ខេត្តកែប ៖ ក្នុងថ្ងៃទី២២ ខែធ្នូ ឆ្នាំ២០១៧ ដែលជាថ្ងៃទី១ នៃមហាព្រឹត្តិការណ៍បុណ្យសមុទ្រលើកទី៦ ជុំទី២នៃខេត្តកែប មន្ត្រីមន្ទីរបរិស្ថាន យុវជនស្ម័គ្រចិត្តស្រឡាញ់សន្តិភាព ក្រុមកាយរិទ្ធ សិស្សានុសិស្ស និងប្រជាពលរដ្ឋនៅខេត្តកែប និងបណ្ដាខេត្តផ្សេងៗមិនតិចជាង១ពាន់នាក់ ដឹកនាំដោយ លោក សោម ពិសិដ្ឋ អភិបាលរងខេត្ត បានដើររើសសំរាមនៅតាមតំបន់ឆ្នេរ សួនច្បារ និងតាមស្ដង់ផលិតផលជុំវិញខេត្ត ដែលសកម្មភាពនេះចាប់ផ្ដើមតាំងពីថ្ងៃរៀបចំរហូតដល់ថ្ងៃបញ្ចប់នៃព្រឹត្តិការណ៍បុណ្យសមុទ្រ។
លោក សោម ពិសិដ្ឋ បានលើកឡើងថា សំរាម មិនត្រឹមតែមិនឲ្យមាននៅតាមហាង សណ្ឋាគារ ឬតាមភោជនីយដ្ឋានប៉ុណ្ណោះទេ គឺមិនឲ្យមានគ្រប់ទីកន្លែងទាំងអស់ បើសិនជាអ្នកទាំងអស់នាំគ្នាចាប់ផ្ដើមចូលរួមអនុវត្ត ។
លោកអភិបាលរងថ្លែងថា ៖« កែបនឹងក្លាយជាខេត្តគំរូទី១ ក្នុងការអនុវត្តមិនឲ្យមានសំរាមនៅក្រោមតុ ហើយខាងយុវជនយើងបាននិងកំពុងតែចាប់ផ្ដើមណែនាំទៅដល់អាជីវករ និងម្ចាស់ហាង មិនឲ្យមានសំរាម ឬក្រដាសនៅក្រោមតុឡើយ » ។
លោកបន្តថា ៖« ទាក់ទងនឹងការអនុវត្តនៃគោលការណ៍មិនឲ្យមានសំរាមនៅក្រោមតុនេះ គឺខេត្តមិនមែនទើបតែអនុវត្តនៅពេលនេះទេ កន្លងមក យើងបានផ្សព្វផ្សាយ ហើយក៏មានភោជនីយដ្ឋានមួយចំនួនបានអនុវត្តដែរ ព្រោះវាជាវិធីសាស្ត្រក្នុងការគ្រប់គ្រងនៅតាមភោជនីយដ្ឋានរបស់គាត់ ប៉ុន្តែយើងនៅតែធ្វើការផ្សព្វផ្សាយវាជាបន្តបន្ទាប់ទៀត »។
លោក សោម ពិសិដ្ឋ បានបន្ថែមថា បើសិនជាពួកគាត់នាំគ្នាអនុវត្តរៀបចំផែនការមួយច្បាស់លាស់ ខេត្តនឹងក្លាយជាគំរូទី១ ក្នុងការមិនឲ្យមានសំរាមក្រោមតុ ហើយបើនៅតែមិនអនុវត្ត ខេត្តនឹងមានវិធានការ ឬដាក់ពិន័យចំពោះម្ចាស់ហាង ឬរីស៊តនោះ ។
គួររំលឹកដែរថា នៅក្នុងព្រឹត្តិការណ៍បុណ្យសមុទ្រឆ្នាំនេះ មានស្ដង់លក់ផលិតផល និងម្ហូបអាហារប្រមាណជាង៥០០ស្ដង់ ដែលបានដាក់តាំងបង្ហាញ និងលក់ផលិតផលរបស់ខ្លួន ។
យោងតាមក្រមប្រតិបត្តិសម្រាប់អាជីវកម្មភោជនីយដ្ឋាន និងអាហារដ្ឋានទេសចរណ៍ស្អាត ត្រូវអនុវត្តនូវគោលការណ៍គំរូសំខាន់ៗចំនួន៣រួមមាន ៖
១-សម្រាប់បញ្ជីរាយនាមមុខម្ហូប ៖ ត្រូវសរសេរជា៣ភាសាយ៉ាងតិច រួមមាន ភាសាខ្មែរនៅខាងមុខ ឬពីលើ និងភាសាអង់គ្លេសនៅបន្ទាប់ ឬបន្ទាត់ខាងក្រោម ហើយភាសាបរទេសទី៣នៅបន្ទាប់ទៀត អាស្រ័យតាមស្ថានភាពជាក់ស្ដែងនៃអតិថិជនរបស់អាជីវកម្ម ។ ត្រូវដាក់តាំងបង្ហាញនៅបរិវេណ ឬទីតាំងដែលងាយមើលឃើញ ។ ត្រូវបញ្ជាក់ពីគ្រឿងផ្សំ និងព័ត៌មានផ្សេងៗបន្ថែមទៀតដែលចាំបាច់សម្រាប់ជាមូលដ្ឋានពិចារណាជ្រើសរើសដោយភ្ញៀវ ។ ត្រូវបញ្ជាក់តម្លៃឲ្យបានជាក់លាក់ និងប្រើប្រាស់តម្លៃតាមជម្រើសបន្ថែមផ្សេងៗដែលមាន ។
២-បង្គន់អនាម័យ ៖ ត្រូវរៀបចំឲ្យបានល្អស្របតាមស្ដង់ដាបង្គន់សាធារណៈកម្ពុជា ដែលយ៉ាងហោចណាស់ពុំមានក្លិនមិនល្អ និងធ្វើការបែងចែករវាងបង្គន់ប្រុស និងស្រី ដោយមានដាក់សាប៊ូលេងដៃ ។ ត្រូវចាត់ឲ្យមានបុគ្គលិកប្រចាំការដើម្បីលាងសម្អាតជាប្រចាំ ។
៣-បញ្ហាអនាម័យនៅតុអាហារ ៖ ត្រូវក្រាលកម្រាលតុអាហារ និងត្រូវផ្លាស់ប្តូរកម្រាលឲ្យបានញឹកញាប់ ជៀសវាងប្រើកម្រាលប្រឡាក់ ឬមានក្លិនមិនល្អ ជាដើម ។ ត្រូវមានធុងសំរាមដាក់តាមតុនីមួយៗ និងត្រូវលាងសម្អាតរាល់ថ្ងៃ ។ មិនត្រូវលើកទឹកចិត្តផ្ដល់ក្រដាសជូតមាត់ជូនភ្ញៀវឡើយ ដោយត្រូវផ្ដល់នូវកន្សែងជំនួសវិញ ៕
ចែករំលែកព័តមាននេះ