រាជធានីភ្នំពេញ ៖ មន្ត្រីអគ្គនាយកដ្ឋានកសិកម្មនៃក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ប្រតិភូកម្ពុជាដឹកនាំដោយលោកឧបនាយករដ្ឋមន្ត្រី យឹម ឆៃលី និងរដ្ឋមន្ត្រីក្រសួងកសិកម្ម…
រាជធានីភ្នំពេញ ៖ មន្ត្រីអគ្គនាយកដ្ឋានកសិកម្មនៃក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ប្រតិភូកម្ពុជាដឹកនាំដោយលោកឧបនាយករដ្ឋមន្ត្រី យឹម ឆៃលី និងរដ្ឋមន្ត្រីក្រសួងកសិកម្ម បានធ្វើដំណើរទៅប្រទេសចិនដើម្បីជំរុញការស្វែងរកទីផ្សារ និងបញ្ចប់់នូវការចរចារវាងកម្ពុជានិងចិន ដែលធ្លាប់បានពិភាក្សាកន្លងមក ហើយនឹងដាក់សំណើសុំថ្មី គឺបើកទីផ្សារអនាម័យ និងភូតគាមអនាម័យលើផ្លែតាង៉ែននៅប្រទេសចិន ។
លោកបណ្ឌិត ហ៊ាន វណ្ណហន អគ្គនាយកនៃអគ្គនាយកដ្ឋានកសិកម្ម មានប្រសាសន៍ថា ប្រតិភូកម្ពុជាបានធ្វើដំណើរទៅប្រទេសចិន កាលថ្ងៃទី១៦ ធ្នូ ឆ្នាំ២០១៧នេះ ដើម្បីជំរុញការស្វែងរកទីផ្សារ និងបញ្ចប់ការចរចាដែលកម្ពុជាធ្លាប់បានពិភាក្សាជាមួយចិន ព្រមទាំងជំរុញការដាក់ស្នើសុំបើកទីផ្សារថ្មីបន្ថែមដូចជា ផ្លែតាង៉ែន ។
លោកបណ្ឌិតបញ្ជាក់ថា ៖« កន្លងមក រឿងតាង៉ែននេះ យើងពុំទាន់ធ្លាប់និយាយជាមួយចិននៅឡើយទេ ហើយខាងសហគមន៍តាង៉ែន ពួកគាត់ក៏មិនសូវសហការផ្តល់ព័ត៌មានឱ្យយើងដើម្បីរៀបចំឯកសារយកទៅចរចាជាមួយភាគីអ្នកបញ្ជាទិញសោះ » ។
បើតាមលោកបណ្ឌិត ការចងក្រង ឬរៀបចំបានល្អអំពីស្ថានភាពមៀនប៉ៃលិន (តាង៉ែន) នេះ វាមានសារសំខាន់ដើម្បីយកទៅបង្ហាញភាគីចិនវាយតម្លៃថា ចិនចង់ទិញដែរឬទេ និងវាយតម្លៃពីហានិភ័យ ព្រោះចិនត្រួតពិនិត្យតឹងរ៉ឹងមុននឹងអនុញ្ញាតឱ្យផលិតផលអ្វីមួយចូលប្រទេស ។
រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន មានប្រសាសន៍កន្លងមកថា បញ្ហាអនាម័យ និងភូតគាមអនាម័យនេះ ពីប្រទេសមួយទៅប្រទេសមួយ បានរៀបចំរបាំងខុសៗគ្នា ប្រទេសខ្លះមានរបាំងមិនស្រួចស្រាលទេ ពិសេសប្រទេសអាស៊ានទាំង១០ ប៉ុន្តែគេព្រមាននូវផលិតផលណាដែលគ្មានសុវត្ថិភាព មុននឹងឆ្លងដែនទៅកាន់ប្រទេសណាមួយ ។ តួយ៉ាង ប្រទេសចិនទាមទារឲ្យត្រួតពិនិត្យច្បាស់លាស់ណាស់មុននឹងនាំចូលផលិតផលផ្សេងៗ។
លោករដ្ឋមន្ត្រីលើកឡើងពីបទពិសោធន៍ជូរចត់នៃប្រទេសចិនដែលគេផលិតចំណីអាហារក្នុងប្រទេសរបស់គេ គឺមានជាប់ពាក់ព័ន្ធជាមួយការផលិតនូវសារធាតុពុល ដែលធ្វើឱ្យអគ្គនាយកដ្ឋានរដ្ឋបាល និងចត្តាឡីស័ក (ការបង្ការ ឬការពារ) របស់ចិន ជាពិសេស អគ្គនាយកដ្ឋានត្រូវបានកាត់ទោសប្រហារជីវិត ។ អីចឹង បានជាមានការតឹងតែងណាស់មុននឹងនាំចេញ និងនាំចូលផលិតផលកសិកម្ម ឬផលិតផលផ្សេងទៀត ដែលត្រូវបានកែច្នៃពីប្រទេសដើម » ។
« ខ្ញុំបានជជែកដេញដោល ជ្រៅជ្រះណាស់ពាក់ព័ន្ធនឹងបញ្ហានេះ ។ ខ្ញុំរហូតដល់ជ្រុលមាត់ថា ថ្នាក់បច្ចេកទេសនៃការពិនិត្យនៅទីនេះ ហេតុអ្វីមានការតឹងតែងយ៉ាងនេះ ។ ពេលនោះ គេក៏សុំទោសមកខ្ញុំ ។ គេថា មិនបានទេ នេះគឺជាច្បាប់របស់ប្រទេសគេ » ។
នេះជាការបញ្ជាក់ពីលោករដ្ឋមន្ត្រី វេង សាខុន លោក ស្រេង ស្រៀង ប្រធានក្រុមប្រឹក្សាភិបាលសហគមន៍មៀនប៉ៃលិន មានប្រសាសន៍ថា កន្លងមក មានការនាំចេញមៀនប៉ៃលិនទៅប្រទេសថៃ ប៉ុន្តែមិនបាននាំចេញទៅទីផ្សារចិនដោយផ្ទាល់ទេ ទើបធ្វើឱ្យកសិករជួបផលប៉ះពាល់ដូចជា បង់ខាតទៅលើច្រកព្រំដែន ការដឹកជញ្ជូន និងការប្រែប្រួលតម្លៃមៀននៅលើទីផ្សារ។ នៅថ្ងៃខាងមុខ ប្រសិនបើថ្នាក់ដឹកនាំក្រសួងកសិកម្មអាចចរចាបើកទីផ្សារបាននៅចិនជាផ្លូវការ វានឹងអាចជួយដល់កសិករដាំមៀនបាននៅទូទាំងប្រទេស ។
យោងតាមរបាយការណ៍របស់អគ្គនាយកដ្ឋានកសិកម្ម កម្ពុជាមានផ្ទៃដីដាំមៀនប៉ៃលិនប្រមាណ៨.៨១៦ហិកតា ក្នុងនោះខេត្តប៉ៃលិនមាន៤០%, បាត់ដំបង៤០%, កំពត៨%, និងពោធិ៍សាត់៣% ។ ដោយឡែក ខេត្តផ្សេងៗមានផ្ទៃដីដាំដុះក្នុងភាគរយតិចតួច ។ នៅឆ្នាំ២០១៦-២០១៧ កម្ពុជាអាចប្រមូលផលមៀនប៉ៃលិនបានប្រមាណ១៩.២១៨តោន ៕
ចែករំលែកព័តមាននេះ