ខេត្តកំពង់ឆ្នាំង ៖ ឪពុកម្តាយរបស់យុវជនម្នាក់ ដែលត្រូវបានតុលាការឃុំខ្លួន ក្នុងករណីគ្រោះថ្នាក់ចរាចរណ៍ផ្លូវទឹក បានអំពាវនាវដល់ស្ថាប័នតុលាការ សូមមេត្តាបើកការស៊ើបអង្កេតជាថ្មី ដើម្បីភាពយុត្តិធម៌ដល់កូនរបស់គាត់ផង ព្រោះថា កូនគាត់មិនបានខុសទេ។ ជាមួយគ្នានេះប្រជាពលរដ្ឋ និងអាជ្ញធរភូមិឃុំ បានចេញលិខិតបញ្ជាក់ថា យុវជនដែលត្រូវបានឃុំខ្លួន គឺមិនមានកំហុសនោះឡើយ។ នៅព្រឹកថ្ងៃទី២៤ ខែធ្នូ ឆ្នាំ២០១៧ បុរសឈ្មោះ វ៉ាង វង អាយុ៤៩ឆ្នាំ និងប្រពន្ធឈ្មោះ នូ ឆេងអាន អាយុ៤៨ឆ្នាំ មានកូនក្នុងបន្ទុក៩នាក់ ជាជនក្រីក្រ ប្រកបរបរអារឧសលក់ រស់នៅភូមិស្ទឹងសណ្តែក ឃុំកំពង់ហៅ ស្រុកកំពង់លែង ដែលត្រូវជាឪពុកម្តាយជនជាប់ចោទឈ្មោះ វ៉ន វណ្ណា អាយុ២២ឆ្នាំ ដែលត្រូវបានតុលាការឃុំខ្លួនកាលពីពេលថ្មីៗនេះ បានរៀបនៅដំណើររឿងគ្រោះថ្នាក់ចរាចរណ៍ផ្លូវទឹក កាលពីយប់ថ្ងៃទី១៧ ខែធ្នូ ឆ្នាំ២០១៧ ព្រមទាំងបានបង្ហាញញត្តិគាំទ្រពីប្រជាពលរដ្ឋផ្តិតមេដៃជាង១០០នាក់ អមដោយរបាយការណ៍របស់អាជ្ញាធរភូមិឃុំ ដែលមានខ្លឹមសារថា នៅយប់កើតហេតុ កូនរបស់គាត់ វ៉ន វណ្ណា បានបើកកាណូតឈើមួយគ្រឿងត្រឡប់ពីលក់ឧសវិញ ដោយបើកអែបខាងស្តាំដៃរហូត ។ លុះមកដល់ចំណុចកើតហេតុជិតខ្ទមអ្នកតាចុងព្រែកដីឌុល ស្រាប់តែមានកាណូត មានបាឡាស្មាច់មួយគ្រឿង បំពាក់ម៉ាស៊ីនរថយន្តឆ្លាម ជាកាណូតរត់ដដឹកភ្ញៀវចំនួន៤នាក់ទៅកំពង់ឆ្នាំង បើកបរដោយឈ្មោះ ខេង អេង អាយុជាង៣០ឆ្នាំ មានទីលំនៅភូមិត្អួលរលំ ឃុំកំពង់ហៅ បានបើកមកពីមុខក្នុងទិសដៅបញ្ច្រាសគ្នា ហើយបានបុកកាណូតកូនរបស់ពួកគាត់ដែលកំពុងបើកនៅខាងស្តាំដៃ ពេញមួយទំហឹងតែម្តង បណ្តាលឲ្យ បាក់ក្បាលកាណូតរៀងខ្លួន ហើយកូនប្រុសគាត់ពីរនាក់បានធ្លាក់ទឹក។
ដោយឡែកភាគីម្ខាងទៀត ឈ្មោះ ខេង អេង ត្រូវបានក្បាលកាណូតឈើបុកផ្ទប់នឹងម៉ាស៊ីនបាឡាខ្លួនឯង បណ្តាលឲ្យរងរបួសធ្ងន់ និងបានស្លាប់ពេលដឹកទៅសង្គ្រោះនៅក្នុងមន្ទីពេទ្យខេត្ត។ ក្រោយពេលកើតហេតុកូនរបស់ពួកគាត់ មិនបានរត់ទៅណាទេ ព្រោះយល់ថាកាណូតរបស់ខ្លួនមិនបានខុសនោះទេ គឺកាណូតបាឡាស្មាច់ជាអ្នកបង្កមកបុកកាណូតរបស់ខ្លួន ដែលបើកនៅខាងស្តាំ។ បន្ទាប់មកត្រូវបាននគរបាលប៉ុស្តិ៍ និងនគរបាលស្រុកកំពង់លែង ហៅទៅសាកសួរធ្វើកំណត់ហេតុបញ្ជូនទៅតុលាការ ហើយនៅព្រឹកថ្ងៃទី២០ ត្រូវបានតុលាការឃុំខ្លួនក្នុងពន្ធនាគាដោយចោទកូនខ្ញុំពីបទធ្វើមនុស្សឃាតដោយអចេតនាយ៉ាងអយុត្តិធម៌ទៅវិញ។ ជាមួយគ្នានេះដែរ ឪពុកម្តាយ ជនបង្កហេតុឈ្មោះ ខេង អេង បានប្តឹងទៅតុលាការទាមទារសំណងចំនួន១៦លាន រៀលថែមទៀត ពិតជារឿងអយុត្តិធម៌ខ្លាំងណាស់។ ហេតុនេះហើយ ពួកគាត់ជាឪពុកម្តាយ និងប្រជាពលរដ្ឋ សូមសំណូមពរដល់តុលាការមេត្តាដោះលែងកូនប្រុសគាត់ និងសូមបើកការស៊ើបអង្កេតជាថ្មី ដើម្បីផ្តល់ភាពយុត្តិធម៌ឲ្យកូនប្រុសគាត់ផង និងសូមអំពាវនាវដល់ឯកឧត្តម អភិបាលខេត្ត ជាពិសេសសូមប្រមុខរាជរដ្ឋាភិបាលសូមមេត្តាជួយពួកគាត់ផង។
ជាមួយគ្នានេះបើតាមសាក្សីម្នាក់ឈ្មោះ នូ ហ៊ីន ជាអ្នករបួសធ្ងន់ដែលបានជិះនៅលើបាឡាស្មាច់បង្កហេតុបានឲ្យដឹងថា៖ នៅយប់កើតហេតុរូបគេ និងអ្នកដំណើរ៤នាក់ទៀត បាជិះកាណូតបាឡាស្មាច់របស់ឈ្មោះ ខេង អេង ដែលជាកាណូតរត់ដ ដោយជិះ ពីស្រុកកំពង់លែងទៅក្រុងកំពង់ឆ្នាំង ហើយកាណូតដែលគាត់ជិះនោះ ពិតជាបើកល្បឿនលឿន និងបានបើកនៅផ្នែកខាងឆ្វេងដៃទៅបុកកាណូតឈ្មោះ វ៉ន វណ្ណា នៅខាងពិតប្រាកដមែន។ សាក្សីរូបនោះបានបញ្ជាក់ថា គាត់មិនហ៊ានថាខាងណាខុសខាងណាត្រូវនោះទេ តែតាមដែលគាត់ដឹងគឺកាណូតបាឡាស្មាច់ដែលគាត់ជិះពិតជាទៅបុកកាណូតឈើគេនៅខាងឆ្វេងដៃរបស់ខ្លួនពិតមែន។ សូមបញ្ជាក់ដែរថា លោក ស៊ឹម នូឈិត មេភូមិស្ទឹងសណ្តែក និងអ្នកស្រី គុយ ចន្នី មេឃុំកំពង់ហៅ បានធ្វើរបាការណ៍មួយ ចុះថ្ងៃទី២២ ខែធ្នូ ឆ្នាំ២០១៧ ផ្ញើជូនលោកព្រះរាជអាជ្ញាអមតុលាការខេត្តកំពង់ឆ្នាំង ដោយបានបញ្ជាក់ថា៖ ក្នុងពេលកើតហេតុឈ្មោះ វ៉ន វណ្ណា (ជនជាប់ចោទកំពុងជាប់ឃុំ) ពិតជាបានបើកកាណូតអែបកៀនខាងស្តាំដៃរបស់ខ្លួន ចំណែកឈ្មោះ ខេង អេង ដែលរងគ្រោះដល់ស្លាប់នោះ ពិតជាបើកកាណូតរំលោភទៅបុកគេនៅខាងឆ្វេងដៃរបស់ខ្លួនពិតមែន។ ហេតុនេះស្នើសុំតុលាការជួយរកយុត្តិធម៌ឲ្យចុងចោទ និងដើមចោទ ដោយក្តីអនុគ្រោះផងចុះ។ ក្នុងករណីនេះ សមត្ថកិច្ចនគរបាលស្រុកកំពង់លែង និងមន្ត្រីនគរបាលការិយាល័យចរាចរណ៍ផ្លូវទឹក មិនឆ្លើយបំភ្លឺទេ ដោយហេតុផលថ្ងៃអាទិត្យ មិនចាំសំណុំរឿង។ តែយ៉ាងនេះក្តីសមត្ថកិច្ចនគរបាលដែលធ្វើការងារនេះបានលួចខ្សឹបប្រាប់ថា កាណូតបាឡាស្មាច់ពិតជាទៅបុកកាណូតឈើនៅខាងឆ្វេងដៃរបស់ខ្លួនបណ្តាលឲ្យស្លាប់ខ្លួនឯងមែន៕
ចែករំលែកព័តមាននេះ