកជនរបស់អ្នកប្រើប្រាស់ » ។
ទោះជាយ៉ាងនេះក្ដី និយ័តករទូរគមនាគមន៍កម្ពុជា បានបញ្ជាក់ថា ពួកគេនឹងធ្វើការស្វែងរកថា មានការផ្ញើចេញពីក្រុមហ៊ុនផ្សេងឬអត់ ហើយសិក្សាអំពីមូលហេតុដែលនាំឱ្យមានការផ្ញើសារទាំងនេះជាមុនសិន ដើម្បីឱ្យច្បាស់ថា ជាកំហុសរបស់ប្រព័ន្ធ ឬក៏ជាការយល់ច្រឡំណាមួយ រួច នទក នឹងធ្វើលិខិតជូនដំណឹងផ្លូវការ ទៅកាន់គ្រប់ប្រតិបត្តិករទាំងអស់ឱ្យអនុវត្តតាម។ យើងសង្ឃឹមយ៉ាងមុតមាំថា បណ្ដាប្រតិបត្តិករទាំងអស់នឹងចូលរួមសហការល្អជាមួយគ្នា ៕
ចែករំលែកព័តមាននេះ