រាជធានីភ្នំពេញ ៖ បុរសជនសង្ស័យជាមុខសញ្ញាដើរធ្វើសកម្មភាពលួចតែកញ្ចក់រថយន្តស៊េរីទំនើបយ៉ាងសកម្មនៅប្លុកទួលស្វាយព្រៃម្នាក់ត្រូវបានកម្លាំងនគរបាលប៉ុស្តិ៍ទួលស្វាយព្រៃទី២ ធ្វើការចាប់ឃាត់ខ្លួន ខណៈដែលរូបគេកំពុងតែជិះម៉ូតូមួយគ្រឿងតាមផ្លូវដើររកធ្វើសកម្មភាពលួចកាច់កញ្ចក់រថយន្តរបស់គេតាមផ្លូវ ហើយត្រូវបានបុរសជាជនរងគ្រោះម្នាក់បានប្រទះឃើញ និងស្គាល់ពីភិនភាគតាមរយៈកាមេរ៉ាសុវត្តិភាពនោះ ។ ការចាប់ឃាត់ខ្លួននេះដែរបានធ្វើឡើងកាលពីវេលាម៉ោង១២នឹង៣០នាទីថ្ងៃត្រង់ ថ្ងៃទី២០ ខែធ្នូ ឆ្នាំ ២០១៨ នៅក្នុងសង្កាត់ទួលស្វាយព្រៃទី២ ខណ្ឌចំការមន ។
តាមប្រភពព័ត៌មានពីនរបាលប៉ុស្តិ៍បានប្រាប់ឱ្យដឹងថា បុរសជាជនសង្ស័យដែលបានឃាត់ខ្លួនមានឈ្មោះ វង្ស ចាន់សុ័ក្ត្រ អាយុ២១ឆ្នាំ មានទីលំនៅផ្ទះគ្មានលេខ ផ្លូវលេខ៤៧ ក្នុងសង្កាត់ស្រះចក ខណ្ឌដូនពេញ ។
មុនពេលកើតហេតុខណៈដែលបុរសជាជនរងគ្រោះម្នាក់បានធ្វើដំណើរតាមផ្លូវនោះក៏ស្រាប់តែបានប្រទះឃើញ បុរសជាជនសង្ស័យម្នាក់ខាងលើកំពុងតែជិះម៉ូតូម៉ាកស្មាស់ ពណ៌ក្រហម ពាក់ស្លាកលេខ ភ្នំពេញ ១AS-២៩៨៥ មួយគ្រឿង ដោយធ្លាប់បានស្គាល់ភិនភាគតាមរយៈរូបភាពកាមេរ៉ាសុវត្ថិភាពអំពីសកម្មភាពបុរសម្នាក់ធ្វើសកម្មភាពលួចកញ្ចក់រថយន្តម៉ាក ឡិចស៊ីស៥៧០ របស់គាត់ចំនួន២លើកមកហើយនោះក៏ហៅធ្វើការសាកសួរ តែរូបគេក៏ជិះម៉ូតូរត់គេចក៏ប្តឹងកម្លាំងល្បាតដែលនៅក្បែរនោះឱ្យធ្វើការតាមដេញតាមទៅដល់ចំណុចខាងលើ ទើបចាប់ឃាត់ខ្លូនគេបាន ។
តាមប្រភពដដែលបានប្រាប់បន្តទៀតថា ពេលដែលកម្លាំងមានសម្ថកិច្ចធ្វើការចាប់ឃាត់ខ្លួនបុរសជាជជនសង្ស័យម្នាក់ខាងលើនេះបាននោះគឺរូបគេកំពុងតែជិះម៉ូតូដើររកធ្វើសកម្មភាពលួចកាច់កញ្ចក់រថយន្តរបស់គេ ដែលចតនៅតាមមុខផ្ទះ ។
ក្រោយពេលដែលកម្លាំងមានសម្ថកិច្ចធ្វើការចាប់ឃាត់ខ្លួនបានបុរសជាជនសង្ស័យម្នាក់ខាងលើបានរួចហើយក៏មានបុរសជាជនរងគ្រោះម្នាក់ទៀតដោយភ្ជាប់មកនូវជាមួយរូបភាពកាមេរ៉ាសុវត្ថិភាពពីសកម្មភាពរបស់រូបគេនាពេលកន្លងមកបានធ្វើសកម្មភាពលួចកញ្ចក់រថន្តស៊េរីទំនើបរបស់គាត់ចំនួន២គ្រឿងគឺម៉ាក អូឌីមួយគ្រឿង និងមួយគ្រឿងទៀតម៉ាកឡិចស៊ីស៥៧០ មួយគ្រឿងទៀត ចំនួន២លើកផងដែរ ។
ក្រោយពេលកើតហេតុក្រុមជនរងគ្រោះទាំងនោះក៏បានមកដាក់ពាក្យបណ្តឹងនៅនគរបាលប៉ុស្តិ៍ទួលស្វាយព្រៃទី២ផងដែរ ចំណែកឯបុរសជនសង្ស័យជាមុខសញ្ញាលួចកញ្ចក់រថយន្តយ៉ាងសកម្មខាងលើក៏បានមកធ្វើការសាកសួរ និងកំណត់ហេតុនៅនគរបាលប៉ុស្តិ៍ទួលស្វាយព្រៃទី២ ដើម្បីបញ្ជូនទៅកាន់អធិការដ្ឋាន នគរបាលខណ្ឌចំការមនចាត់ការទៅតាមនីតិវិធីនៃច្បាប់ជាបន្តទៅទៀត ៕
ចែករំលែកព័តមាននេះ