តុលាការឃុំខ្លួនតៃកុងឡាន បើកបុកអ្នកជិះម៉ូតូស្លា.ប់
- កណ្តាល
ខេត្តកណ្តាល ៖ នៅល្ងាចថ្ងៃទី២១ ខែធ្នូ ឆ្នាំ២០១៧នេះ លោក សាយ សម្ផស្សសេរី ចៅក្រមស៊ើបសួរសាលាដំបូងខេត្តកណ្តាល បានសម្រេចឃុំខ្លួនបុរសម្នាក់ដាក់ពន្ធនាគារបណ្តោះអាសន្ន…
ខេត្តកណ្តាល ៖ នៅល្ងាចថ្ងៃទី២១ ខែធ្នូ ឆ្នាំ២០១៧នេះ លោក សាយ សម្ផស្សសេរី ចៅក្រមស៊ើបសួរសាលាដំបូងខេត្តកណ្តាល បានសម្រេចឃុំខ្លួនបុរសម្នាក់ដាក់ពន្ធនាគារបណ្តោះអាសន្ន ដើម្បីស៊ើបសួរករណីបើករថយន្តបុកម៉ូតូ បណ្តាលឱ្យស្ត្រីម្នាក់ស្លាប់នៅមន្ទីរពេទ្យ និងស្ត្រីម្នាក់ទៀតរបួសស្រាល។ ប្រភពព័ត៌មានបញ្ជាក់ថា ជនបង្កឈ្មោះ ផា ភាស់ ភេទប្រុស អាយុ៣០ឆ្នាំ ត្រូវបានលោក ទន សុចិត្រា ព្រះរាជអាជ្ញារងនៃអយ្យការអមសាលាដំបូងខេត្តកណ្តាល ចោទប្រកាន់ពីបទ “បើកបរធ្វេសប្រហែល ខ្ជីខ្ជា មិនប្រុងប្រយ័ត្ន ឬមិនគោរពកាតព្វកិច្ច បណ្តាលឱ្យរបួសអ្នកដទៃ តាមមាត្រា៨៣ នៃច្បាប់ស្តីពីចរាចរណ៍ផ្លូវគោក។
ប្រភពដដែលបន្តថា មូលហេតុដែលលោកព្រះរាជអាជ្ញារង ទិន សុចិត្រា ចោទប្រកាន់តាមមាត្រា៨៣ ដោយសារជនរងគ្រោះទើបស្លាប់នៅប្រទេសវៀតណាម ក្រោយតុលាការចោទប្រកាន់នេះ។ ទោះបីយ៉ាងណា ក្រោយទទួលដំណឹងជាក់លាក់នៃមរណៈភាពជនរងគ្រោះ តុលាការនឹងសម្រេចសាជាថ្មី នៃបទចោទប្រកាន់នេះ។ ហេតុការណ៍គ្រោះចរាចរណ៍នេះ កើតឡើងកាលពីថ្ងៃទី២០ ខែធ្នូ ឆ្នាំ២០១៧ ផ្លូវជាតិលេខ១ ក្នុងចន្លោះគីឡូម៉ែត្រលេខ៤២ និង៤៣ ភូមិព្រែកត្រែង២ ឃុំសំរោងធំ ស្រុកកៀនស្វាយ ។ នគរបាលបញ្ជាក់ថា ករណីនេះកើតឡើងរវាងរថយន្តម៉ាក SANG YONG ISTANA ពណ៌ទឹកប្រាក់ប្រភេទដឹកអ្នកដំណើរធុនតូច ពាក់ស្លាកលេខ ភ្នំពេញ 2AP-6431 បើកបរដោយឈ្មោះ ផា ភាស់ ទិសដៅពីអ្នកលឿងទៅភ្នំពេញ ដោយដឹកអ្នកដំណើរចំនួន១២នាក់។
ពេលមកដល់ចំណុចកើតហេតុ បានបុកជាមួយម៉ូតូម៉ាក HONDA SCOOPY-I 110 ពណ៌ស ពាក់ស្លាកភ្នំពេញ 1W-0914 បើកបរដោយឈ្មោះ ឡន ឌី ភេទស្រី អាយុ៤៨ឆ្នាំ និងអ្នករួមដំណើរម្នាក់ឈ្មោះ វ៉ន ជីវ៉ា ភេទស្រី អាយុ២៣ឆ្នាំ ដែលបើកបរក្នុងទិសដៅស្របគ្នាហើយបត់ឆ្លងកាត់ថ្នល់មកខាងឆ្វេង។ នគរបាលសន្និដ្ឋានថា អ្នកបើកបរម៉ូតូឈ្មោះ ឡន ឌី ធ្វេសប្រហែសខ្ជីខ្ជា មិនប្រុងប្រយ័ត្នមិនបានពិនិត្យគ្រប់ជ្រុងជ្រោយមុន ពេលបើកឆ្លងកាត់ថ្នល់។ ចំណែកអ្នកបើករថយន្តឈ្មោះ ផា ភាស់ ធ្វេសប្រហែសមិនបានពិនិត្យស្ថានភាពផ្លូវខាងមុខមានឧបសគ្គ៕
ចែករំលែកព័តមាននេះ