សហរដ្ឋអាមេរិក ៖ ប្រធានាធិបតីអាមេរិក លោកដូណាល់ ត្រាំ កាលពីថ្ងៃទី២០ ធ្នូ បានគំរាមដកជំនួយហិរញ្ញវត្ថុពីបណ្តាប្រទេសដែលគាំទ្រដំណោះស្រាយមួយរបស់ អ.ស.ប ដែលថ្កោលទោសការទទួលស្គាល់ក្រុងហ្សេរុយសាឡឹម ដោយអាមេរិកថាជារដ្ឋធានី
អ៊ីស្រាអែល ។
ក្រោយកិច្ចប្រជុំមួយរបស់រដ្ឋាភិបាលលោកឯសេតវិមាន លោកត្រាំ ថ្លែងទៅកាន់សារព័ត៌មានថា ពួកគេទទួលប្រាក់ច្រើនរយលានដុល្លាររហូតដល់ច្រើនពាន់លានដុល្លារពីយើង ហើយបន្ទាប់មកបោះឆ្នោតប្រឆាំងយើង ។ យើងនឹងតាមដានមើលការបោះឆ្នោតនេះ ។ បើពួកគេបោះឆ្នោតប្រឆាំងយើង នោះយើងនឹងអាចសន្សំប្រាក់បានច្រើន ។ បែបនេះជារឿងស្របច្បាប់សម្រាប់យើង ។
មុននេះតំណាងរបស់សហរដ្ឋអាមេរិកប្រចាំ អ.ស.ប លោកស្រីនីកគី ហាឡី ថ្លែងតាម TWITTER ថា សហរដ្ឋអាមេរិកនឹងកត់ត្រាបណ្តាប្រទេសដែលនឹងរិះគន់ការសម្រេចរបស់ខ្លួននៅឯមហាសន្និបាត អ.ស.ប ។
មហាសន្និបាត អ.ស.ប បានកោះធ្វើសម័យប្រជុំវិសាមញ្ញមួយដើម្បីពិភាក្សានាថ្ងៃទី២១ ធ្នូ ពីលក្ខន្តិកៈក្រុងហ្សេរុយសាឡឹម ។ ក្នុងសប្តាហ៍នេះ សហរដ្ឋអាមេរិកបានប្រើវេតូប្រឆាំងដំណោះ ស្រាយមួយដាក់ដោយអេហ្ស៊ីបជូនក្រុមប្រឹក្សាសន្តិសុខ អ.ស.ប ដែលគម្រោងដំណោះស្រាយនេះស្នើដល់ក្រុងវ៉ាស៊ីនតោនឱ្យដកសេចក្តីសម្រេចរបស់ខ្លួនទាក់ទិនដល់ក្រុងហ្សេរុយសាឡឹម ។ សមាជិកដល់ទៅ១៤របស់ក្រុមប្រឹក្សាសន្តិសុខ អ.ស.ប បានបោះឆ្នោតគាំទ្រគម្រោងដំណោះស្រាយនេះ ក្នុងនោះរួមទាំងមហាអំណាច
២ជាសម្ព័ន្ធមិត្តអាមេរិកផង គឺបារាំង និងអង់គ្លេស ៕
ចែករំលែកព័តមាននេះ