ខេត្តកំពត ៖ នៅព្រឹកថ្ងៃទី២០ ខែធ្នូ ឆ្នាំ២០១៧ នេះនៅសាលាបឋមសិក្សាហ៊ុនសែន១មករា ស្ថិតក្នុងភូមិទ្វីខាងជើង សង្កាត់អណ្តូងខ្មែរ ក្រុងកំពត មានរៀបចំធ្វើពិធីសម្ពោធសមិទ្ឋិផលនានានៅក្នុងសាលាដែលបានកសាងនាពេលកន្លងមកដែលជាអំណោយពីសម្បុរសជន និងមាតាបិតាសិស្សដែលបានចូលរួម ។
នៅក្នុងកម្មវិធីនេះដែរប្រព្រឹត្តទៅក្រោមអធិបតីភាពលោកស្រី ចាន់ កញ្ញា អភិបាលរងក្រុងកំពត លោក ស្រីថេង សុខន តំណាងចៅសង្កាត់អណ្តូងខ្មែរ លោក ស្រីតំណាងអង្គការ KUCSS របស់ក្រុមប្រឹក្សានៃសកលវិទ្យាល័យកូរ៉េសំរាប់សេវាសង្គម និងលោកប្រធានការិយាល័យអប់រំក្រុងកំពត លោក ម៉ក់ ឆាឡែន នាយកសាលាបឋមសិក្សាហ៊ុនសែន១មករា និងមានការចូលរួមពីតំណាងមាតាបិតាសិស្សដ៍ច្រើនកុះករផងដែរ ។
លោក ម៉ក់ ឆាឡែន នាយកសាលាបានឡើងធ្វើរបាយការណ៍សង្ខេបអំពីសមិទ្ឋិផលនានានៅក្នុងសាលាដែលបានកែលំអរ និងកសាងឡើងវិញនាពេលកន្លងមកថ្មីៗនេះដូចជាចាក់ផ្លូវបេតុងក្នុងបរិវេណសាលាបានប្រវែង១១២ម៉ែត្រនាឆ្នាំ២០១៦ កន្លងមក និងថ្មីៗនេះបានចាក់ដីបន្ថែមក្នុងទីធ្លាសាលាឲ្យបានខ្ពស់ជាងមុនបន្ថែមទៀតដើម្បីកុំឲ្យទឹកលិចក្នុងបរិវេណសាលា ។
ដោយលោកបានបញ្ជាក់ថា នៅក្នុងទីធ្លាបរិវេណបឋមសិក្សាមួយនេះដែលកន្លងមកឲ្យតែឈានចូលរដូវវស្សាមានភ្លៀងធ្លាក់សាលាបឋមសិក្សាហ៊ុនសែន១មករា នេះតែងតែទទួលរងកម្មជាងគេទាំងអស់សំរាប់សាលាក្នុងសង្កាត់អណ្តូងខ្មែរក្រុងកំពតមួយនេះ ។
លោកនាយកសាលាបានបន្តទៀតថា ក្រោយពីឃើញទីធ្លាសាលាជួបការលំបាកសំរាប់ក្មួយៗរត់លេងនៅម៉ោងសំរាកម្តងៗយើងខ្ញុំជាអ្នកគ្រប់គ្រងសាលាបានធ្វើការអំពាវនាវដល់អាជ្ញាធរក្រុង-សង្កាត់ និងមាតាបិតាសិស្សដើម្បីឲ្យចូលរួមចំណែកកែលំអរទីធ្លាបរិវេណសាលាដ៏កំសត់មួយនេះ ។
ពេលនោះក៏មានអាជ្ញាធរភូមិសង្កាត់ និងការិល័យអប់រំក្រុងកំពតផងដែរបានយកចិត្តទុកដាក់សហការល្អរហូតជួយអំពាវនាវដល់មាតាបិតាសិស្សបានជួយឧបត្ថម្ភជាថវិកាតាមកំលាំងសទ្ធាជាបន្តបន្ទាប់មករហូតសាលាបានចាក់ដីបន្ថែមក្នុងទីធ្លាសាលា និងចាក់បេតុងបន្ថែមទៀតនៅក្នុងទីធ្លាសាលានេះ ៕
ចែករំលែកព័តមាននេះ