រាជធានីភ្នំពេញ ៖ រដ្ឋមន្ត្រីក្រសួងសាធារណការ និងដឹកជញ្ជូន បានបង្ហើបថា ខ្សែរថភ្លើងថ្មីចេញពីស្ថានីយរាជាយស្ម័យានក្រុងភ្នំពេញ ឆ្ពោះទៅកាន់ព្រលានយន្តហោះអន្តរជាតិភ្នំពេញ នឹងបើកដំណើរការនៅមុនពិធីបុណ្យចូលឆ្នាំខ្មែរខាងមុខនេះ ខណៈដែលក្បាលរថភ្លើងចំនួន៣ កំពុងផលិតនៅប្រទេសម៉ិកស៊ិក…
រាជធានីភ្នំពេញ ៖ រដ្ឋមន្ត្រីក្រសួងសាធារណការ និងដឹកជញ្ជូន បានបង្ហើបថា ខ្សែរថភ្លើងថ្មីចេញពីស្ថានីយរាជាយស្ម័យានក្រុងភ្នំពេញ ឆ្ពោះទៅកាន់ព្រលានយន្តហោះអន្តរជាតិភ្នំពេញ នឹងបើកដំណើរការនៅមុនពិធីបុណ្យចូលឆ្នាំខ្មែរខាងមុខនេះ ខណៈដែលក្បាលរថភ្លើងចំនួន៣ កំពុងផលិតនៅប្រទេសម៉ិកស៊ិក គ្រោងនឹងមកដល់កម្ពុជានៅខែមីនា ឆ្នាំ២០១៨ ។
ថ្លែងក្នុងពិធីបើកកន្លែងត្រួតពិនិត្យបច្ចេកទេសយានយន្តនៅតាមបណ្តោយផ្លូវជាតិលេខ៦អា នាព្រឹកថ្ងៃទី២១ ធ្នូ ម្សិលមិញ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានឲ្យដឹងថា ខ្សែរថភ្លើងនេះ នឹងចាកចេញពីចំណតរាជាយស្ម័យាន ទៅកាន់ព្រលានយន្តហោះអន្តរជាតិភ្នំពេញ នឹងបើកដំណើរការនៅមុនពិធីបុណ្យចូលឆ្នាំប្រពៃណីជាតិខ្មែរនាពេលខាងមុខនេះ ហើយអ្វីដែលកាន់ពិសេស ខ្សែរថភ្លើងនេះនឹងបើកឲ្យប្រជាពលរដ្ឋជិះដោយឥតគិតថ្លៃក្នុងរយៈពេល៣ខែ ។
ខ្សែរថភ្លើងធុនស្រាលនេះ ត្រូវបានវិនិយោគដោយក្រុមហ៊ុន Toll Railway ដែលជាបុត្រសម្ព័ន្ធក្រុមហ៊ុន Royal Group របស់អ្នកឧកញ៉ាគិត ម៉េង ។
លោកបណ្ឌិត វ៉ាន់ វ៉ាត អ្នកឯកទេសផ្នែកនគរូបនីយកម្ម បានថ្លែងថា ការមានរថភ្លើងថ្មីមួយទៀត ជាការជួយសម្រួលបញ្ហាចរាចរណ៍ ដែលកំពុងកកស្ទះនៅទីក្រុងភ្នំពេញ ហើយវាជួយលើកកម្ពស់សោភ័ណភាពក្នុងទីក្រុងផងដែរ ។ លោកបន្តថា ការវិនិយោគបែបនេះ មិនត្រឹមតែផ្តល់ផលចំណេញដល់បញ្ហាចរាចរណ៍ទេ តែក៏រួមចំណែកកាត់បន្ថយផលប៉ះពាល់បរិស្ថាន និងកាត់បន្ថយអត្រាគ្រោះថ្នាក់ចរាចរណ៍ផងដែរ ។
លោកបន្តថា ៖« វាផ្តល់ជម្រើសថ្មីនៃការធ្វើដំណើរ និងធ្វើឲ្យលំហូរចរាចរណ៍ទៅកាន់ផ្នែកផ្សេងៗទៀត ជាជាងការប្រមូលម្តុំនៅតែលើមហាវិថីសហព័ន្ធរុស្ស៊ី ដែលកំពុងតែកកស្ទះចរាចរណ៍ពីមួយថ្ងៃទៅមួយថ្ងៃ » ។
ក្រៅពីសមិទ្ធផលមួយនេះ ក៏មានគម្រោងអភិវឌ្ឍន៍ហេដ្ឋារចនាសម្ព័ន្ធសំខាន់ៗជាច្រើនទៀតដែលគ្រោងនឹងបញ្ចប់ ហើយដាក់ឲ្យដំណើរការនៅឆ្នាំ២០១៨ខាងមុខផងដែរ ដូចជា គម្រោងដឹកជញ្ជូនអ្នកដំណើរតាមផ្លូវទឹកពីព្រែកព្នៅ ឆ្ពោះទៅក្រុងតាខ្មៅជាដើម ។
លោកទេសរដ្ឋមន្ត្រី ស៊ុន ចាន់ថុល ថ្លែងថាកម្ពុជាមានគម្រោងអភិវឌ្ឍន៍ហេដ្ឋារចនាសម្ព័ន្ធធំៗជាច្រើន មានទាំងកំពុងដំណើរការ, គម្រោងត្រៀមនឹងបញ្ចប់ និងគម្រោងត្រូវចាប់ផ្តើមអនុវត្តចាប់ពីឆ្នាំ២០១៨ ដែលជាទិសដៅរបស់រាជរដ្ឋាភិបាលកម្ពុជា ។
លោកទេសរដ្ឋមន្ត្រីថ្លែងថា ៖« គម្រោងសំខាន់ៗទាក់ទងនឹងហេដ្ឋារចនាសម្ព័ន្ធដឹកជញ្ជូនរបស់កម្ពុជា បាននិងកំពុងដំណើរការ, គ្រោងបញ្ចប់ និងអនុវត្តបន្ត ដូចជា ផ្លូវជាតិលេខ៣ ពីភ្នំពេញទៅខេត្តកំពត នឹងបើកការដ្ឋានពង្រីកពី២ទៅ៤គន្លង (៧០គីឡូម៉ែត្រពីចោមចៅទៅ) ដោយសារសេដ្ឋកិច្ចរីកចម្រើន, ផ្លូវជាតិលេខ១១ នឹងពង្រីកពីអ្នកលឿងទៅដល់ផ្លូវជាតិលេខ៧, ផ្លូវក្រវាត់ក្រុងទី២កំពុងធ្វើ និងបញ្ចប់ការចរចាផ្លូវក្រវាត់ក្រុងទី៣បន្ថែម ដើម្បីបញ្ចៀសការកកស្ទះចរាចរណ៍នៅភ្នំពេញ និងស្ពានស្ទឹងត្រង់ ឆ្លងទន្លេមេគង្គ កំពុងតែសាងសង់ » ។
ចំណែកផ្លូវជាតិលេខ៥ ពីខេត្តបាត់ដំបងទៅស្វាយស៊ីសុផុន ពង្រីកពី២ទៅ៤គន្លង ហើយពីស៊ីសុផុនមកព្រែកក្តាម ពង្រីកពី២ទៅ៤គន្លងដែរ។ ផ្លូវជាតិលេខ៥ទាំងមូល ចាប់ពីភ្នំពេញទៅដល់ទល់ដែនកម្ពុជា-ថៃ ពង្រីកពី២ទៅ៤គន្លង ដោយសារផ្លូវមួយខ្សែនេះ ជាផ្លូវរបស់អាស៊ានល្បឿនលឿនលេខ១ ។ តភ្ជាប់ពីភ្នំពេញទៅអ្នកលឿង និងទៅប្រទេសវៀតណាម ខាងក្រុមការងាររបស់ JICA កំពុងសិក្សាធ្វើផ្លូវល្បឿនលឿនធ្វើជា៤គន្លង ពីភ្នំពេញទៅបាវិត ។ មួយទៀត នៅភ្នំពេញ ខាង JICA កំពុងសិក្សាផ្លូវរថភ្លើងលើអាកាស AGT គ្មានអ្នកបើកបរ ។
លោកទេសរដ្ឋមន្ត្រីបន្ដថា ផ្លូវល្បឿនលឿនពីភ្នំពេញទៅក្រុងព្រះសីហនុ បានចរចាចប់សព្វគ្រប់អស់ហើយ ត្រៀមនឹងចុះហត្ថលេខាលើកិច្ចព្រមព្រៀងសម្បទានទៅក្រុមហ៊ុនវិនិយោគដែលបានដាក់ទុនប្រហែល២ពាន់លានដុល្លារ ។
លោកទេសរដ្ឋមន្ត្រីបន្ថែមថា ៖« ផ្លូវដែកពីភ្នំពេញទៅប៉ោយប៉ែត យើងសង្ឃឹមថា នឹងបញ្ចប់សព្វគ្រប់នៅត្រឹមឆ្នាំ២០១៨ រវាងផ្លូវដែកកម្ពុជា និងប្រទេសថៃ ។ លើសពីនេះ មានផ្លូវតភ្ជាប់ពីខេត្តបាត់ដំបងចុះមកខេត្តកោះកុង ដើម្បីតភ្ជាប់មកកំពង់ផែទឹកជ្រៅនៅក្រុងព្រះសីហនុ សម្រាប់ដឹកកសិផលកម្ពុជា ។ ម្យ៉ាងទៀត គម្រោងសាងសង់កំពង់ផែទឹកជ្រៅនៅក្រុងព្រះសីហនុថ្មីមួយទៀត មានទឹកជ្រៅរហូតដល់ជាង១៤ម៉ែត្រ ដែលអាចឱ្យកប៉ាល់បរទេសធំៗ៩៣% ចូលចតដឹកទំនិញមកលក់នៅកម្ពុជា និងដឹកកសិផលពីកម្ពុជាទៅលក់នៅបរទេស ដែលត្រៀមនឹងបញ្ចប់នៅឆ្នាំ២០២០ » ៕
ចែករំលែកព័តមាននេះ