ខេត្តកែប ៖ ដើម្បីការពារសន្តិសុខសណ្តាប់ធ្នាប់របៀបរៀបរយក្នុងពិធីបុណ្យសមុទ្រ និងការពារសុវត្ថិភាពជូនសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ក្នុងពិធីសម្ពោធអគារសិក្សានៅវិទ្យាល័យប៊ុនរ៉ានីចរិយាវង្ស នាពេលខាងមុខនេះនៅព្រឹកថ្ងៃទី១៩ ខែធ្នូ ឆ្នាំ២០១៧ លោកឧត្តមសេនីយ៍ទោអ៊ីង សំអុល ស្នងការនគរបាលខេត្តកែប បានធ្វើការផ្សព្វផ្សាយគោលការណ៍សំខាន់ៗចំនួន៧ចំណុចសម្រាប់អនុវត្តក្នុងគោលបំណងបញ្ចៀសនូវហេតុការណ៍កើតឡើងជាយថាហេតុផ្សេងៗ ។
លោកស្នងការក៏បានជម្រុញដល់សាធារណជនបងប្អូនប្រជាពលរដ្ឋគ្រប់មជ្ឈដ្ឋានត្រូវអនុវត្តតាមការផ្សព្វផ្សាយដូចខាងក្រោយទី១-អាជ្ញាធរនឹងបិទផ្លូវជាតិលេខ៣៣A ចាប់ពីចំណុចមុខសាលាខេត្តកែប រហូតទៅដល់ឆ្នេរហែលទឹក ដោយការបិទចរាចរណ៍នេះនឹងត្រូវបិទចាប់ពីថ្ងៃទី២២ រហូតដល់ថ្ងៃទី២៤ ខែធ្នូ ឆ្នាំ២០១៧ ហើយឲ្យបងប្អូនជាអ្នកដំណើរដែលត្រូវឆ្លងកាត់នេះធ្វើដំណើរតាមផ្លូវវាងដោយមានកងកម្លាំងនគរបាលចរាចរណ៍ និងកម្លាំងកងរាជអាវុធហត្ថជាអ្នកបង្ហាញផ្លូវ ។ ទី២- សាធារណជន និងភ្ញៀវដែលមកលេងបុណ្យសមុទ្រនេះ សូមឲ្យមានការប្រុងប្រយ័ត្នម្ចាស់ការលើផ្នែកសន្តិសុខផ្ទាល់ខ្លួន ទាំងមធ្យោបាយផ្ទាល់ខ្លួន ក៏ដូចជាគ្រឿងអលង្ការជាដើម ជម្រើសដ៏ល្អគួរផ្ញើមធ្យោបាយទាំងនោះនៅកន្លែងដាក់បញ្ញើរទើបប្រសើរធ្វើបែបនេះយើងជៀសវាងការបាត់បង់ទ្រព្យសម្បតិ្តមានតម្លៃផ្សេងៗ ។
ទី៣- លោកស្នើសុំក្នុងការប្រុងប្រយ័ត្នចំពោះក្មេងតូចៗដែលមកតាមជាមួយ ដើម្បីជៀសវាងការវង្វេងព្រោះ ក្នុងពិធីបុណ្យសមុទ្រនេះមានមនុស្សច្រើន ហើយបើមានករណីវង្វេងសូមរាយការណ៍ប្រាប់សមត្ថកិច្ច ដើម្បីឲ្យជួយប្រកាសរក និងជម្រើសដ៏ល្អគួរសរសេរលេខទូរស័ព្ទដាក់តាមហោប៉ៅកូនរបស់ខ្លួន ។ ទី៤-សុំឲ្យប្រុងប្រយ័ត្ន និងបង្កាអគ្គិភ័យមុនពេលចេញពីផ្ទះសូមពិនិត្យមើលភ្លើងទៀន ភ្លើងធូប ឬចរន្តអគ្គិសនី បើអាចបិទបារ៉ែតកាន់តែល្អ ហើយត្រូវបិទបង្អួត ចាក់សោរទ្វារផ្ទះឲ្យបានត្រឹមត្រូវ ។ ចំពោះអាជីវករក្នុងតំបន់ ពិសេសចំណុចផ្សារក្តាមសូមបង្កាប្រុងប្រយ័ត្នខ្ពស់រាល់ការប្រើហ្កាសចំអិនអាហារ គួរបង្កាបំពង់សម្រាប់ពន្លត់អគ្គីភ័យរបស់ខ្លួនជាប្រចាំ ។ ទី៥-លោកស្នើសុំកុំឲ្យប្រើប្រាស់ឧបករណ៍ និងសម្ភារ ដែលគណកម្មការអន្តរក្រសួង និងសមត្ថកិច្ចបានហាមឃាត់ និងច្បាប់ហាមប្រាម ដូចជាការប្រើឯកសណ្ឋានខុសច្បាប់ រួមមាន ឯកសណ្ឋានប៉ូលិសកងខេមរភូមិន្ទ កងរាជអាវុហត្ថជាដើម ។ ក្នុងពិធីនេះហាមដាច់ខាតមិនឲ្យប្រើប្រាស់អាវុធជាតិផ្ទុះ ដាវ កាំបិត ខ្នោះដៃ ស្នាប់ដៃ ដែលសុទ្ធសឹងជាឧបករណ៍ល្មើសច្បាប់ ។ ក្រៅពីនោះបើពុំមានការចាំបាច់ គឺមិនអនុញ្ញាតឲ្យប្រើផាវ និងកាំជ្រួចឡើយ ។
ទី៦-ស្នើសុំកុំឲ្យមានការបង្ហោះដ្រូន (Drone) ដោយការប្រើដ្រូននៅទីនោះមានតែអ្នកយកព័ត៌មាន ទូរទស្សន៍ក្នុងអង្គភាពណាមួយ ដែលបានស្នើសុំពីគណកម្មការ អន្តរក្រសួងរួចហើយ ។ ទី៧-សាធារណជន ពិសេសភ្ញៀវដែលមកលេងនៅទីនេះ ត្រូវស្វែងយល់ពីលេខទូរស័ព្ទរបស់កម្លាំងសមត្ថកិច្ច ព្រោះពេលនេះសមត្ថកិច្ចយើងក៏បានផលិតលេខទូរស័ព្ទទាន់ហេតុការណ៍ជាច្រើនខ្សែផងដែរ ។ តាមរយៈនេះបើសាធារណជនមានបញ្ហាមិនប្រក្រតីណាមួយ សូមផ្តល់ដំណឹងជូនសមត្ថកិច្ចដែលមានគ្រប់កន្លែងនៅទីនោះ ដើម្បីចាត់ការទាន់ពេលវេលា ។
សូមជម្រាបថា ពិធីបុណ្យសមុទ្រលើកទី៦ ជុំទី២ នៅខេត្តកែបនឹងត្រូវធ្វើឡើងតាមការកំណត់នៅថ្ងៃទី២២,២៣,២៤ ខែធ្នូ ឆ្នាំ២០១៧ ដោយមានការប្រគុំតន្ត្រីគ្រប់ប្រភេទ ទាំងបុរាណ ទាំងសម័យ ដែលមានការចូលរួមសំដែងពីតារាល្បីៗប្រចាំព្រះរាជាណាចក្រកម្ពុជា និងមានការប្រកួតកីឡា លើឆ្នេរខ្សាច់ លើទឹកនិងលើអាកាសផងដែរ ។ ដោយឡែកស្តង់ដែលយកមកបង្ហាញផលិតផលក្នុងពិធីបុណ្យសមុទ្រនេះមានចំនួន៥២០ស្តង់ ៕
ចែករំលែកព័តមាននេះ