រាជធានីភ្នំពេញ ៖ ការសាងសង់ហេដ្ឋារចនាសម្ព័ន្ធតភ្ជាប់បណ្តាញអគ្គិសនី ឬខ្សែកាប្លិ៍នៅតាមអគារនាពេលបច្ចុប្បន្ន បានចូលរួមចំណែកផ្តល់ការងារដល់ពលរដ្ឋក្នុងស្រុក ទទួលបានប្រាក់ចំណូលសម្រាប់ផ្គត់ផ្គង់គ្រួសារ បើទោះបីការងារនេះផ្លាស់ប្តូរទីតាំងជាងផ្នែកផ្សេងៗក្តី ។ តម្លៃទីផ្សារកម្លាំងពលកម្មរបស់កម្មករកាប់ដីតបណ្តាញអគ្គិសនីនេះ គឺទទួលបានប្រាក់កម្រៃខ្ពស់ជាងកម្មករសំណង់ ដែលគ្មានជំនាញដូចគ្នា ។
បើតាមកម្មករកាប់ដីតណា្តញអគ្គិសនី ដែលបានធ្វើការងារនេះអស់រយៈពេលជាង៣០ឆ្នាំ បាននិយាយថា ទីផ្សារការងារកាប់ដីតបណ្តាញវាសម្បូរគួរសម ព្រោះមានអគារសាងសង់ថ្មីៗដែលត្រូវតភ្ជាប់បណ្តាញចូលទៅក្នុងអគារដូចជា ខ្សែភ្លើងឬខ្សែកាប្លិ៍ ដើម្បីបម្រើដល់ដំណើរការរបស់ក្រុមហ៊ុន ។
លោក ប៉ិ ពុំ កម្មករូបនេះបានបញ្ជាក់ថា ៖ « សព្វថ្ងៃនេះ ទីផ្សារតម្លៃកម្លាំងពលកម្មសម្រាប់កម្មករកាប់ដីតបណ្តាញ គឺបានប្រាក់កម្រៃពី៤ម៉ឺនទៅ៦ម៉ឺនរៀលក្នុង១ថ្ងៃទៅតាមជំនាញ ហើយប្រាក់កម្រៃដែលទទួលបាននេះ បើប្រៀបធៀបវាខ្ពស់ជាងកម្មករសំណង់ ។ លើសពីនេះ ការងារកាប់តបណ្តាញ មិនសូវមានហានិភ័យដូចកម្មករសំណង់ទេ » ។
លោកលើកឡើងថា ប្រាក់កម្រៃដែលទទួលបានពីការងារមួយនេះ ក្រៅពីការកាត់ចំណាយប្រចាំថ្ងៃ និងថ្លៃជួលផ្ទះហើយ លោកនៅសល់ល្មមគួរសម វាមិនសូវឱ្យគ្រួសារពិបាកទេ ប៉ុន្តែបើឱ្យមានជាដុំកំភួនដូចគេ វាមិនមានទេ គ្រាន់តែបានធូរជាងគ្រួសារដែលមានចំណូលតិចតួច ។
លោក ខាន់ ប៊ុនថន ក៏ជាកម្មករកាប់ដីតបណ្តាញអគ្គិសនីមួយរូបទៀតដែលទើបតែចូលធ្វើការបានប៉ុន្មានថ្ងៃ លើកឡើងថា ការងារកាប់ដីតភ្ជាប់បណ្តាញក្នុង១ថ្ងៃ គឺទទួលបានប្រាក់កម្រៃកម្លាំងពលកម្មចំនួន៤ម៉ឺនរៀល ហើយការងារនេះស្រួលក៏មិនស្រួល ពិបាកក៏មិនពិបាកដែរ បើប្រៀបធៀបនឹងការងារដែលលោកធ្លាប់ធ្វើកន្លងទៅ ។
លោក សៅ សុភាព ប្រធានការដ្ឋានសំណង់នៃក្រុមហ៊ុន MKC ធ្លាប់បានឱ្យដឹងថា ជាងធម្មតាទទួលបានប្រាក់កម្រៃ២ម៉ឺនរៀល, ជាងជំនាញ ៣ម៉ឺនទៅ៣ម៉ឺន៦ពាន់រៀល រហូតដល់៥ម៉ឺនរៀលក្នុង១ថ្ងៃ ផ្អែកទៅតាមអ្នកមានបទពិសោធន៍ការងារជាក់ស្តែង ។
ចំណែកលោក រឿន ថៃស្រេង ប្រធានការដ្ឋានសាងសង់នៃក្រុមហ៊ុន MDH ឱ្យដឹងថា សព្វថ្ងៃនេះ កម្មករគ្មានជំនាញបាននិងកំពុងធ្វើការនៅក្នុងគម្រោងរបស់លោក គឺទទួលបានប្រាក់កម្រៃ២ម៉ឺន៥ពាន់រៀល និងជាងមានជំនាញ បានចាប់ពី៤ម៉ឺនទៅ៥ម៉ឺនរៀលក្នុង១ថ្ងៃ ។
លោក ចាន់ សារំ កម្មករជាងពុម្ពបានឱ្យដឹងថា ក្នុង១ថ្ងៃ លោកអាចទទួលកម្រៃពី៣ម៉ឺន៦ពាន់ទៅ៤ម៉ឺនរៀល គិតតាមថ្ងៃថែមម៉ោង។ ជាក់ស្តែង ក្នុង១ខែក្រោយពីកាត់ការចំណាយផ្សេងៗ លោកអាចនៅសល់ប្រាក់ជាង៤០ម៉ឺនរៀលសម្រាប់ផ្គត់ផ្គង់គ្រួសារ ។
យោងតាមរបាយការណ៍ក្រសួងរៀបចំដែនដី នគរូបនីយកម្ម និងសំណង់ឆ្នាំ២០១៦បង្ហាញថា វិស័យសំណង់បានបង្កើតការងារជាច្រើនប្រភេទដល់ពលរដ្ឋ គិតជាមធ្យមប្រមាណ១៩ម៉ឺនទៅ២០ម៉ឺននាក់ក្នុង១ថ្ងៃ ក្នុងនោះរាជធានីភ្នំពេញ មានកម្មករប្រមាណ១៤ម៉ឺន ទៅ១៥ម៉ឺននាក់ក្នុង១ថ្ងៃ ។ កម្លាំងពលកម្មអាចប្រែប្រួលទៅតាមទំហំការងារជាក់ស្តែងនៅតាមការដ្ឋានសំណង់ បើធៀបនឹងឆ្នាំ២០១៥ បរិមាណកម្លាំងពលកម្មកើនឡើង៣៣,៣៣% ។
របាយការណ៍ដដែលបញ្ជាក់ថា ៖« តាមរយៈការស្រាវជ្រាវ តម្លៃពលកម្មសម្រាប់កម្មករគ្មានជំនាញ ក្នុង១ខែទទួលបាន១២០ទៅ២០០ដុល្លារ, កម្មករមានជំនាញ និងមេជាង ក្នុង១ខែទទួលបាន៣០០ទៅ៤៥០ដុល្លារ និងវិស្វករ ស្ថាបត្យករ និងអ្នកជំនាញផ្សេងទៀត ក្នុង១ខែទទួលបានចាប់ពី៣៤០ទៅ២.៥០០ដុល្លារ » ៕
ចែករំលែកព័តមាននេះ