ខេត្តបាត់ដំបង ៖ ក្មេងស្រីអាយុក្រោម១៥ឆ្នាំចំនួន៣នាក់ បានចាកចេញពីផ្ទះដោយមានបង្វេចជាប់ខ្លួនផង ជិះកង់ពីស្រុកមោងឫស្សី មកកាន់ក្រុងបាត់ដំបងដោយគ្មានគោលដៅ ។ ពួកនាងអះអាងថា ដោយសារទ្រាំទ្រនឹងការធ្វើទារុណកម្មពីឪពុកម្តាយរបស់ពួកនាងមិនបាន ពេលដែលពួកនាងខកខានមិនបានចូលរៀនប៉ុន្មានថ្ងៃ ។
ក្មេងស្រីទាំង៣នាក់នេះត្រូវបានគេប្រទះឃើញនៅខាងក្រោយស្នងការដ្ឋានខេត្តបាត់ដំបង ក្នុងសង្កាត់រតនៈ ក្រុងបាត់ដំបង កាលពីវេលាម៉ោង៥និង១៥នាទីល្ងាចថ្ងៃទី២៥ មីនា ខណៈដែលពួកនាងជិះកង់ស្វែងរកសុំផ្ទះអ្នកភូមិស្នាក់នៅបណ្តោះអាសន្ន ។ ក្មេងស្រីទាំង៣នាក់ ១-ឈ្មោះសុខេន ស្រីល័ក្ខ អាយុ១៤ឆ្នាំ នៅភូមិរាមគន់ ឃុំគារ ២-ឈ្មោះភៀង បុប្ផា អាយុ១៤ឆ្នាំ រស់នៅភូមិពោធិ៍១ ឃុំគារ ៣-ឈ្មោះធិ សំនៀង អាយុ១៥ឆ្នាំ នៅភូមិកន្សៃបន្ទាយ ឃុំមោង ស្រុកមោងឫស្សី។ ពួកនាងរៀននៅអនុវិទ្យាល័យមោងឫស្សី ។
ក្មេងស្រីទាំង៣នាក់នេះបានពោលដូចគ្នាថា ពួកនាងសុទ្ធតែត្រូវឪពុកម្តាយវាយដំ ពេលដែលពួកនាងខកខានមិនបានចូលរៀនម្តងម្កាល ។ ពួកនាងខ្លាចការធ្វើទារុណកម្មមិនឈប់ឈរបែបនេះ ខ្លាំងណាស់ ទើបសម្រេចចិត្តរត់ចេញពីផ្ទះមកកាន់ក្រុងបាត់ដំបង ដើម្បីរកការងារធ្វើវិញ តែនាងមិនមានស្គាល់គេទេ ។ ពួកនាងនិយាយថា ពួកនាងមកនេះ មានការព្រួយបារម្ភខ្លាចគេបោកយកទៅលក់ ។ ពួកនាងចង់ត្រឡប់ទៅផ្ទះវិញ តែខ្លាចឪពុកម្តាយរបស់នាងធ្វើបាបទៀត និងបានស្នើឱ្យសមត្ថកិច្ចជួយអន្តរាគមន៍ផង ។
ពួកនាងជិះកង់២គ្រឿង ហើយសមត្ថកិច្ចនៃការិយាល័យនគរបាលប្រឆាំងការជួញដូរមនុស្ស និងការពារអនីតិជនកំពុងធ្វើការសាកសួរពីដំណើររឿងរបស់ពួកនាង តែយើងមិនទាន់បានទំនាក់ទំនងទៅអាណាព្យាបាលរបស់ពួកនាងនៅឡើយទេ ដើម្បីជ្រាបពីករណីនេះ ។ ការសម្រេចចិត្តរបស់ក្មេងស្រីទាំង៣នាក់នេះពិតជាគួរឱ្យភ្ញាក់ផ្អើលពេកណាស់ ដែលនាំគ្នារត់ចោលផ្ទះបែបនេះ ដោយមិនខ្លាចពីផលលំបាកនានាមកលើខ្លួន ។ សំណាងណាស់ដែលពួកនាងត្រូវបានសមត្ថកិច្ចរក្សាការពារ ៕
ចែករំលែកព័តមាននេះ