រាជធានីភ្នំពេញ ៖ អ្នកចាំទីគឺជាសមាជិកដ៏សំខាន់មួយរូបនៅក្នុងក្រុមដែលមានតួនាទីការពារមិនឱ្យគូប្រកួតទាត់បាល់ចូលទីរបស់ខ្លួន ដែលក្នុងទ្រឹស្ដីកីឡាបាននិយាយថា «អ្នកចាំទីគឺជាអ្នកសង្គ្រោះបាល់ចុងក្រោយ»។ ដូច្នេះអ្នកចាំទីចាំបាច់ត្រូវមានភាពរហ័សរហួន កាយសម្បទារឹងមាំល្អ និងត្រូវឆ្លងកាត់ការហ្វឹកហាត់យ៉ាងពិសេសទៀតផង ។ ទាំងអស់នេះជាការលើកឡើងរបស់លោក…
រាជធានីភ្នំពេញ ៖ អ្នកចាំទីគឺជាសមាជិកដ៏សំខាន់មួយរូបនៅក្នុងក្រុមដែលមានតួនាទីការពារមិនឱ្យគូប្រកួតទាត់បាល់ចូលទីរបស់ខ្លួន ដែលក្នុងទ្រឹស្ដីកីឡាបាននិយាយថា «អ្នកចាំទីគឺជាអ្នកសង្គ្រោះបាល់ចុងក្រោយ»។ ដូច្នេះអ្នកចាំទីចាំបាច់ត្រូវមានភាពរហ័សរហួន កាយសម្បទារឹងមាំល្អ និងត្រូវឆ្លងកាត់ការហ្វឹកហាត់យ៉ាងពិសេសទៀតផង ។
ទាំងអស់នេះជាការលើកឡើងរបស់លោក ទេព ឡុងរចនា គ្រូបង្ហាត់កីឡាបាល់ទាត់ដ៏មានបទពិសោធន៍មួយរូបនៅក្នុងក្លិបក្រសួងការពារជាតិ ឆ្លើយតបនឹងសំណួររបស់អ្នកយកព័ត៌មានកោះសន្តិភាពកាលពីពេលថ្មីៗកន្លងទៅនេះ ។
លោក ទេព ឡុងរចនា បានមានប្រសាសន៍បន្តថា អ្នកចាំទីមានតួនាទីការពារឱ្យបានដាច់ខាតពីការទាត់បាល់បញ្ចូលទីពីក្រុមម្ខាងទៀត ដូច្នេះទាមទារការហ្វឹកហាត់ឱ្យរាងកាយមានភាពរស់រវើកតាមរយៈលោតផ្ដេកខ្លួនឆ្វេងស្ដាំ ដើម្បីតាមចាប់គ្រាប់បាល់តាមស្ថានភាពជាក់ស្ដែង និងមានគ្រោះថ្នាក់ច្រើនជាងអ្នកទាត់ ។
លោកថា ដើម្បីក្លាយខ្លួនជាអ្នកចាំទីល្អម្នាក់ កីឡាកររូបនោះត្រូវគោរពវិន័យយកចិត្តទុកដាក់ខ្ពស់ក្នុងការហ្វឹកហាត់ មិនត្រូវមានការធ្វេសប្រហែសនោះទេ ។ ចំណុចមួយទៀត អ្នកចាំទីត្រូវមានកម្លាំងមិនថាអ្នកនោះខ្ពស់ឬទាបនោះទេ ផ្នែកកម្លាំងគឺសំខាន់ខ្លាំងណាស់ តែបើសិនជាគាត់មានកម្ពស់ខ្ពស់កាន់តែល្អថែមទៀត ។ កាលណាយើងមាន
កម្លាំងខ្លាំង យើងអាចលោតបានខ្ពស់ រត់បានលឿន និងសង្គ្រោះបាល់បានទាន់ពេលវេលាមិនតែប៉ុណ្ណោះត្រូវតែមានភាពឈ្លាសវៃជាងអ្នកទាត់ព្រោះក្រុមទាំងមូលត្រូវពឹងផ្អែកលើអ្នកចាំទីពេលឈានចូលដំណាក់កាលចុងក្រោយ បើអ្នកចាំទីសង្គ្រោះបាល់មិនបានទេនោះពិតជាត្រូវគេទាត់ចូលទីមិនខានឡើយ។
លោក សួង ភារម្យ ជាអ្នកទទួលខុសត្រូវលើការហ្វឹកហាត់ដល់អ្នកចាំទីបានលើកឡើងផងដែរថា អ្នកចាំទីមានភារកិច្ចសំខាន់ជាងអ្នកទាត់បន្តិចនៅត្រង់ថា ក្នុងចំណោមសមាជិកក្នុងក្រុមទាំង១១នាក់ ត្រូវមានការទទួលខុសត្រូវខ្លាំងជាងគេ ដូច្នេះការហ្វឹកហាត់របស់គេទាមទារការយកចិត្តទុកដាក់ខ្ពស់ គួបផ្សំជាមួយភាពអំណត់ ភ្នែករវាសមើលឱ្យបានគ្រប់ជ្រុងជ្រោយ ។
ជាក់ស្ដែង កីឡាករម្នាក់មុននឹងទទួលការជ្រើសរើសធ្វើជាអ្នកចាំទីប្រចាំក្រុមឬក្លិបណាមួយកីឡាកររូបនោះត្រូវមានបទពិសោធន៍ច្រើនឆ្នាំ ហើយត្រូវឆ្លងកាត់ការធ្វើតេស្តសមត្ថភាពកម្លាំង ភាពរហ័សរហួន និងវៃឆ្លាតពីគ្រូបង្គោល ជាច្រើនលើកច្រើនសាទៀតផង ។
អ៊ុំ សេរីរ័ត្ន ដែលជាអ្នកចាំទីឱ្យក្រុមជម្រើសជាតិនិងក្រុមក្រសួងការពារជាតិ បានលើកឡើងថា លោកពីមុនក៏ធ្លាប់ធ្វើជាកីឡាករបាល់ទាត់ម្នាក់ដែរ ប៉ុន្តែដោយសារលោកស្រឡាញ់ចូលចិត្តធ្វើជាអ្នកចាំទីជាង គួបផ្សំជាមួយទេពកោសល្យពីធម្មជាតិផងនោះ ទើបលោកហ្វឹកហាត់ជំនាញមួយនេះរហូតទទួលបានឱកាសធ្វើជាអ្នកចាំទីអាជីពរហូតមកទល់ពេលនេះ ។
លោកថា សព្វថ្ងៃលោកខិតខំហ្វឹកហាត់ខ្លាំងណាស់ទៅតាមលំហាត់ដែលគ្រូដាក់ឱ្យ ហើយការហ្វឹកហាត់នេះទៀតមិនមែនហ្វឹកហាត់តែបច្ចេកទេសប៉ុណ្ណោះទេត្រូវហ្វឹកហាត់បង្កើនផ្នែកកម្លាំងទៀតផងធ្វើយ៉ាងណាឱ្យកាយសម្បទារឹងមាំទើបអាចឈរជើងក្នុងតំណែងជាអ្នកចាំទីល្អ ៕
ចែករំលែកព័តមាននេះ