ប៉េកាំង ៖ ថ្នាក់ដឹកនាំស្ថាប័នសារព័ត៌មាននាំមុខមកពីប្រទេសមួយចំនួនបានជួបជុំគ្នានៅទីក្រុងប៉េកាំង ប្រទេសចិន សម្រាប់កិច្ចប្រជុំកំពូលស្តីពីកិច្ចសហប្រតិបត្តិការ ឡាងឆាង-មេគង្គ ដើម្បីជម្រុញប្រព័ន្ធផ្សព្វផ្សាយបង្កើនការផ្សាយនូវព័ត៌មាននានា ដើម្បីជាប្រយោជន៍ដល់ប្រជាជនដែលរស់នៅទន្លេមេគង្គលើ និងទន្លេមេគង្គក្រោម។ លោក…
ប៉េកាំង ៖ ថ្នាក់ដឹកនាំស្ថាប័នសារព័ត៌មាននាំមុខមកពីប្រទេសមួយចំនួនបានជួបជុំគ្នានៅទីក្រុងប៉េកាំង ប្រទេសចិន សម្រាប់កិច្ចប្រជុំកំពូលស្តីពីកិច្ចសហប្រតិបត្តិការ ឡាងឆាង-មេគង្គ ដើម្បីជម្រុញប្រព័ន្ធផ្សព្វផ្សាយបង្កើនការផ្សាយនូវព័ត៌មាននានា ដើម្បីជាប្រយោជន៍ដល់ប្រជាជនដែលរស់នៅទន្លេមេគង្គលើ និងទន្លេមេគង្គក្រោម។
លោក Yang Zhenwu អគ្គនាយកសារព័ត៌មាន People Daily ដែលជាស្ថាប័នសារព័ត៌មាននាំមុខគេនៅប្រទេសចិន និងមានភាពល្បីល្បាយសម្រាប់ការផ្សាយអត្ថបទនយោបាយរបស់បក្សកម្មុនីសចិនបានថ្លែងនៅកិច្ចប្រជុំកំពូលស្តីពីកិច្ចសហប្រតិបត្តិការ ឡាងឆាង-មេគង្គ (Lancang-Mekong Cooperation Media Submit) កាលពីថ្ងៃទី ២០ ខែធ្នូ ឆ្នាំ២០១៧ថា នេះគឺជាការបើកទំព័រសករាជថ្មី សម្រាប់កិច្ចសហប្រតិបត្តិការសារព័ត៌មានសម្រាប់ប្រទេសចិនជាមួយប្រទេសអនុតំបន់ទាំង៥ ដែលមានប្រទេសកម្ពុជា ឡាវ មីយ៉ាន់ម៉ា ថៃ និងវៀតណាម ។
លោក Yang Zhenwu បានបន្តថា៖ «កិច្ចសហប្រតិបត្តិការឡាងឆាង-មេគង្គ គឺជាយន្តការសហប្រតិបត្តិការខ្ពស់ និងជាយន្តការឈ្នះ-ឈ្នះសម្រាប់ប្រជាជនប្រទេសទាំង ៦ » ក្រោមប្រធានបទ «សហគមន៍តែមួយ រួមវាសនាតែមួយ នៃទន្លេឡាងឆាង-មេគង្គ» ។ ដូច្នេះសារព័ត៌មានត្រូវធ្វើជាស្ពានតភ្ជាប់វប្បធម៌ និងជីវភាពប្រជាជន ដើម្បីបំពេញកាតព្វកិច្ចពង្រឹង និងពង្រីកទំនាក់ទំនងចំណងមិត្តភាពរបស់ប្រជាជន»។
អគ្គនាយកសារព័ត៌មាន People Daily បានបន្ថែមថា សម្រាប់កិច្ចសហប្រតិបត្តិការសារព័ត៌មានសម្រាប់ប្រទេសទាំង ៦ គឺមានសារសំខាន់បំផុត ព្រោះស្ថាប័នសារព័ត៌មាន មានភារកិច្ច និងដើរតួនាទីជាស្ពានសម្រាប់កិច្ចសហប្រតិបត្តិការ LMC នេះ។
លោក Yang Zhenwu បញ្ជាក់ថា៖ សារព័ត៌មាន គឺដើរតួនាទីជាម៉ាស៊ីន និងជាប្រភពព័ត៌មានដ៏មានឥទ្ធិពល ដើម្បីពង្រីក និងពង្រឹងទំនាក់ទំនងរវាងប្រទេសទាំង ៦ ឲ្យកាន់តែទូលំទូលាយសម្រាប់ប្រជាជន និងប្រជាជន សហគ្រាស និងប្រជាជន លុបបំបាត់ការរំខាននានាៗ ដែលធ្វើឲ្យប្រជាជននៃប្រទេសទាំង៦យល់ច្រឡំ ជាពិសេសសារព័ត៌មានជាង៥០ស្ថាប័ន ដែលមានវត្តមាននៅកិច្ចប្រជុំកំពូល LMC Media Submit ត្រូវ «រាយការណ៍នូវព័ត៌មានត្រឹមត្រូវ និងយុត្តិធម៌ ផ្សព្វផ្សាយរឿងទៅកាន់ពិភពលោក»។
លោកស្រី ថុង សុវណ្ណរង្ស៊ី អគ្គនាយករងនៃសារព័ត៌មានកោះសន្តិភាពទទួលស្គាល់ថាសារព័ត៌មានពិតជាមានតួនាទីសំខាន់ និងជាស្ពានសម្រាប់ផ្តល់ព័ត៌មានពីថ្នាក់លើទៅកាន់ប្រជាជននៃប្រទេសទាំង៦។
លោកស្រី ថុង សុវណ្ណរង្ស៊ី បានថ្លែងនៅចំពោះមុខអ្នកសារព័ត៌មានប្រមាណជិត ១០០នាក់ពីប្រទេសទាំង ៦ ថា៖ «កិច្ចប្រជុំកំពូលឡាងឆាង-មេគង្គ មិនត្រឹមតែដើរតួនាទីជាស្ពានសម្រាប់កិច្ចសហប្រតិបត្តិការសារព័ត៌មាននៃប្រទេសអនុតំបន់ មកពីកម្ពុជា ចិន ឡាវ មីយ៉ាន់ម៉ា ថៃ និងវៀតណាមនោះទេ តែវាក៏បានលើកតម្កើងនូវកិច្ចសហប្រតិបត្តិការផ្នែកនយោបាយ សេដ្ឋកិច្ច និងវប្បធម៌ សម្រាប់ជាប្រយោជន៍របស់ប្រជាជននៃប្រទេសទាំង ៦»។
លោកស្រីបន្តថា កិច្ចសហប្រតិប្តិការសារព័ត៌មានល្អ គឺមានន័យថា ការរាយការណ៍ព័ត៌មានឆ្លងព្រំដែននៃប្រទេសទាំង ៦ គឺកាន់តែល្អប្រសើរផងដែរ។
សូមបញ្ជាក់ថា កិច្ចប្រជុំកំពូល LMC ស្តីពីសហប្រតិបត្តិការសារព័ត៌មានក៏បានសម្រេចថា កិច្ចប្រជុំ LMC ឆ្នាំ២០១៨ នឹងប្រព្រឹត្តទៅនៅប្រទេសឡាវ ហើយក្រុមអ្នកសារព័ត៌មានទាំងអស់ក៏បានចុះហត្ថលេខាលើសេចក្តីថ្លែងការណ៍រួមសម្រាប់ការពង្រឹងកិច្ចសហប្រតិបត្តិការសារព័ត៌មានសម្រាប់ប្រទេសទាំង ៦៕
ចែករំលែកព័តមាននេះ