ខេត្តបន្ទាយមានជ័យ ៖ ក្មេងស្រីអាយុ១១ឆ្នាំម្នាក់ រៀនថ្នាក់ទី៤ទៅរៀនហូបចំណី បណ្ដាលឲ្យក្អួតចេញឈាមតាមមាត់ និងច្រមុះ សភាពធ្ងន់ធ្ងរបញ្ជូលដល់ពេទ្យស្លាប់ នៅអំឡុងម៉ោង០៩យប់ ថ្ងៃទី២០ ខែធ្នូ ឆ្នាំ២០១៧ នៅមន្ទីពេទ្យមិត្តភាពកម្ពុជា-ជប៉ុន មង្គលបូរី ស្រុកមង្គលបូរី ។
ក្មេងស្រីដែលក្អួតចេញឈាមតាមមាត់ និងច្រមុះស្លាប់មានឈ្មោះ ឈួង ស្រីហួយ អាយុ១១ឆ្នាំ ជាសិស្សថ្នាក់ទី៤ សាលាបឋមសិក្សាជ្រាប់ចាស់ ស្ថិតភូមិជ្រាប់ ឃុំជប់វ៉ារី ស្រុកព្រះនេត្រព្រះ ដែលមានម្តាយឈ្មោះ ស្លៀង សឿន អាយុ៣៧ឆ្នាំ ដែលរស់នៅជាមួយជីតាឈ្មោះ នួន ឈួង (ជាមេភូមិជ្រាប់ចាស់) ។
តាមព័ត៌មានដឹងថា ក្មេងស្រីរងគ្រោះឈ្មោះ ឈួង ស្រីហួយ រៀនថ្នាក់ទី៤ នៅសាលាបឋមសិក្សាជ្រាប់ចាស់ រៀនពេលល្ងាច ហើយមុនពេលដែលក្អួតចេញឈាមតាមមាត់ និងច្រមុះស្លាប់នោះ គឺក្មេងស្រីដល់ម៉ោងចេញលេងបានទៅទិញមី១កញ្ចប់តម្លៃ៥០០រៀលហូប ហើយហូបស្ករកៅស៊ូ ហើយបេះផ្លែទឹកដោះហូបជាមួយអំបិលមី ។
ក្រោយហូបហើយភ្លាមៗ ក្មេងមានអាការក្អួតមិនឈប់ នៅវេលាម៉ោង០៤ល្ថាច ថ្ងៃទី២០ ខែធ្នូ ឆ្នាំ២០១៧ នៅសាលារៀន ហើយនាយកសាលាបឋមសិក្សាជ្រាប់ចាស់ដឹកជូនតាមម៉ូតូដល់ផ្ទះឲ្យជីតាឈ្មោះ នួន ឈួង (ជាមេភូមិជ្រាប់ចាស់) ។
ក្រោយពេលជូនឲ្យលោកតា ឃើញសភាពចៅស្រីក្អួតមិនបាត់បានបញ្ជូនទៅមន្ទីពេទ្យបង្អែកស្រុកព្រះនេត្រព្រះ ដាក់សេរ៉ូម ឃើញថាក្មេងស្រីមានសភាពធ្ងន់បានបញ្ជូនមកមន្ទីពេទ្យមិត្តភាពកម្ពុជា-ជប៉ុន មង្គលបូរី គ្រូពេទ្យបានទទួល ហើយព្យាបាលភ្លាមៗ ដោយឃើញថា ក្មេងស្រីក្អួតរហូតដល់ឈាមចេញតាមមាត់ និងច្រមុះមានសភាពធ្ងន់ បានធ្វើការព្យាបាលតាមការងារបច្ចេកទេស ។
ទោះជាការខិតខំប្រឹងប្រែងយ៉ាងណាក៏ដោយ ក្មេងស្រីមានសភាពធ្ងន់ពេក បណ្ដាលឲ្យក្មេងស្រីស្លាប់ក្រោយពេលបញ្ជូនមកព្យាបាលដល់មន្ទីពេទ្យមិត្តភាពកម្ពុជា-ជប៉ុន មង្គលបូរី ក្រោយកន្លះម៉ោងបានស្លាប់ ។ គ្រូពេទ្យបានបញ្ជាក់ថា ក្មេងស្រីដែលក្អួតចេញឈាមតាមមាត់ និងច្រកមុះរហូតដល់ស្លាប់នេះ តាមការពិនិត្យបណ្ដាលមកពីពុលចំណី ហើយគ្រូពេទ្យបានជួយសង្គ្រោះដែរ តែសភាពធ្ងន់ធ្ងរពេកទើបបណ្ដាលឲ្យស្លាប់ ៕
ចែករំលែកព័តមាននេះ