រាជធានីភ្នំពេញ ៖ E-Reader ឬការអានតាមអេឡិចត្រូនិក បានជ្រាបចូលសង្គមកម្ពុជា ដោយយុវជនមួយចំនួនបានប្តូរពីការអានសៀវភៅនៅលើក្រដាស មកអានតាមឧបករណ៍អេឡិចត្រូនិកវិញ ។ ពួកគេអាចអានបាននៅលើទូរស័ព្ទដៃ កុំព្យូទ័រ…
រាជធានីភ្នំពេញ ៖ E-Reader ឬការអានតាមអេឡិចត្រូនិក បានជ្រាបចូលសង្គមកម្ពុជា ដោយយុវជនមួយចំនួនបានប្តូរពីការអានសៀវភៅនៅលើក្រដាស មកអានតាមឧបករណ៍អេឡិចត្រូនិកវិញ ។ ពួកគេអាចអានបាននៅលើទូរស័ព្ទដៃ កុំព្យូទ័រ និងអាយផេតជាដើម តែឧបករណ៍ទាំងនេះ ហាក់មិនសូវផ្តល់ភាពងាយស្រួលដល់អ្នកអានទេ ហើយវាថែមទាំងផ្តល់ផលប៉ះពាល់ដល់ភ្នែកផងដែរ ។
បច្ចុប្បន្ននេះ មានឧបករណ៍ឈ្មោះ Kindle ត្រូវបានអ្នកប្រើប្រាស់មួយចំនួនអះអាងថា ងាយស្រួលអានដូចសៀវភៅដែរ ហើយយុវជនកម្ពុជាមួយចំនួន ក៏ចាប់ផ្តើមងាកមកអាននៅលើឧបករណ៍នេះវិញ ។
Kindle គឺជាឧបករណ៍អានសៀវភៅតាមអេឡិចត្រូនិក ត្រូវបានពេញនិយមប្រើប្រាស់នៅលើពិភពលោក តែនៅកម្ពុជាហាក់មិនសូវមានអ្នកស្គាល់ទេ ។
ឧបករណ៍នេះ រចនា និងលក់ដោយក្រុមហ៊ុន Amazon ។ អ្នកប្រើប្រាស់អាចរកទិញ ទាញយក និងអានសៀវភៅអេឡិចត្រូនិក កាសែត ទស្សនាវដ្តី និងប្រព័ន្ធឌីជីថលផ្សេងៗបាន ។
កញ្ញា ស ពិសី បុគ្គលិកក្រុមហ៊ុនឯកជនមួយ ដែលបានប្តូរមកអានសៀវភៅតាម Kindle រយៈពេល៤ខែបានប្រាប់ថា ការអានតាម Kindle ផ្តល់ភាពងាយស្រួលជាងសៀវភៅ ។
កញ្ញាបន្តថា ដោយសារតែឧបករណ៍នេះតូច ស្រាល ងាយស្រួលយកតាមខ្លួន មើលបានច្រើន ចំណាយលុយតិច ហើយសៀវភៅខ្លះ download បានដោយមិនចំណាយលុយ ។ ម្យ៉ាងវិញទៀត Kindle ក៏មានតម្លៃសមរម្យដែរ ។
កញ្ញា ស ពិសី អះអាងថា ៖« កាលពីមុនពេលអត់មាន Kindle ខ្ញុំអានតាមទូរស័ព្ទ ឬកុំព្យូទ័រ ប៉ុន្តែចំណុចពិសេសរបស់ Kindle វាល្អជាង ។ ពេលយើងអាន យើងផ្តោតទៅលើតែ Kindle ដែលយើងកាន់នៅលើដៃ តែបើយើងអានតាមទូរស័ព្ទ ខ្ញុំគិតថា ខ្ញុំបែងចែកអារម្មណ៍អត់សូវបាន ។ ណាមួយទៀត Kindle មានចំណុចពិសេសត្រង់ថា យើងទៅណាមកណា ទៅសមុទ្រអី ក៏យើងអាចយកវាទៅអានបាន ព្រោះស្គ្រីនរបស់វាតម្រូវនឹងបរិយាកាសខាងក្រៅ អីចឹង វាអាចជួយយើងបានដែរ » ។
កញ្ញាបានឱ្យដឹងថា បន្ទាប់ពីបានប្រើប្រាស់ឧបករណ៍នេះ ជួយឱ្យកញ្ញាអានបានច្រើនជាងមុន ។
លោក ថៃ វ៉ាន់ថា ហៅ jerry thai ជាស្ថាបនិកក្រុមហ៊ុនថតនៅកម្ពុជា @homePhotography គឺជាមនុស្សម្នាក់ដែលចូលចិត្តអាន។ លោកបានចំណាយពេលប្រមាណ១ម៉ោងក្នុង១ថ្ងៃដើម្បីអាន ប៉ុន្តែលោកបានជ្រើសរើសការអានតាមអេឡិចត្រូនិក តាមរយៈឧបករណ៍ Kindle។ លោកបានចាប់ផ្តើមប្តូរមកអានតាមឧបករណ៍នេះជិត១ឆ្នាំហើយ ។ លោកបានប្រាប់ថា អានតាមឧបករណ៍នេះងាយស្រួលជាងសៀវភៅ ។
លោកបានឱ្យដឹងថា គុណសម្បត្តិនៃឧបករណ៍នេះ ទោះជាអានច្រើនប៉ុនណា ក៏មិនឈឺភ្នែក ព្រោះស្គ្រីនរបស់វាមិនចាំង ងាយស្រួលមើល ហើយវាស្រាល និងស្រួលកាន់ជាងសៀវភៅ ។
លោក ថៃ វ៉ាន់ថា និយាយថា ៖« វាងាយស្រួលប្រើជាងសៀវភៅ ហើយនៅក្នុងហ្នឹង វាមានសៀវភៅច្រើន ។ ប្រសិនបើយើងប្រើជាលក្ខណៈ Official ពី Amazon គឺសៀវភៅនោះវា Save នៅក្នុងអុីនធើរណេត ថ្ងៃណាយើងចង់ download មកវិញក៏បាន ។ បើសៀវភៅវិញ ពេលដែលយើងបើកម្តងវាពិបាក ជាធម្មតា យើងឃើញហើយសៀវភៅវាកោង ដល់អីចឹង កន្លែងកាច់វាហ្នឹងពិបាកមើលណាស់ ចេះតែទើស កាន់ទៅអត់ស្រួលទេ ហើយពេលយើងអានត្រូវការរយៈពេលយូរទៀតកាន់តែយ៉ាប់ ។ នេះជាចំណុចដែលខ្ញុំមើលឃើញខុសគ្នា ហើយបើធៀបនឹងឧបករណ៍ផ្សេងដូចជា ទូរស័ព្ទ ឬថេបប្លេត នៅធ្ងន់ជាង Kindle ឆ្ងាយណាស់ » ។
លោក ស៊ិន កុសល ជាគ្រូបង្រៀននៅសាលាឯកជន និងជាអ្នកលក់ Kindle តាមអនឡាញ បានប្រាប់ថា ការអានតាម Kindleមានអត្ថប្រយោជន៍ច្រើន ដោយសារឧបករណ៍នេះស្រាលងាយស្រួលយកតាមខ្លួន និងអាចផ្ទុកសៀវភៅបានពី១ពាន់ទៅ៣ពាន់ក្បាល ព្រមទាំងអាចអានបានគ្រប់ភាសាទាំងអស់ មិនថាអង់គ្លេស បារាំង ឬខ្មែរទេ ។
លោកបានឱ្យដឹងដែរថា អាននៅលើ Kindle អាចអានបានយូរជាងអាននៅលើទូរស័ព្ទដៃ ឬអាយផេត ដោយសារតែស្គ្រីនវាដូចក្រដាសមិនធ្វើឱ្យឈឺភ្នែក ហើយវាជាឧបករណ៍ដែលកាន់ថ្មបានយូរ សាក៤ម៉ោង តែអាចប្រើបានរហូតដល់១ខែ ឬ២ខែ ។
ជាមួយគ្នានេះដែរ ឧបករណ៍នេះក៏ផ្តល់ភាពងាយស្រួលដល់អ្នកអានផងដែរ ប្រសិនបើអានជួបពាក្យពិបាកៗ គេអាចឆែកមើលអត្ថន័យភ្លាមៗ ដោយមិនចាំបាច់ប្រើអ៊ីនធើរណេត ដោយសារវាមានវចនានុក្រមស្រាប់នៅលើនោះ។ ម្យ៉ាងវិញទៀត ប្រសិនបើអ្នកអានចង់ដាក់ពណ៌ចំណាំនៅលើនោះ គេអាចដាក់ពណ៌សម្រាប់ចំណាំបាន ។ មិនតែប៉ុណ្ណោះ គេក៏អាចសរសេរពាក្យកត់សម្គាល់លើនោះបានដែរ ។
លោក ស៊ិន កុសល បានចាប់ផ្តើមលក់ឧបករណ៍អានតាមអេឡិចត្រូនិកនេះកាលពីឆ្នាំ២០១៥ បន្ទាប់ពីលោកមើលឃើញថា Kindle ផ្តល់អត្ថប្រយោជន៍ច្រើន និងដើម្បីជំរុញឱ្យមានការអានផងដែរ ។
លោកបន្តថា នៅឆ្នាំដំបូងដែលលោកចាប់ផ្តើមលក់ ហាក់មិនសូវមានការចាប់អារម្មណ៍ពីយុវជនកម្ពុជាទេ ដោយសារតែមិនសូវមានអ្នកស្គាល់ ប៉ុន្តែនៅឆ្នាំ២០១៧នេះឃើញថា មានការចាប់អារម្មណ៍គួរសម ប៉ុន្តែក៏តែមានកម្រិត ។ លោកបានឱ្យដឹងថា ក្រោយពីមានការចាប់អារម្មណ៍តិចតួចពីយុវជន ក្នុង១ខែលោកអាចលក់បានពី១០គ្រឿងទៅ៣០គ្រឿង ហើយខែខ្លះអាចលក់បាន៥០គ្រឿង ។
សម្រាប់អតិថិជនដែលបញ្ជាទិញភាគច្រើន គឺសិស្ស និងអ្នកមានការងារធ្វើ ប៉ុន្តែក៏មានឪពុកម្តាយខ្លះទិញសម្រាប់ឱ្យកូនតូចៗរបស់ពួកគេដែរ ដោយសារពួកគាត់ចង់ឱ្យកូនចេះប្រើឧបករណ៍នេះ ។
ទាក់ទិននឹងការប្តូរទម្លាប់ពីការអានតាមសៀវភៅ មកអានលើឧបករណ៍អេឡិចត្រូនិកនេះ លោក ង៉ែត ជូ ទីប្រឹក្សាជាន់ខ្ពស់ផ្នែកសេដ្ឋកិច្ច និងអភិវឌ្ឍន៍នៃក្រុមហ៊ុន Emerging Market Consulting យល់ថា ការងាកមកអានតាមអេឡិចត្រូនិកធ្វើឱ្យអ្នកអានមានភាពបត់បែន ងាយស្រួលយកតាមខ្លួន និងជួយថែរក្សាបរិស្ថាន ប៉ុន្តែវាក៏អាចធ្វើឱ្យអ្នកអានបែកអារម្មណ៍ទៅបណ្តាញផ្សេងៗ ដែលពេលខ្លះ គាត់អាចនឹងអានបណ្តើរ និងលេងបណ្តាញសង្គមបណ្តើរ ។
លោកថា ប្រសិនបើនៅកម្ពុជាមានការលក់សៀវភៅលើអនឡាញ ត្រូវគ្រប់គ្រងឱ្យច្បាស់លាស់ ព្រោះវាអាចនឹងប៉ះពាល់ដល់ច្បាប់កម្មសិទ្ធិបញ្ញា ។
លោក ង៉ែត ជូ ថ្លែងថា ៖« ចង់មិនចង់ វាអាចនឹងមានផលប៉ះពាល់ហើយ ប្រសិនបើច្បាប់កម្មសិទ្ធិបញ្ញាមិនអាចគ្រប់គ្រងបាន » ។
យ៉ាងណាមិញ អ្នកវិភាគសេដ្ឋកិច្ចរូបនេះលើកឡើងថា បើទោះបីជា Kindle ជាឧបករណ៍ងាយស្រួលអាន ស្រួលយកតាមខ្លួន និងផ្ទុកសៀវភៅបានច្រើន លោកថា មិនអាចប៉ះពាល់ការបោះពុម្ភជាសៀវភៅបានទេ ព្រោះដោយសារទម្លាប់នៃអានរបស់ប្រជាពលរដ្ឋខ្មែរមិនទាន់ទូលំទូលាយ ។ ហេតុនេះ ពួកគេមិនសូវទិញឧបករណ៍វិនិយោគទៅលើការអានទេ ហើយប្រសិនបើអ្នកនិពន្ធសៀវភៅកម្ពុជាងាកមកលក់សៀវភៅតាមអ៊ីនធើរណេតវិញ ក៏ទីផ្សារមិនសូវទូលំទូលាយដែរ ៕
ចែករំលែកព័តមាននេះ