រាជធានីភ្នំពេញ ៖ ការមកដល់នៃផ្សារទំនើបល្បីៗរបស់បរទេសនៅកម្ពុជា កំពុងតែធ្វើឱ្យផ្សារទំនើបក្នុងស្រុកធំៗដែលធ្លាប់តែទទួលបានការគាំទ្រ និងទាក់ទាញអតិថិជនឈរលំដាប់កំពូលនៅក្នុងប្រទេស បាត់បង់ប្រជាប្រិយភាពពីមួយឆ្នាំទៅមួយឆ្នាំ ។ ទោះបីយ៉ាងណា ដើម្បីទប់ទល់នឹងការប្រកួតប្រជែងនេះ ផ្សារទំនើបក្នុងស្រុកក៏បានរិះរកវិធីសាស្ត្រ…
រាជធានីភ្នំពេញ ៖ ការមកដល់នៃផ្សារទំនើបល្បីៗរបស់បរទេសនៅកម្ពុជា កំពុងតែធ្វើឱ្យផ្សារទំនើបក្នុងស្រុកធំៗដែលធ្លាប់តែទទួលបានការគាំទ្រ និងទាក់ទាញអតិថិជនឈរលំដាប់កំពូលនៅក្នុងប្រទេស បាត់បង់ប្រជាប្រិយភាពពីមួយឆ្នាំទៅមួយឆ្នាំ ។ ទោះបីយ៉ាងណា ដើម្បីទប់ទល់នឹងការប្រកួតប្រជែងនេះ ផ្សារទំនើបក្នុងស្រុកក៏បានរិះរកវិធីសាស្ត្រ ថ្មីៗ និងកែលម្អឡើងវិញ បើទោះបីមិនបានភ្ញៀវត្រឡប់មកវិញទាំងមូលក៏ដោយ ។
អ្នកឧកញ៉ា ពុង ឃាវសែ ប្រធានក្រុមប្រឹក្សាភិបាលក្រុមហ៊ុនសបភីង សេនធ័រ សូរិយា បានឲ្យដឹងថា មុនដំបូង ផ្សារសូរិយាត្រូវរចនា និងរៀបចំជាលក្ខណៈបែបខ្មែរ កាលនោះមិនទាន់មានផ្សារទំនើបធំៗចូលមកទេ តែក្រោយពេលមានវត្តមានផ្សារទំនើបអុីអនចូលមកវិនិយោគនៅក្នុងប្រទេសកម្ពុជា បានធ្វើឲ្យផ្សារសូរិយាបាត់ភ្ញៀវអស់ជាច្រើន ។
អ្នកឧកញ៉ាមានប្រសាសន៍ថា ៖« ដោយសារតែមើលឃើញពីការបាត់បង់ភ្ញៀវបន្តិចម្ដងៗ ទើបយើងបានអញ្ជើញអ្នកជំនាញផ្នែករចនា មកគូសប្លង់រចនាផ្សារឡើងវិញ ដើម្បីបង្កើតភាពទាក់ទាញយកភ្ញៀវដែលយើងបាត់បង់នោះត្រឡប់មកវិញ » ។
អ្នកឧកញ៉ាបន្តថា ក្នុងការរចនា និងកែលម្អឡើងវិញនូវផ្សារសូរិយា ក្រុមហ៊ុនបានចំណាយទឹកប្រាក់បន្ថែមប្រមាណ៥លានដុល្លារអាមេរិក ពីព្រោះបែបបទនៃទីផ្សារ និងការរីកចម្រើនមិនអាចឲ្យនៅដដែលៗបានទេ ។
លោកស្រី ជា សុខហៀក នាយិកាប្រតិបត្តិ ក្រុមហ៊ុនសូរិយា សេនធ័រ ភ័នធ៍ បានឲ្យដឹងថា ការកែលម្អផ្សារទំនើបសូរិយាថ្មី ត្រូវបានកាត់បន្ថយបរិមាណតូបជាងពាក់កណ្ដាល ដោយមិនមានតូបច្រើនដូចកាលពីមុនទេ ។ លោកស្រីថា ៖« នេះជាយុទ្ធសាស្ត្រមួយសម្រាប់យើងក្នុងការទាក់ទាញទេសចរណ៍ខ្មែរ និងបរទេស ព្រោះកាលពីមុន តូបយើងរចនាឡើងមានទំហំតូចៗ តែពេលនេះ យើងបានរចនាធំជាងមុន ហើយយើងក៏បានអនុញ្ញាតឲ្យផលិតផលខ្មែរចូលដាក់តាំងលក់ជាច្រើនប្រភេទ និងច្រើនមុខផងដែរ។ ជាក់ស្ដែង នៅជាន់ទី៤នៃផ្សាររបស់យើង មានផលិតផលខ្មែរស្ទើរតែ១០០%ទៅហើយ»។
លោកស្រីបន្តថា ការកាត់បន្ថយចំនួនតូបនៅក្នុងផ្សារទំនើប គឺជាយុទ្ធសាស្ត្រមួយសម្រាប់ផ្សារទំនើបដែលទើបកែលម្អថ្មីនេះ ពីព្រោះបើរចនាឱ្យមានតូបច្រើនដូចកាលពីមុន គឺគ្មានកន្លែងសម្រាប់ភ្ញៀវដើរ ហើយភ្ញៀវក៏មានអារម្មណ៍ថា តូចចង្អៀត ។ ម្យ៉ាងការបន្ថយចំនួនតូបឱ្យនៅតិចនេះ ក៏ដើម្បីពង្រីកតូបនីមួយៗឱ្យធំជាងមុនផងដែរ ។ លោកស្រីនិយាយថា ៖«ក្រៅពីផ្សារទំនើបសូរិយា យើងក៏មានគម្រោងកែលម្អផ្សារទំនើបសុវណ្ណាផងដែរ ព្រោះដើម្បីឱ្យដើរទាន់សម័យទំនើប និងការពេញនិយមរបស់ប្រជាពលរដ្ឋ » ។
លោក សូ ម៉ារ៉ា រដ្ឋលេខាធិការក្រសួងទេសចរណ៍ បានមានប្រសាសន៍ថា ការកែលម្អផ្សារទំនើបមួយនេះ គឺជាការផ្ដល់នូវកញ្ចប់ទេសចរណ៍បន្ថែមដល់ភ្ញៀវទេសចរជាតិ និងបរទេស ដែលទស្សនានៅក្នុងរាជធានីភ្នំពេញ ។ លោកនិយាយថា ៖« បច្ចុប្បន្ននេះ ដោយសារតែស្ថានភាពសេដ្ឋកិច្ច និងប្រាក់ចំណូលរបស់ពលរដ្ឋកម្ពុជាកាន់តែកើនឡើង កំណើនផ្សារទំនើប ផ្សារម៉ាត និងផ្សារលក្ខណៈខ្នាតតូចជាច្រើនទៀត បានបង្ហាញវត្តមាននៅក្នុងព្រះរាជាណាចក្រកម្ពុជា ជាពិសេសរាជធានីភ្នំពេញ » ។
លោកជំទាវ តឹក រ៉េតកំរង រដ្ឋលេខាធិការក្រសួងពាណិជ្ជកម្ម បានឲ្យដឹងផងដែរថា ការកែលម្អផ្សារទំនើបបែបចាស់ៗមកជាផ្សារទំនើបទាន់សម័យ គឺជាការទាក់ទាញភ្ញៀវទេសចរផង និងទាក់ទាញវិនិយោគិនមកបណ្ដាក់ទុននៅក្នុងប្រទេសកម្ពុជាផង ។ ក្រៅពីនេះ វាក៏បានផ្ដល់អត្ថប្រយោជន៍ និងការងារបន្ថែមដល់ប្រជាពលរដ្ឋក្នុងស្រុកបានច្រើនផងដែរ ។ បើសិនជាផ្សារទំនើបនោះមិនបានកែប្រែ និងរក្សាទុកសភាពដើមដដែល វាមិនត្រឹមតែបាត់ភ្ញៀវទេ តែវាក៏បានបាត់បង់ឱកាសការងារសម្រាប់ពលរដ្ឋផងដែរ ៕
ចែករំលែកព័តមាននេះ