ខេត្តកំពង់ឆ្នាំង ៖ ប្រជាពលរដ្ឋរស់នៅតាមដងផ្លូវលេខ១ ក្នុងភូមិទី១ និងភូមិទី៧ សង្កាត់ខ្សាម ក្រុងកំពង់ឆ្នាំង បានសម្តែងក្តីព្រួយបារម្ភថា ដោយសារផ្លូវមួយខ្សែកាត់តាមមុខផ្ទះរបស់ពួកគាត់បានបង្កជាដីហុយ ដែលបណ្តាលមកពីរថយន្តដឹកដី…
ខេត្តកំពង់ឆ្នាំង ៖ ប្រជាពលរដ្ឋរស់នៅតាមដងផ្លូវលេខ១ ក្នុងភូមិទី១ និងភូមិទី៧ សង្កាត់ខ្សាម ក្រុងកំពង់ឆ្នាំង បានសម្តែងក្តីព្រួយបារម្ភថា ដោយសារផ្លូវមួយខ្សែកាត់តាមមុខផ្ទះរបស់ពួកគាត់បានបង្កជាដីហុយ ដែលបណ្តាលមកពីរថយន្តដឹកដី និងរថយន្តបើកក្នុងល្បឿនលឿន ធ្វើឲ្យការរស់នៅរបស់ពួកគាត់មួយរយៈនេះ ជួបការលំបាក និងខ្លះទៀតមានជំងឺផ្សេងៗ ហេតុនេះហើយពួកគាត់ សំណូមពរដល់អាជ្ញាធរខេត្ត ក្រុងសូមមានវិធានការជួយទប់ស្កាត់ផលប៉ះពាល់នេះផង។ ប្រជាពលរដ្ឋបានដែលរស់នៅតាមដងផ្លូវនោះបានលើកឡើងថា សព្វថ្ងៃនេះពួកគាត់ជួបការលំបាកខ្លាំងណាស់ រឿងដីហុយ ដែលបង្កឡើងដោយរថយន្តដឹកដី និង រថយន្តដែលបើកលឿនៗ ធ្វើឲ្យដីហុយពេញបន្ទុក ធ្វើឲ្យពួកគាត់ជួបការលំបាកក្នុងការរស់នៅ រហូតដល់មានអ្នកឈឺទៀតផង។ សព្វថ្ងៃនេះដីហុយបានគ្របដណ្តប់ផ្ទះសម្បែង ផលដំណាំ របស់តាំងលក់មុខផ្ទះ និងអ្នកប្រកបរបរលក់បបរ នំបញ្ចុក នៅពេលព្រឹកក៏ជួបបញ្ហាដែរ។
ដោយសារតែបញ្ហាគ្មានដំណោះស្រាយនេះហើយ ទើបពួកគាត់តាមផ្ទះ បានយកឈើ ឬបង្គោល និងខ្លះមានធុងសាំង នាំគ្នាដាក់មុខផ្ទះ ក្នុងគោលបំណងឲ្យរថយន្តទាំងនោះបង្អង់ល្បឿន កាត់បន្ថយការហុយខ្លះដែរ តែកន្លងមកឃើញសមត្ថកិច្ចនគរបាលប៉ុស្តិ៍ បាននាំគ្នាមកប្រមូលយករបស់ទាំងនោះចេញ ហើយនិយាយថា បានធ្វើឲ្យបាត់បង់សណ្តាប់ធ្នាប់ ពួកគាត់គ្មានបំណងធ្វើឲ្យផ្លូវក្លាយជាគ្មានសណ្តាប់ធ្នាប់ទេ តែនេះវាហុយពេក គ្មានជម្រើស ពេលបានដាក់ឈើ និងរបស់ជាសញ្ញាឲ្យរថយន្តបន្ថយល្បឿន ឃើញថាបានប្រសិទ្ធភាពខ្លះដែរ គ្រាន់បើជាងមិនដាក់សោះ ដែលធ្វើឲ្យអ្នកបើកឡានបើកលឿនៗ យកតែឈ្នះដៃ។ ពួកគាត់សំណូមពរដល់ឯកឧត្តម អភិបាលខេត្តកំពង់ឆ្នាំង សូមជួយមានវិធានការជួយប្រជាពលរដ្ឋផង ដោយឲ្យក្រុមហ៊ុនដឹកដី ជួយបាញ់ទឹកលើផ្លូវកុំឲ្យហុយខ្លាំងពេក ព្រោះបើមិនដូច្នោះទេ កូនចៅប្រជាពលរដ្ឋនឹងឈឺអស់ហើយ។
ជុំវិញបញ្ហានេះ លោក យិន សាវ៉េន អភិបាលក្រុងកំពង់ឆ្នាំង ដែលទើបចូលកាន់ដំណែងថ្មី បានមានប្រសាសន៍ថា លោកទើបទទួលបានព័ត៌មាននេះនៅរសៀលថ្ងៃទី១៩ ហើយព្រឹកថ្ងៃទី២០ ខែធ្នូនេះ លោកក៏បានអញ្ជើញទៅពិនិត្យមើលដែរ ពិតជាឃើញហុយខ្លាំងមែន ដែលមិនមែនតែរថយន្តដឹកដីទេ រថយន្តអ្នករកស៊ី និងរថយន្តជិះធម្មតានឹងក៏បង្កដីហុយដែរ ព្រោះបើកលឿនៗពេក។ បញ្ហានេះលោកនឹង កោះប្រជុំពិភាក្សាគ្នា រកដំណោះស្រាយ គួរធ្វើបែបណា ទី១-ផ្សព្វផ្សាយកុំឲ្យពួកគាត់បើករថយន្តលឿនៗពេក ទី២-នឹងស្នើសុំក្រុមហ៊ុនដឹកដី ជួយបាញ់ទឹកលើផ្លូវផងកុំឲ្យហុយ បើមិនបានរាល់ថ្ងៃសុំមួយសប្តាហ៍បាញ់ទឹក ២-៣ដងក៏បានដែរ ដើម្បីជួយកាត់បន្ថយការហុយខ្លាំងពេក នេះជាកាតដោះស្រាយបន្ទាន់៕
ចែករំលែកព័តមាននេះ