តាមប្រភពព័ត៌មាន Mirror បានឲ្យដឹងថា កីឡាករឆ្នើមប្រចាំក្លឹប Barcelona បានផ្ញើចិត្តនឹករឭកដល់កីឡាករថ្លៃជាងគេលើពិភពលោក ដែលជាអតីតមិត្តរួមក្រុមរបស់ខ្លួន សម្រាប់កាដូជិតចូលឆ្នាំថ្មី ។
Neymar និង Messi បាននៅក្នុងក្លឹប Barcelona ជាមួយគ្នា ហើយមានទំនាក់ទំនងយ៉ាងជិតស្និទ្ធ ដោយពួកគេចាត់ទុកជាមិត្តសម្លាញ់នឹងគ្នា ។ ទោះបីជា Neymar ត្រូវចាកចេញពីក្លឹបទៅកាន់ក្លឹបថ្មីនៅបារាំងក៏ដោយ ក៏ទំនាក់ទំនងអ្នកទាំងពីរនៅតែល្អប្រសើរ ។
សម្រាប់មុនថ្ងៃណូអែលនេះ Messi បានចេញវីឌីអូមួយនិយាយរៀបរាប់ថា កីឡាករទាំងអស់នៅក្នុងក្លឹប Barcelona នៅតែនឹករឭកដល់ Neymar ទោះបីជា Neymar ទៅ PSG ហើយក៏ដោយ ។
Messi បាននិយាយថា ៖ “Ney… ខ្ញុំគិតថាពួកយើងបាននិយាយគ្នាពីរឿងគ្រប់យ៉ាងរួចហើយ នៅពេលឯងចាកចេញ ។ តាមការពិត ពេលនេះមនុស្សក្នុងក្លឹបទាំងអស់កំពុងតែនឹកឯងជានិច្ច ។ ពួកយើងនៅតែចង់ចែករំលែកភេសជ្ជៈក្តៅឲ្យគ្នាទៅវិញទៅមកទៀត ដូចកាលពីមុន ។ ដូចសព្វដងអីចឹង ខ្ញុំសូមជូនពរឯងឲ្យជួបប្រទះតែសំណាងល្អគ្រប់ទីកន្លែង ហើយខ្ញុំជឿថា ពួកយើងនឹងអាចជួបគ្នាម្តងទៀតក្នុងពេលឆាប់ៗខាងមុខនេះ ។ សូមថែទាំសុខភាពផង ។”
គួរបញ្ជាក់ថា កាលពីពាក់កណ្តាលឆ្នាំនេះ Neymar បានចាកចេញពី Barcelona ទៅកាន់ក្លឹបអ្នកមានបារាំង PSG ក្នុងតម្លៃមួយដែលចាត់ទុកថាជាតម្លៃថ្លៃជាងគេបំផុតលើពិភពលោក សម្រាប់កីឡាករបាល់ទាត់ ។ ទោះបីជា Neymar ចេញពីមិត្តរួមក្រុមមែន តែគេនៅតែមិនភ្លេចឡើយនូវមិត្តភាព ៕
ចែករំលែកព័តមាននេះ