រាជធានីភ្នំពេញ ៖ បុរសជាមន្ត្រីយោធាម្នាក់សង្ស័យងងុយដេកបានបើករថយន្ត១គ្រឿងធ្លាក់ចូលប្រឡាយទឹក បណ្ដាលឲ្យស្លាប់ និងបង្កឲ្យមានកាតភ្ញាក់ផ្អើលទាំងព្រឹកតែម្ដង ។ បន្ទាប់មកនគរបាល និងប្រជាពលរដ្ឋបានចុះរាវស្រង់យកសាកសពឡើងគោក ព្រមទាំងយកថយន្ត១គ្រឿងទៀតអូសយករថយន្តឡើងគោក ក្រោយពេលកើតហេតុប្រហែល១ម៉ោង ។
ឧបទ្ទវហេតុគ្រោះរថយន្តធ្លាក់ទឹកនេះ បានកើតឡើងកាលពីវេលាម៉ោង០៧ព្រឹក ថ្ងៃទី២២ ខែធ្នូ ឆ្នាំ២០១៧ នៅលើកំណាត់ផ្លូវលេខ២១៧ ត្រង់ចំណុចផ្លូវកោងខាងត្បូងស្ពានព្រែកជ្រៃ ស្ថិតនៅក្នុងភូមិព្រែកជ្រៃ សង្កាត់ស្ពានថ្ម ខណ្ឌដង្កោ រាជធានីភ្នំពេញ ។ បុរសរងគ្រោះដល់ស្លាប់នោះឈ្មោះ ហេង ដារ៉ា អាយុជាង៥០ឆ្នាំ មានទីលំនៅក្នុងភូមិបឹងខ្យាង ឃុំបឹងខ្យាង ស្រុកកណ្ដាលស្ទឹង ខេត្តកណ្ដាល គាត់ជាមន្ត្រីយោធា ។
តាមប្រភពព័ត៌មានបានឲ្យដឹងថា នៅមុនពេលកើតហេតុ មន្ត្រីយោធារងគ្រោះខាងលើបើកបររថយន្ត១គ្រឿង ម៉ាកហ្វ័ររ៉ាន់ន័រ ពណ៌ខ្មៅ ពាក់ស្លាកលេខ ភ្នំពេញ ២C-៨០៩០ ។ ក្នុងល្បឿនលឿន និងក្នុងទិសដៅពីជើងទៅត្បូង លុះពេលទៅដល់ត្រង់ចំណុចផ្លូវកោង បត់មិនទាន់ក៏បានជ្រុលធ្លាក់ចូលទៅក្នុងប្រឡាយទឹកទាំងកំរោល បណ្ដាលឲ្យរថយន្តលិចទៅក្នុងទឹកជម្រៅប្រមាណ៣ម៉ែត្រ ។
ប្រភពដដែលបានបន្តទៀតថា ខណៈនោះកម្លាំងនគរបាលប៉ុស្ដិ៍ស្ពានថ្ម រួមជាមួយនគរបាលចរាចរណ៍ខណ្ឌដង្កោ បានចុះទៅកាន់ទីនោះចាត់ចែងកម្លាំងចុះរាវ ហើយបានប្រទះឃើញបុរសជាមន្ត្រីយោធាខាងលើស្លាប់បាត់ទៅហើយ ។
បន្ទាប់មកបានស្រង់គាត់ឡើងគោក ព្រមទាំងយករថយន្ត១គ្រឿងផ្សេងទៀតអូសរថយន្តរបស់គាត់ឡើង រង់ចាំប្រគល់ជូនក្រុមគ្រួសាររបស់គាត់ចាត់ចែងធ្វើបុណ្យ និងជួសជុលឡើងវិញ ៕
ចែករំលែកព័តមាននេះ