រាជធានីភ្នំពេញ ៖ បុណ្យគ្រីស្ទស្មាស់ ឬបុណ្យណូអែល បានមកដល់ទៀតហើយ ។ នៅអំឡុងខែធ្នូ ជារៀងរាល់ឆ្នាំ គេសង្កេតឃើញមានការរៀបចំតាំងដើមគ្រីស្ទស្មាស់តូចធំយ៉ាងស្រស់ស្អាតនៅមុខសណ្ឋាគារ ក្រុមហ៊ុន…
រាជធានីភ្នំពេញ ៖ បុណ្យគ្រីស្ទស្មាស់ ឬបុណ្យណូអែល បានមកដល់ទៀតហើយ ។ នៅអំឡុងខែធ្នូ ជារៀងរាល់ឆ្នាំ គេសង្កេតឃើញមានការរៀបចំតាំងដើមគ្រីស្ទស្មាស់តូចធំយ៉ាងស្រស់ស្អាតនៅមុខសណ្ឋាគារ ក្រុមហ៊ុន ផ្សារទំនើប បណ្ណាគារ និងហាងលក់ទំនិញនានា រួមជាមួយនឹងកាដូជាច្រើន ។
ពិធីបុណ្យប្រពៃណីលោកខាងលិចនេះ បានក្លាយជាបុណ្យពេញនិយមមួយដែរនៅក្នុងប្រទេសកម្ពុជានាពេលបច្ចុប្បន្ននេះ មិនថាតែអ្នកកាន់សាសនាគ្រីស្ទនោះទេដែលប្រារព្ធពិធីបុណ្យនេះ យុវវ័យភាគច្រើនដែលជាពុទ្ធសាសនិកក៏នាំគ្នាអបអរសាទរបុណ្យនេះផងដែរ ។ រីឯនៅតាមសាលាអន្តរជាតិមួយចំនួនទៀតវិញ ក៏មានប្រារព្ធពិធីបុណ្យនេះ ដោយឱ្យកូនសិស្សពាក់មួកដូចតាណូអែល ព្រមទាំងលេងចាប់កាដូជាដើម ។
ដោយសារតែពិធីបុណ្យនេះមានប្រជាប្រិយភាពនៅក្នុងសង្គមកម្ពុជា ទើបកន្លែងមួយចំនួន បានយកឱកាសនេះជាការប្រូម៉ូសិន ដោយដាក់តាំងដើមគ្រីស្ទស្មាស់ និងហាងខ្លះមានចាក់បទចម្រៀងដើម្បីទាក់ទាញភ្ញៀវ និងលក់បញ្ចុះតម្លៃទៀតផង ។
ភាពស្រស់ស្អាតនៃដើមគ្រីស្ទស្មាស់ ជាពិសេសនៅពេលរាត្រីដែលរំលេចនូវភ្លើងពណ៌ជាច្រើនបានធ្វើឱ្យហាង ឬអគារនោះកាន់តែទទួលបានការចាប់អារម្មណ៍ពីអតិថិជន ។ ដើមគ្រីស្ទស្មាស់ត្រូវបានគេរចនាស្រដៀងៗគ្នា និងមានទំហំតូចធំ អាស្រ័យតាមការចំណាយរបស់ម្ចាស់ហាង និងស្ថានភាពទីតាំង ។
មានកម្ពស់ប្រហែលជាង២ម៉ែត្រ ដើមគ្រីស្ទស្មាស់១ដើមមានពណ៌បៃតង និងមានអក្សរខ្សែភ្លើងពណ៌ដាក់រាយពីលើ បានឈរយ៉ាងស្រស់ស្អាត អមដោយកាដូតូចធំចម្រុះពណ៌នៅគល់ ត្រូវម្ចាស់ផ្សារទំនើបសិនត្រល ដាក់តាំងដើម្បីទាក់ទាញចំណាប់អារម្មណ៍អតិថិជន ។ អតិថិជនដែលបានមកទិញសម្ភារមិនភ្លេចចាប់អារម្មណ៍មុនគេពេលចូលមកដល់ ហើយងាកទៅមើលដើមគ្រីស្ទស្មាស់នេះ ជាពិសេសកូនក្មេង ខណៈអ្នកខ្លះថែមទាំងថតរូបដើម្បីបង្ហោះក្នុងបណ្តាញសង្គមទៀតផង ។
បុគ្គលិកផ្នែកគិតលុយនៅផ្សារទំនើបសិនត្រល កញ្ញា កណ្ណិកា ដែលកំពុងឈរគិតលុយឱ្យភ្ញៀវបានឱ្យដឹងថា ម្ចាស់ផ្សារទំនើបនេះបានទិញដើមគ្រីស្ទស្មាស់មកដាក់តាំងពីចុងខែវិច្ឆិកា ។ ជារៀងរាល់ឆ្នាំ ម្ចាស់ផ្សារតែងតែតុបតែងវា ដើម្បីដាក់តាំងលម្អ និងទាក់ទាញអតិថិជន ។
កញ្ញាសម្បុរស វ័យ២៦ឆ្នាំរូបនេះ បានប្រាប់ថា ៖« វាដល់រដូវគ្រីស្ទស្មាស់ ជាធម្មតា គេតុបតែងហើយ ។ វាជាទម្លាប់របស់ផ្សារ ហើយកាដូនេះដាក់ដើម្បីគួបផ្សំជាមួយដើមណូអែល ព្រោះអីបុណ្យនេះមានការចាប់កាដូ » ។
បើទោះជាវាចំណាយលុយទៅលើដើមគ្រីស្ទស្មាស់ និងកាដូបន្តិចមែន តែនារីគិតលុយវ័យក្មេងវ័យរូបនេះបានឱ្យដឹងថា វាបានជួយទាក់ទាញអតិថិជនឱ្យមកទិញទំនិញបានគ្រាន់ជាងមុនផងដែរ ។
កញ្ញា កណ្ណិកា បានប្រាប់បន្ថែមថា ៖« វាអាចទាក់ទាញអតិថិជនបានខ្លះ ព្រោះអីភ្ញៀវមកគាត់ឃើញអីចឹង គាត់ចាប់អារម្មណ៍ដែរ ឃើញយើងតុបតែងស្អាត ហើយជួនកាល គាត់យកកូនមកថតរូបទុកជាអនុស្សាវរីយ៍ទៀតផង » ។
នៅរៀងរាល់ដើមខែធ្នូ ពិធីបុណ្យណូអែល ឬបុណ្យគ្រីស្ទស្មាស់ ត្រូវបានប្រទេសជាច្រើនក្នុងពិភពលោក ចាប់ផ្ដើមប្រារព្ធជាបន្តបន្ទាប់ ដើម្បីអបអរសាទរថ្ងៃកំណើតព្រះយេស៊ូវគ្រីស្ទ និងយកឱកាសជូនពរ និងជូនកាដូអនុស្សាវរីយ៍ឲ្យគ្នាទៅវិញទៅមក ។ រីឯនៅកម្ពុជាវិញ ក្រៅពីនៅព្រះវិហាររបស់គ្រីស្ទសាសនា នៅតាមសាលា ឬកន្លែងមួយចំនួន គេនាំគ្នាប្រារព្ធយ៉ាងសប្បាយរីករាយ ហើយវាក៏ជាពេលដែលមានប្រម៉ូសិនលក់ទំនិញផងដែរ ។
ដោយឡែក នៅក្នុងសណ្ឋាគារមួយក្នុងរាជធានីភ្នំពេញ ហាក់កំពុងទទួលបានការចាប់អារម្មណ៍យ៉ាងខ្លាំងពីភ្ញៀវដែលបានមកទទួលទានអាហារ និងភ្ញៀវបរទេសមកជួលបន្ទប់ស្នាក់នៅ ដោយមានទាំងអ្នកឈរឱ្យគេថត និងអ្នកស៊ែលហ្វ៊ី (Selfie) ផងដែរ ។
អ្នកទទួលភ្ញៀវនៅសណ្ឋាគារនេះ បានឱ្យដឹងថា សណ្ឋាគារហ្គ្រីនផាលេស បានដាក់តាំងដើមគ្រីស្ទស្មាស់នេះតាំងពីដើមខែធ្នូ ដើម្បីទាក់ទាញចំណាប់អារម្មណ៍ភ្ញៀវ ខណៈដែលសណ្ឋាគារនេះ ភាគច្រើនសុទ្ធតែជាភ្ញៀវបរទេស ។
អ្នកទទួលភ្ញៀវវ័យជាង២០ឆ្នាំរូបនេះ និយាយថា ៖« ខ្ញុំសង្កេតឃើញភាគច្រើនភ្ញៀវចូលចិត្ត ព្រោះអីជិតដល់ថ្ងៃអីចឹង ភាគច្រើនគាត់មកថតស៊ែលហ្វ៊ីជាមួយគ្នីគ្នាគាត់ជាហូរហែ»។
កំពុងឈរថតរូបជាមួយមិត្តភក្តិ២-៣នាក់ យុវតីទាំង៣មើលទៅ ពួកគេហាក់ចាប់អារម្មណ៍នឹងដើមគ្រីស្ទស្មាស់នេះ ។
កញ្ញា ឌីណា យុវតីម្នាក់ក្នុងចំណោមអ្នកទាំង៣ បាននិយាយទាំងសើចតិចៗថា ៖« ឃើញវាស្អាត ក៏នាំមិត្តភក្តិថតលេងទៅ ទុកមើល ហើយអាចនឹងយកទៅផុសលេងនៅលើហ្វេសប៊ុក » ៕
ចែករំលែកព័តមាននេះ