រាជធានីភ្នំពេញ ៖ ក្រុមចោរស្ទាវ៦នាក់រួមជាមួយអ្នកទទួលផលចោរកម្មម្នាក់ផងត្រូវបានកម្លាំងនគរបាលខណ្ឌពោធិសែនជ័យធ្វើការចាប់ខ្លួនកាលពីវេលាម៉ោង១១ព្រឹក ថ្ងៃទី២០ ខែធ្នូ ឆ្នាំ២០១៧ ក្រោយពីជនសង្ស័យទាំងនោះបានធ្វើសកម្មភាព កាប់ប្លន់យកម៉ូតូ១គ្រឿងពីយុវជនម្នាក់បណ្ដាលឲ្យជនរងគ្រោះរងរបួសធ្ងន់ធ្ងរកាលពីវេលាម៉ោង៩យប់ថ្ងៃទី១៩ ខែធ្នូ ឆ្នាំ២០១៧ នៅក្នុងភូមិព្រៃបឹង សង្កាត់កន្ទោក ខណ្ឌពោធិសែនជ័យ ។
បន្ទាប់មកបានយកម៉ូតូដែលប្លន់បាននោះទៅលក់ឲ្យជនសង្ស័យម្នាក់ដែលជាអ្នកទទួលបញ្ចាំក្រោយមកត្រូវបានកម្លាំងនគរបាលខណ្ឌដឹកនាំដោយលោកអធិការនគរបាលខណ្ឌពោធិ៍សែនជ័យក្រោមការសម្របសម្រួលពីលោក រៀល សុភិន ព្រះរាជអាជ្ញារងអមសាលាដំបូងរាជធានីភ្នំពេញចុះធ្វើការស្រាវជ្រាវ និងចាប់ខ្លួនបានជាបន្តបន្ទាប់ និងចុះទៅបង្ក្រាបផ្ទះទទួលផលចោរកម្ម និងជាជាងជួសជុលព្រមទាំងទិញលក់ម៉ូតូដែលមានទីតាំងស្ថិតនៅតាមបណ្ដោយផ្លូវបេតុង ក្នុងភូមិសាមគ្គី១ សង្កាត់ត្រពាំងក្រសាំង ខណ្ឌពោធិ៍សែនជ័យ ។
នគរបាលបាននិយាយថា ជនសង្ស័យដែលជាមុខសញ្ញាចោរកាប់ប្លន់ម៉ូតូត្រូវចាប់ខ្លួននោះពួកគេបានប្លន់ម៉ូតូម៉ាកហុងដាស្កុបពី ពណ៌ស ពាក់ស្លាកលេខ ភ្នំពេញ ១AE-៩៣៨៤ នៅថ្ងៃទី១៩ ខែធ្នូ ឆ្នាំ២០១៧ ហើយត្រូវបានរកឃើញផ្ទះទទួលផលចោរកម្មរបស់ឈ្មោះ ហួន វិចិត្រ ហើយម៉ូតូខាងលើនោះគឺជាកម្មសិទ្ធិរបស់ជនរងគ្រោះឈ្មោះ ឈាង ផាន្នី ភេទប្រុស អាយុ២៣ឆ្នាំ មុខរបររត់ម៉ូតូរ៉ឺម៉កកង់បី មានទីលំនៅក្នុងភូមិកៅ ឃុំបែកចាន ស្រុកអង្គស្នួល ខេត្តកណ្តាល ។
អ្នកទទួលផលចោរកម្មខាងលើបានដោះគ្រឿងបំបែកចេញអស់ហើយក្នុងបំណងលក់គ្រឿងកាប់សាច់ ហើយក្រោយពេល កើតហេតុម៉ូតូខាងលើរួមជាមួយម៉ូតូជាច្រើនគ្រឿងទៀតត្រូវបាននគរបាលដកហូតយកចេញពីទីតាំងទទួលបញ្ចាំខាងលើ ទៅរក្សាទុកនៅផ្នែកព្រហ្មទណ្ឌនគរបាលខណ្ឌពោធិ៍សែនជ័យហើយរង់ចាំការចាត់ការតាមច្បាប់ ។
តាមប្រភពពីជនរងគ្រោះបាននិយាយថា នៅមុនពេលកើតហេតុនាយប់ថ្ងៃទី១៩ ខែធ្នូ ឆ្នាំ២០១៧ ខ្លួនបានខ្ចីម៉ូតូបងជិះទៅលេងសង្សារនៅក្នុងបុរីពិភពថ្មីកំបូល លុះដល់ពេលកើតហេតុបានជិះម៉ូតូត្រឡប់ទៅផ្ទះវិញ ហើយពេលទៅដល់ត្រង់ចំណុចកើតហេតុខាងលើស្រាប់តែលេចមុខក្រុមចោរប្លន់មានគ្នាប្រមាណជិត២០នាក់ និងជិះម៉ូតូជាង១០គ្រឿងតាមពីក្រោយ និងស្ទាក់ផ្លូវឲ្យឈប់រួចបានធ្វើសកម្មភាពកាប់ប្រហារមកលើខ្លួនទាំងកំរោល ។
ពេលនោះខ្លួនបានស្រែកអង្វរ និងលើកដៃសុំការអត់ឱនក៏ជនទាំងនោះមិនបានអត់ឱនឲ្យឡើយ ហើយខ្លួនបានរត់គេចពីការសម្លាប់តែជនទាំងនោះនៅតែតាមដេញកាប់សម្លាប់ដដែល ប៉ុន្តែខ្លួនបានព្យាយាមរត់ទាំងការឈឺចាប់រហូតដល់រួចខ្លួនទើបជនសង្ស័យលើកយកម៉ូតូជិះរត់គេចខ្លួនបាត់អស់ ហើយខ្លួនបានទៅដាក់ពាក្យបណ្ដឹងសុំឲ្យនគរបាលជួយស្រាវជ្រាវទើបចាប់ខ្លួនបានជាបន្តបន្ទាប់ ៕
ចែករំលែកព័តមាននេះ