រាជធានីភ្នំពេញ ៖ អ្នកជំនាញសេដ្ឋកិច្ច និងវិនិយោគិនក្នុងវិស័យសំណង់មើលឃើញថា បញ្ហានយោបាយមិនបានប៉ះពាល់ដល់វិស័យអចលនទ្រព្យទេ ហើយគម្រោងសាងសង់ធំៗនៅតែបន្តកើនឡើងជាហូរហែ ។ ប៉ុន្តែអ្នករកស៊ីខាងផ្នែកនេះនិយាយថា ការនាំចូល និងលក់ចេញគ្រឿងសំណង់មានកំណើនតិចតួចប៉ុណ្ណោះ ។
លោក ស៊ាង ថៃ អ្នកនាំពាក្យក្រសួងពាណិជ្ជកម្ម បានប្រាប់កោះសន្តិភាពកាលពីថ្ងៃទី២២ ធ្នូ ថា ដោយមិនគិតពីការនាំចូលគ្រឿងសំណង់ផ្សេងៗ ការនាំចូលស៊ីម៉ងត៍បានកើនឡើងគួរឱ្យកត់សម្គាល់ ។
លោកបន្តថា នៅឆ្នាំ២០១៦ ការនាំចូលសរុបស្មើប្រមាណ៨៥លានដុល្លារ ប្រមាណជា១លានតោន ខណៈរយៈពេល៣ខែដើមឆ្នាំ២០១៧ ការនាំចូលស្មើប្រមាណជិត៣០លានដុល្លារ ។
ទោះជាយ៉ាងណា ក្រុមហ៊ុនលក់គ្រឿងសំណង់ និងក្រុមហ៊ុនម៉ៅការតូច និងមធ្យម លើកឡើងថា ដោយសារស្ថានភាពនយោបាយធ្វើឱ្យការសាងសង់មួយចំនួនត្រូវផ្អាកជាបណ្តោះអាសន្ន ដែលធ្វើឱ្យគម្រោងសាងសង់របស់ពួកគេថយចុះ ហើយការប្រើប្រាស់គ្រឿងសំណង់ ក៏បានថយចុះជាងមុនផងដែរ ។
លោក ស្រឿន ចេក ម្ចាស់ក្រុមហ៊ុនសាងសង់ SC Contraction ឱ្យដឹងថា រយៈពេលប៉ុន្មានខែចុងក្រោយនេះ គម្រោងសាងសង់របស់លោកបានធ្លាក់ចុះជាងមុន ។ ចំណែកការប្រើប្រាស់សម្ភារសំណង់ ក៏បានថយចុះជាងកាលពីដើមឆ្នាំផងដែរ ។ លោកបន្តថា ពីមុន ក្នុង១ខែ លោកត្រូវចំណាយលើសម្ភារសំណង់ប្រមាណ៣ម៉ឺន ទៅ៤ម៉ឺនដុល្លារ ។ ដោយឡែក នៅចុងឆ្នាំនេះ លោកចំណាយតែ១ម៉ឺនដុល្លារប៉ុណ្ណោះ ដោយសារមិនសូវមានគម្រោងច្រើនដូចមុន ។
លោកបន្តថា ៖« ខ្ញុំមើលឃើញថា ចាប់ពីខែវិច្ឆិកា ដល់ខែមេសា គម្រោងសាងសង់បានកើនឡើង ។ ដោយឡែក នៅឆ្នាំនេះ មកដល់ខែធ្នូហើយ ហាក់មិនសូវមានដូចឆ្នាំមុនទេ។ តាមខ្ញុំគិត គឺអាចមកពីស្ថានភាពនយោបាយ និងជិតបោះឆ្នោត ។ ចំពោះខ្ញុំផ្ទាល់ គឺមានគម្រោងខ្សត់ជាងមុន » ។
ចំណែកលោក ហេង សុខឆាយ ប្រធានផ្នែកគ្រប់គ្រងម៉ាកផលិតផល និងលក់ដុំនៃក្រុមហ៊ុនឃី ហួត ជាក្រុមហ៊ុនផ្គត់ផ្អង់គ្រឿងសំណង់មួយនៅកម្ពុជា ឱ្យដឹងថា បញ្ហានយោបាយ ពិតជាបានប៉ះពាល់ដល់ការលក់ដូររបស់លោក ប៉ុន្តែមិនធ្ងន់ធ្ងរប៉ុន្មានទេ ។ លោកថា បើធៀបនឹងឆ្នាំ២០១៦ នៅឆ្នាំ២០១៧នេះ ការនាំចូល និងលក់ចេញបានកើនឡើងតិចតួចប៉ុណ្ណោះ ។
លោកបញ្ជាក់ថា ការកើនឡើងតិចតួចនេះ ដោយសារគម្រោងមួយចំនួនបានបញ្ចប់ និងបញ្ហាវិបត្តិនយោបាយដែលធ្វើឱ្យគម្រោងសាងសង់ខ្លះនៅទ្រឹង ហើយខ្លះទៀតពិចារណាផ្អាកសាងសង់បណ្តោះអាសន្ន ។
លោក ហេង សុខឆាយ បន្តថា ៖«កាលពីដើមឆ្នាំ គម្រោងមួយចំនួនគាត់បញ្ចប់ការងាររបស់គាត់ ហើយដល់ពាក់កណ្តាលឆ្នាំ វាមានវិបត្តិនយោបាយបន្តិច ។ ដូចនេះ ការសាងសង់របស់ម្ចាស់អចលនទ្រព្យមួយចំនួនរាងទ្រឹង និងពិចារណា ហើយអាចធ្វើឱ្យយើងមានកំណើនតិចតួចនេះ ដោយសារគម្រោងចាស់គាត់ចង់បញ្ចប់ឱ្យបានមុនឆ្នាំ២០១៨»។
លោកបន្ថែមថា ស្ថានការណ៍នយោបាយនៅកម្ពុជា ហាក់មិនសូវប៉ះពាល់លើការវិនិយោគខាងវិស័យអចលនទ្រព្យទេ ដោយសារគម្រោងធំៗភាគច្រើនបោះទុនវិនិយោគដោយបរទេស ជាពិសេស ប្រទេសចិន គឺមានកម្រិតប៉ះពាល់តិចតួច ។
បើតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់ ចេញផ្សាយកាលពីដើមឆ្នាំ២០១៧ឱ្យដឹងថា នៅឆ្នាំ២០១៦ គម្រោងសាងសង់នៅទូទាំងប្រទេសមានចំនួនសរុប២.៦៣៦គម្រោង មានផ្ទៃក្រឡាសំណង់សរុប១៤.៦២០.២២៥ម៉ែត្រការ៉េ និងតម្លៃប៉ាន់ស្មានទុនវិនិយោគប្រមាណ៨.៥៤៣.០៥៨.៣៨៩ដុល្លារអាមេរិក បើធៀបនឹងរយៈពេលដូចគ្នាឆ្នាំ២០១៥ ស្មើ២.៣០៥គម្រោង មានផ្ទៃក្រឡាសំណង់សរុប៧.៦៨៦.១១២ម៉ែត្រការ៉េ និងតម្លៃប៉ាន់ស្មានទុនវិនិយោគប្រមាណ៣.៣៣៨.១០៧.២១៨ដុល្លារ កើនឡើង១៥៥,៦៨% ។
ដោយឡែក គិតត្រឹមរយៈពេល១១ខែឆ្នាំនេះ ទុនវិនិយោគវិស័យសំណង់ស្មើ៨ពាន់២រយលានដុល្លារអាមេរិក កើនឡើង១៧៦,៩៣% ធៀបនឹងរយៈពេលដូចគ្នាកាលពីឆ្នាំមុន ៕
ចែករំលែកព័តមាននេះ