រាជធានីភ្នំពេញ ៖ បរិយាកាសនយោបាយមិនរារាំងដល់ការវិនិយោគក្នុងវិស័យលំនៅឋានទេ ដោយការវិនិយោគក្នុងវិស័យនេះនៅតែមានសញ្ញាល្អប្រសើរ បើធៀបរយៈពេលដូចគ្នាកាលពីឆ្នាំមុន ។
យោងតាមក្រុមហ៊ុន VTRUST Appraisal ដែលបានសិក្សាពីទីផ្សារលំនៅឋាន និងខុនដូ បានបង្ហាញនាព្រឹកថ្ងៃទី១៥ ធ្នូថា នៅដំណាច់ឆ្នាំ២០១៧នេះ គម្រោងវិនិយោគផ្ទះផ្ទាល់ដី និងខុនដូបានកើនឡើងគួរឲ្យកត់សម្គាល់ បើធៀបរយៈពេលដូចគ្នាកាលពីឆ្នាំមុន ។ ចំនួនលំនៅឋានទាំងនោះបានកើនឡើងសរុប២សែនផ្ទះនិងយូនីត ខណៈឆ្នាំមុនមានត្រឹមប្រមាណ១សែនផ្ទះ និងយូនីតប៉ុណ្ណោះ ។
លោក ហ៊ឹម សីហា នាយកផ្នែកស្រាវជ្រាវនៃក្រុមហ៊ុន VTRUST Appraisal បានលើកឡើងនាព្រឹកថ្ងៃទី១៥ ធ្នូថា ការសាងសង់ផ្ទះផ្ទាល់ដី និងខុនដូបានកើនឡើង ដោយឆ្នាំ២០១៧នេះមានជាង២សែនផ្ទះ និងយូនីត។ លោកបន្តថា ការដាក់លក់ថ្មីក្នុងឆ្នាំនេះ ក៏បានកើនឡើងផងដែរ ដោយអត្រាលក់ចេញមានចំនួនរហូតដល់ជាង១ម៉ឺន៣ពាន់ផ្ទះ ខណៈឆ្នាំ២០១៦ បានដាក់លក់ត្រឹមតែ១ម៉ឺន២ពាន់ផ្ទះប៉ុណ្ណោះ ។
លោកមានប្រសាសន៍ថា ៖« ភាគច្រើននៃការវិនិយោគផ្ទះជាប់ដីជាប្រភេទផ្ទះល្វែង ធ្វើឡើងដោយអ្នកវិនិយោគក្នុងស្រុកផ្ទាល់ ខណៈការវិនិយោគលើប្រភេទខុនដូភាគច្រើន វិនិយោគដោយជនបរទេស » ។ លោកបន្ថែមថា ៖« បញ្ហានយោបាយនៅម្ពុជាមិនប៉ះពាល់ដល់ការវិនិយោគលើវិស័យលំនៅឋានទេ ប៉ុន្តែផ្ទុយទៅវិញ គម្រោងផ្គត់ផ្គង់លើវិស័យនេះ បែរជាកើនឡើងខ្ពស់ជាងឆ្នាំ២០១៦ទៅទៀត ហើយគិតមកទល់ពេលនេះ មិនទាន់មានគម្រោងណាមួយផ្អាកដំណើរការសាងសង់ទេ ដោយមានត្រឹមតែការយឺតយ៉ាវបន្តិចបន្តួច ហើយការសាងសង់នៅតែបន្ត » ។
លោកបន្តថា ទោះបីជាមានការកើនឡើង នូវការផ្គត់ផ្គង់ទាំងប្រភេទផ្ទះជាប់ដី និងផ្ទះវីឡា និងខុនដូក្ដី ប៉ុន្តែតម្រូវការមានភាពខុសប្លែកពីគ្នារវាងប្រភេទផ្ទះទាំងពីរ ដោយអតិថិជនពេញនិយមចំពោះផ្ទះផ្ទាល់ដី ជាលក្ខណៈផ្ទះល្វែងដែលមានតម្លៃសមរម្យ ជាងផ្ទះវីឡាមានតម្លៃថ្លៃ ។
អគ្គនាយកក្រុមហ៊ុន Century21 Mekong លោក ច្រឹក សុខនីម បានថ្លែងថា ការវិនិយោគលំនៅឋាននៅតែល្អប្រសើរ ហើយការទិញលក់លំនៅឋានតាមបុរីនានាបានកើនឡើងប្រមាណ១០%ក្នុងឆ្នាំនេះ បើធៀបរយៈពេលដូចគ្នាកាលពីឆ្នាំមុន ។ លោកបន្តថា បរិយាកាសនយោបាយមិនបានជះឥទ្ធិពលដល់ការទិញលក់លំនៅឋានតាមបុរីនានាទេ ។
យោងតាមមន្ត្រីក្រសួងរៀបចំដែលដី នគរូប នីយកម្ម និងសំណង់ បានឲ្យដឹងថា ក្នុង១ឆ្នាំៗ ប្រជាពលរដ្ឋមានតម្រូវការលំនៅឋាន គិតជាមធ្យម៥ម៉ឺនខ្នងផ្ទះដែលស្របតាមកំណើននៃវិស័យអចលនទ្រព្យកំពុងកើនឡើង ។
លោក ប៉ែន សុផល រដ្ឋលេខាធិការក្រសួងរៀបចំដែនដីនគររូបនីយកម្ម និងសំណង់ លើក ឡើងនាព្រឹកថ្ងៃទី១៩ ធ្នូ កន្លងមកថា ៖« តាមការសិក្សារបស់ក្រសួងអំពីក្របខ័ណ្ឌយុទ្ធសា ស្ត្រ អភិវឌ្ឍន៍ទីក្រុងនៅកម្ពុជាឃើញថា ចំនួនប្រជាជនរស់នៅក្នុងរាជធានី ក្រុង និងទីប្រជុំ ជននៅ ឆ្នាំ២០១៤ មានចំនួនប្រមាណ៤,៥លាននាល់ ត្រូវជា២៧,១% នឹងបន្តកើនដល់៧,៩២លាននាក់ត្រូវជា៤៤% ឆ្នាំ២០៣០ ។
លោកបានបញ្ជាក់ថា ៖« តាមទិន្នន័យនេះបង្ហាញឲ្យឃើញថា សម្រាប់រយៈពេល១៥ ឆ្នាំ(២០១៥-២០៣០)តម្រូវការលំនៅឋាន សម្រាប់តំបន់រាជធានី ក្រុង និងទីប្រជុំជនមានប្រមាណ៨០ម៉ឺនខ្នងផ្ទះ ដែលគិតជាធម្យមមានតម្រូវការប្រមាណ៥ម៉ឺនខ្នងផ្ទះក្នុង១ឆ្នាំ»៕
ចែករំលែកព័តមាននេះ