ក្រសួងណែនាំមន្ទីរទេសចរណ៍ និងប្រតិបត្តិករពង្រឹងគុណភាពផលិតផល និងសេវា
រាជធានីភ្នំពេញ ៖ ដើម្បីពង្រឹងគុណភាពផលិតផល និងសេវាកម្មទេសចរណ៍ក្នុងឱកាសឆ្លងឆ្នាំសកល ២០១៧ចូល២០១៨ ចាប់ពីថ្ងៃទី៣០-៣១ ខែធ្នូ ឆ្នាំ២០១៧ ដល់ថ្ងៃទី១ ខែមករា…
រាជធានីភ្នំពេញ ៖ ដើម្បីពង្រឹងគុណភាពផលិតផល និងសេវាកម្មទេសចរណ៍ក្នុងឱកាសឆ្លងឆ្នាំសកល ២០១៧ចូល២០១៨ ចាប់ពីថ្ងៃទី៣០-៣១ ខែធ្នូ ឆ្នាំ២០១៧ ដល់ថ្ងៃទី១ ខែមករា ឆ្នាំ២០១៨ ក្រសួងទេសចរណ៍បានធ្វើការណែនាំដល់មន្ទីរទេសចរណ៍រាជធានី-ខេត្ត អាជ្ញាធរពាក់ព័ន្ធ និងប្រតិបត្តិករទេសចរណ៍ទាំងអស់ឲ្យអនុវត្តនូវគោលការណ៍សំខាន់ៗចំនួន៤ចំណុច ។
យោងតាមសារាចរណែនាំ ក្រសួងបានក្រើនរំឭកឲ្យប្រធានមន្ទីរទេសចរណ៍រាជធានី-ខេត្ត ត្រូវសហការជាមួយសាលារាជធានី-ខេត្ត និងសមត្ថកិច្ចគ្រប់លំដាប់ថ្នាក់ ដើម្បីធានាសន្តិសុខ សុវត្ថិភាព រក្សាសណ្តាប់ធ្នាប់សាធារណៈ ភាពស្អាត និងរៀបចំទីចំណតជូនភ្ញៀវទេសចរឲ្យបានល្អប្រសើរនៅតាមគោលដៅទេសចរណ៍ និងរមណីយដ្ឋានទេសចរណ៍នានា ។
ទន្ទឹមនឹងនោះ ប្រធានមន្ទីរទេសចរណ៍រាជធានី-ខេត្ត សហការជាមួយមន្ទីរ និងផ្នែកពាក់ព័ន្ធនានាត្រូវអប់រំការយល់ដឹងជាសាធារណៈអំពីបរិស្ថាន ភាពស្អាត អនាម័យ និងសុវត្ថិភាពដល់ម្ចាស់មូលដ្ឋានអាជីវកម្ម សេវាកម្មទេសចរណ៍ ពិសេសភោជនីយដ្ឋាន អាហារដ្ឋាន និងរមណីយដ្ឋានទេសចរណ៍ ។
ជាមួយគ្នានេះ មន្ទីរទេសចរណ៍រាជធានី-ខេត្តត្រូវណែនាំប្រជាពលរដ្ឋឲ្យចូលរួមថែរក្សាភាពស្អាត អនាម័យ និងបរិស្ថាន ដោយលុបបំបាត់ការចោលសំរាម និងកាកសំណល់ផ្សេងៗ ជាពិសេសបញ្ឈប់ការបោះសំរាម និងក្រដាសជូតមាត់នៅក្រោមតុ ដោយត្រូវជំនួសវិញដោយកន្សែងត្រជាក់ ឬម្ចាស់ហាងត្រូវចាត់មនុស្សដើម្បីយកសំរាមដែលគេបោះចោលដាក់ក្នុងធុងឲ្យបានត្រឹមត្រូវ ។ គប្បីធានាឲ្យបាននូវការថែរក្សាភាពស្អាត អនាម័យនៅតាមបង្គន់អនាម័យសាធារណៈ ភោជនីយដ្ឋាន អាហារដ្ឋាន និងរមណីយដ្ឋាននានា និងណែនាំបុគ្គលិកបម្រើការងារត្រូវតែស្លៀកពាក់ឯកសណ្ឋានឲ្យបានត្រឹមត្រូវ និងផ្តល់បដិសណ្ឋារកិច្ចល្អចំពោះភ្ញៀវទេសចរ ។
ក្រសួងក៏បានក្រើនរម្លឹកដល់ប្រតិបត្តិករទេសចរណ៍ ត្រូវពង្រឹងគុណភាពផលិតផល និងសេវាកម្មទេសចរណ៍របស់ខ្លួន លើកកម្ពស់នូវគុណភាព សេវាកម្ម ភាពស្អាត និងអនាម័យម្ហូបអាហារ។ ទន្ទឹមនឹងនោះ ក្រសួងទេសចរណ៍បានធ្វើការអំពាវនាវដល់ម្ចាស់អាជីវកម្មទេសចរណ៍ទាំងអស់ មេត្តាកុំដំឡើងតម្លៃសេវាកម្ម និងផលិតផល ដោយរក្សាតម្លៃឲ្យបានសមរម្យ ។ រាល់សេវាស្នាក់នៅ និងតម្លៃម្ហូបអាហារ ត្រូវកំណត់ឲ្យបានច្បាស់លាស់ក្នុងតារាងតម្លៃ ដើម្បីឲ្យភ្ញៀវបានជ្រាបជាមុន ជៀសវាងការកំណត់តម្លៃហួសហេតុ ។ ករណីមិនអនុវត្តតាមតារាងតម្លៃ ដែលបានកំណត់ និងបិទផ្សាយ ម្ចាស់មូលដ្ឋានអាជីវកម្ម ឬសេវាកម្មត្រូវទទួលខុសត្រូវចំពោះមុខច្បាប់ជាធរមាន ។
ក្រសួងទេសចរណ៍ក្នុងចំណុចទី៤ ក៏បានណែនាំដល់ប្រធានមន្ទីរទេសចរណ៍រាជធានី-ខេត្ត ត្រូវសហការជាមួយសាលារាជធានី-ខេត្ត និងប្រព័ន្ធផ្សព្វផ្សាយ ដូចជា សារព័ត៌មាន វិទ្យុ និងទូរទស្សន៍ ដើម្បីផ្សព្វផ្សាយស្ព័តអប់រំទេសចរណ៍ និងចលនាប្រឡងប្រណាំង «ទីក្រុងស្អាត រមណីយដ្ឋានស្អាត សេវាល្អ បដិសណ្ឋារកិច្ចល្អ» ឲ្យកាន់តែទូលំទូលាយថែមទៀត ៕
ចែករំលែកព័តមាននេះ