រាជធានីភ្នំពេញ ៖ មន្ត្រីជាន់ខ្ពស់នៃក្រសួងរៀបចំដែនដី នគរូបនីយកម្ម និងសំណង់បានអះអាងថា ក្នុង១ឆ្នាំ ពលរដ្ឋកម្ពុជាមានតម្រូវការលំនៅឋាន៥ម៉ឺនខ្នងជាមធ្យមដើម្បីរស់នៅ ស្របនឹងកំណើនវិស័យអចលនទ្រព្យ ។
លោក ប៉ែន សុផល រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ លើក ឡើងក្នុងពិធីសម្ពោធបើកគម្រោងសាងសង់បុរីមួយនាព្រឹកថ្ងៃទី១៩ ធ្នូ ថា តាមការសិក្សារបស់ក្រសួងអំពីក្របខ័ណ្ឌយុទ្ធសាស្ត្រអភិវឌ្ឍន៍ទីក្រុងនៅកម្ពុជាឃើញថា ចំនួនពលរដ្ឋរស់នៅក្នុងរាជធានី និងទីប្រជុំជននៅឆ្នាំ២០១៤ មានប្រមាណ៤,៥លាននាក់ ស្មើ២៧,១% នឹងបន្តកើនដល់៧,៩២ លាននាក់ ស្មើ៤៤% នៅឆ្នាំ២០៣០ ។
លោកបញ្ជាក់ថា ៖« តាមទិន្នន័យនេះបង្ហាញឲ្យឃើញថា សម្រាប់រយៈពេល១៥ ឆ្នាំ (២០១៥-២០៣០) តម្រូវការលំនៅឋាន សម្រាប់តំបន់រាជធានី ក្រុង និងទីប្រជុំជនមានប្រមាណ៨០ម៉ឺនលំនៅឋាន ដែលគិតជាមធ្យម មានតម្រូវការប្រមាណ៥ម៉ឺនលំនៅឋានក្នុង១ឆ្នាំ» ។
លោកបន្តថា តម្រូវការលំនៅឋាននេះបាននិងកំពុងអនុវត្តគោលនយោបាយជាតិ ស្តីពីការរៀបចំដែនដីក្នុងការកសាងផែនការរៀបចំដែនដី ប្លង់គោល និងផែនការ ប្រើប្រាស់ដីគ្រប់កម្រិត និងគោលនយោបាយជាតិ ស្តីពីលំនៅឋានឲ្យស្របតាមតម្រូវការនៃការរីកលូតលាស់ផ្នែកនគរូបនីយកម្ម និងកំណត់តំបន់ទិសដៅយុទ្ធសាស្ត្រអភិវឌ្ឍន៍ ពង្រីកទីក្រុង តំបន់ស្នាក់នៅ ជាពិសេស លំនៅឋានមានតម្លៃសមរម្យជូនមន្ត្រីរាជការ កងកម្លាំងប្រដាប់អាវុធ និងពលរដ្ឋដែលមានប្រាក់ចំណូលមធ្យម ចំណូលទាប និងជនងាយរងគ្រោះ ដើម្បីធានាការអភិវឌ្ឍប្រកបដោយចីរភាព និងសមធម៌ ។
ជាមួយគ្នានេះ រាជរដ្ឋាភិបាលតែងតែចាត់ទុកវិស័យឯកជន គឺជាដៃគូ និងបានលើកកម្ពស់តួនាទីវិស័យឯកជនក្នុងការអភិវឌ្ឍសេដ្ឋកិច្ច និងសង្គម ។ ដោយឡែក វិស័យអចលនទ្រព្យ និងសំណង់ បានផ្តល់ការអនុគ្រោះយ៉ាងច្រើនដល់វិនិយោគិនបរទេសចំពោះសិទ្ធិលើអចលនទ្រព្យ។ វិស័យអចលនទ្រព្យបានចូលរួមសេដ្ឋកិច្ចជាតិកម្ពុជាក្នុងរង្វង់៧% នៅក្នុងឆ្នាំ២០១៧ ។
លោក YAN LILIN អគ្គនាយកក្រុម ហ៊ុនអអេហ្វ លើកឡើងថា ដោយសារឃើញកម្ពុជា គឺជាប្រទេសមួយដែលមានសក្តានុពលយ៉ាងធំធេងសម្រាប់ការអភិវឌ្ឍសេដ្ឋកិច្ចរីកចម្រើន កម្ពុជាមានប្រពៃណីល្អ ជាពិសេស មានគោលនយោបាយវិនិយោគបើកទូលាយ និងអនុគ្រោះដល់វិនិយោគិនបរទេស លោកបានបោះទុនវិនិយោគលើគម្រោងអគារសហកម្មសិទ្ធិដែលស្ថិតនៅជាប់ផ្លូវ៦០ម៉ែត្រ ក្នុងទំហំទឹកប្រាក់ប្រហែល៧០០លានដុល្លារអាមេរិក ដែលគ្របដណ្តប់លើផ្ទៃដីសរុប៧,៧ហិកតា និងមានផ្ទៃក្រឡាអគារជិត៥៦ម៉ឺនម៉ែត្រ, ប្រភេទលំនៅឋានមានទំហំចាប់ពី៥៥.១៣៤ម៉ែត្រការ៉េ និងមានបន្ទប់ចាប់ពី១ទៅ៣បន្ទប់ ដែលមានភាព សមស្របសម្រាប់ការវិនិយោគ និងរស់នៅផ្ទាល់ខ្លួន។
ការអភិវឌ្ឍគម្រោងនេះ ក៏ស្របទៅតាមចក្ខុវិស័យរបស់រាជរដ្ឋាភិបាលកម្ពុជា ក្នងការផ្ដល់លំនៅឋានដល់ប្រជាពលរដ្ឋ និងជួយលើកតម្កើងកិត្យានុភាពទីក្រុងភ្នំពេញផងដែរ។
ការរីកចម្រើនវិស័យសំណង់នេះ បានធ្វើឲ្យសហគ្រាសអាជីវកម្មក្នុងវិស័យសំណង់បានចុះបញ្ជីនៅក្រសួងរៀបចំដែនដី នគរូបនីយកម្ម និងសំណង់ និងនៅមានសុពលភាព បានកើន ដល់១.០៣៨ក្រុមហ៊ុន ក្នុងនោះក្រុមហ៊ុនសិក្សាគម្រោងប្លង់មាន៤២ និងក្រុមហ៊ុនសាងសង់ មាន៩៩៦ ហើយស្ថាបត្យករមានប្រមាណជាង២.៥០០នាក់ និងវិស្វករប្រមាណ៣ម៉ឺននាក់ ។
គួរបញ្ជាក់ថា ការដាក់ទុនវិនិយោគលើវិស័យសំណង់នៅក្នុងប្រទេសកម្ពុជា នាឆ្នាំ២០១៦ កន្លងមក មានប្រមាណ៥.៥៨០លានដុល្លារ បើធៀបនឹងឆ្នាំ២០១៥មានកំណើនប្រមាណ៦៧,១៥% និងក្នុងរយៈពេល១០ខែឆ្នាំ២០១៧ មានប្រមាណ៦.២៦៧លានដុល្លារ បើធៀបរយៈពេលដូចគ្នាឆ្នាំ២០១៦ មានកំណើនប្រមាណ២៧,៦៨% ៕
ចែករំលែកព័តមាននេះ