ខេត្តកណ្តាល ៖ សាលាដំបូងខេត្តកណ្តាល នៅព្រឹកថ្ងៃទី១៩ ខែធ្នូ ឆ្នាំ២០១៧ នេះ បើកសវនាការសំណុំរឿងក្រុមចោរប្លន់ឆ្លងខេត្តយ៉ាងកក្រើកចំនួន៥នាក់ ដែលមានរហស្សនាមក្រៃថោង ។
សវនាការនេះ ដឹកនាំដោយលោក សាយ សម្ផស្សសេរី ជាប្រធានក្រុមប្រឹក្សាជំនុំជម្រះ លោក គឹម ម៉េង លោក ទី សំណាង ជាសមាជិកក្រុមប្រឹក្សា និងលោក សំម ឫទ្ធីវាសនា ជាតំណាងអយ្យការ ។ ក្នុងពេលសវនាការនេះ អនុរក្សពន្ធនាគារ មានការយាមកាមយ៉ាងតឹងរឹងផងដែរ ។ ក្រុមចោរប្លន់ទាំងនេះ គឺមានសំណុំរឿងប្លន់ជាច្រើនករណី ហើយថ្មីៗនេះ ពួកគេធ្លាប់ត្រូវបានផ្តន្ទាទោសម្តងរួចម្តងហើយ ដោយដាក់ពន្ធនាគារម្នាក់ៗ៨ឆ្នាំ ។
សូមរំឭកជាថ្មីម្ដងទៀតថា កាលពីល្ងាចថ្ងៃទី០៧ ខែមីនា ឆ្នាំ២០១៧ នគរបាលខេត្ដកណ្ដាល បានបង្ហាញមុខក្រុមចោរប្លន់ប្រដាប់អាវុធ១០នាក់ ដែលកន្លងមកធ្លាប់បានធ្វើសកម្មភាពប្លន់យ៉ាងកក្រើកនៅក្នុងភូមិសាស្ត្រខេត្ដមួយចំនួន ។
នគរបាលបានថ្លែងថា ក្រុមចោរទាំង១០នាក់ ដែលត្រូវបង្ហាញមុខនៅថ្ងៃនេះរួមមាន ទី១.ឈ្មោះ ឈឹម សុផល ទី២.ឈ្មោះ ស្រី ស្រាន់ ហៅជាតិ ភេទប្រុស អាយុ២៣ ទី៣.ឈ្មោះ ហ៊ីង នី ហៅប៉េន ហៅអាមមីស (ជាមេខ្លោង) ទី៤.ឈ្មោះ ហ៊ុត ហាន ហៅតូច ភេទប្រុស អាយុ៣៥ឆ្នាំ ទី៥.ឈ្មោះ ហ៊ុល សុធី ហៅផាន់ គឹមយន់ ហៅក្រៃថោង (ជាមេខ្លោង) ទី៦.ឈ្មោះ ឆៃណាន ភិរម្យ ហៅណាល់ នឿន ភេទប្រុស អាយុ៣៥ឆ្នាំ ទី៧.ឈ្មោះ ជឿន ចិន្ដា អាយុ៣៥ឆ្នាំ ទី៨.ឈ្មោះ ហ៊ិន ចាន់ថា ភេទប្រុស អាយុ៣១ឆ្នាំ ទី៩.ឈ្មោះ ហៀង សុផា និងទី១០.ឈ្មោះ ឃឿន បុរី ភេទប្រុស អាយុ៣៧ឆ្នាំ ។
លោក រឿន ណារ៉ា ស្នងការរងបានថ្លែងទៀតថា ប្រតិបត្ដិការបង្ក្រាបឃាត់ខ្លួនក្រុមចោរប្លន់ជាលក្ខណៈទ្រង់ទ្រាយធំនេះ ធ្វើឡើងផ្ដើមចេញក្រោយពីកើតមានករណីប្លន់ប្រដាប់អាវុធទៅលើផ្ទះផ្ទេរប្រាក់វីងមួយកន្លែង នៅភូមិសាស្ត្រឃុំព្រែកតាកូវ ស្រុកខ្សាច់កណ្ដាល ខេត្ដកណ្ដាល កាលពីយប់ថ្ងៃទី១២ ខែធ្នូ ឆ្នាំ២០១៥ ។
ក្រុមចោរប្លន់ទាំង១០នាក់ខាងលើនេះ ត្រូវបានឃាត់ខ្លួនជាបន្ដបន្ទាប់ចាប់តាំងពីថ្ងៃទី២៥ ខែកុម្ភៈ ឆ្នាំ២០១៦ រហូតដល់ថ្ងៃទី០៧ ខែមីនា ឆ្នាំ២០១៧ នេះ នៅក្នុងភូមិសាស្ដ្រខេត្ដកណ្ដាល ខេត្ដកំពង់ចាម និងនៅរាជធានីភ្នំពេញ ។ ក្នុងប្រតិបត្ដិការបង្ក្រាបឃាត់ខ្លួនក្រុមចោរខាងលើនេះសមត្ថកិច្ច បានធ្វើការដកហូតកាំភ្លើងខ្លីម៉ាក K៥៩ ចំនួន១ដើម និងម៉ូតូ៥គ្រឿង ជាមធ្យោបាយជិះធ្វើសកម្មភាព ។
លោកបានបន្តបញ្ជាក់ថាទៀថា ក្រុមចោរទាំងនេះជាមុខសញ្ញាប្លន់ប្រដាប់អាវុធដ៏សកម្ម កន្លងមកធ្លាប់ធ្វើសកម្មភាព ប្លន់នៅខេត្ដមួយចំនួនក្នុងប្រទេស ហើយក៏ធ្លាប់ត្រូវបានសមត្ថកិច្ចចាប់ខ្លួនបញ្ជូនទៅកាន់ពន្ធនាគារជាច្រើនលើកច្រើនសារផងដែរ ៕
ចែករំលែកព័តមាននេះ