រាជធានីភ្នំពេញ ៖ កម្លាំងនគរបាលខណ្ឌដង្កោបានធ្វើការចាប់ខ្លួនក្រុមអ្នកជួញដូរគ្រឿងញៀនបានចំនួន៤នាក់ព្រមទាំដកហូតបានគ្រឿងញៀនចំនួន១១ញ្ចប់ និងសម្ភារសម្រាប់ប្រើប្រាស់គ្រឿងញៀនមួយចំនួនទៀតផងដែរ ។ ការចាប់ខ្លួននោះបានធ្វើឡើងកាលពីវេលាម៉ោង០២និង៣០នាទីរសៀល ថ្ងៃទី២០ ខែធ្នូ ឆ្នាំ២០១៧ នៅតាមផ្លូវបេតុង ស្ថិតនៅក្នុងភូមិត្រាំដោក សង្កាត់ពងទឹក ខណ្ឌដង្កោ រាជធានីភ្នំពេញ ។|
ជនសង្ស័យទាំង៤នាក់នោះមាន ១.ឈ្មោះ ឌឿន ម៉េងឆាយ ភេទប្រុស អាយុ២០ឆ្នាំ ជនជាតិខ្មែរ មុខរបរមិនពិតប្រាកដ ស្នាក់នៅផ្ទះជួល ក្នុងបុរីសន្តិភាព២ ភូមិត្រាំដោក សង្កាត់ពងទឹក ខណ្ឌដង្កោ ២.ឈ្មោះ សុខ ដាវី ភេទស្រី អាយុ២៥ឆ្នាំ ជនជាតិខ្មែរ មុខរបររត់តុក្នុងហាងផឹកស៊ីមួយកន្លែង ៣.ឈ្មោះ ឡុង ឌី ភេទស្រី អាយុ៥៥ឆ្នាំ ជនជាតិខ្មែរ មុខរបរទិញលក់អេតចាយ និង៤.ឈ្មោះ អេង វ៉ាន់ណេត ភេទប្រុស អាយុ១៩ឆ្នាំ ជនជាតិខ្មែរ មុខរបរមិនពិតប្រាកដ អ្នកទាំង៣នាក់នេះមានទីលំនៅក្នុងភូមិត្រាំដោក សង្កាត់ពងទឹក ខណ្ឌដង្កោ រាជធានីភ្នំពេញ ។ នគរបានដកហូតបានវត្ថុតាងមួយចំនួន១១កញ្ចប់តូច សម្ភារសម្រាប់ប្រើប្រាស់គ្រឿងញៀនមួយចំនួន ថង់សម្រាប់ច្រកថ្នាំញៀនមួយចំនួន ។
នគរបាលបានឲ្យដឹងថា កម្លាំងនគរបាលខណ្ឌដង្កោ បានសហការជាមួយកម្លាំងប៉ុស្តិ៍នគរបាលរដ្ឋបាលពងទឹក ដឹកនាំដោយលោកវរសេនីយ៍ឯក ជឹម ស៊ីថា អធិការនគរបាលខណ្ឌ បានចុះធ្វើការបង្ក្រាបករណីជួញដូរគ្រឿងញៀនខាងលើ ក្រោយពេលទទួលព័ត៌មានពីប្រជពលរដ្ឋ ។ ពេលចុះទៅដល់បុរីសន្តិភាព២ ស្ថិតនៅក្នុងភូមិត្រាំដោក សង្កាត់ពងទឹក កម្លាំងបានឃាត់ខ្លួន ជនសង្ស័យម្នាក់ឈ្មោះ ឌឿន ម៉េងឆាយ រួចធ្វើការត្រួតពិនិត្យរកឃើញថ្នាំញៀនចំនួន១០កញ្ចប់ ដែលជននេះលាក់ទុកនៅក្នុងខោលីអូររបស់ខ្លួន ។
ប្រភដដែលបានបន្តទៀតថា បន្ទាប់មកកម្លាំងបាននាំជនសង្ស័យខាងលើទៅធ្វើការសាកសួរជននេះ បានឆ្លើយសារភាពប្រាប់ថា ខ្លួននៅមានបក្ខពួក៣នាក់ទៀត ។ ក្រោយពេលទទួលបានចម្លើយសារភាពនោះហើយ នៅវេលាម៉ោង០៣និង០០នាទី ថ្ងៃខែឆ្នាំដដែល កម្លាំនគរបាលខាងលើបានបន្តទៅធ្វើការឃាត់ខ្លួនស្ត្រីសង្ស័យ២នាក់ទៀតគឺឈ្មោះ សុខ ដាវី និងឈ្មោះ ឡុង ឌី ព្រមទាំងដកហូតបានវត្ថុតាង រួមមានថ្នាំញៀន១កញ្ចប់តូច និងសម្ភារសម្រាប់ប្រើប្រាស់គ្រឿងញៀនមួយចំនួន ។
ប្រភពខាងលើបានបន្តទៀតថា ស្ត្រីទាំងពីរនាក់នោះបានសារភាពថា ពួកនាងពិតជាបក្ខពួករបស់ជនសង្ស័យឈ្មោះ ឌឿន ម៉េងឆាយ ពិតមែន ហើយក៏នៅមានបក្ខពួកម្នាក់ ។ បន្ទាប់មកនៅវេលាម៉ោង៣និង៣០នាទី ថ្ងៃខែឆ្នាំដដែល កម្លាំងបានធ្វើការស្រាវជ្រាវរហូតឈានដល់ការឃាត់ខ្លួនជនសង្ស័យម្នាក់ទៀតគឺឈ្មោះ អេង វ៉ាន់ណេត ។ ពេលនេះក្រុមអ្នកជួញដូរគ្រឿងញឿនខាងលើត្រូវបាននគរបាលធ្វើការសាកសួរនៅអធិការដ្ឋាននគរបាលខណ្ឌដង្កោ ដើម្បីកសាងសំណុំរឿងចាត់ការតាមនីតិវិធី ៕
ចែករំលែកព័តមាននេះ