រាជធានីភ្នំពេញ ៖ ប្រធានក្រុមប្រឹក្សាភិបាលក្រុមហ៊ុនអាកាសយានដ្ឋានកម្ពុជា បានអះអាងថា អាកាសយានដ្ឋានអន្តរជាតិទាំងបីរបស់កម្ពុជា បានរួមចំណែកដល់ផលិតផលក្នុងស្រុកសរុបប្រមាណ១៧%នៃផលិតផលសរុប គិតជាទឹកប្រាក់ប្រមាណ២,៧ប៊ីលានដុល្លារអាមេរិក និងផ្ដល់ការងារទាំងផ្ទាល់ និងប្រយោលដល់ពលរដ្ឋកម្ពុជាប្រមាណ១,៧លាននាក់ ឬស្មើនឹង២០%នៃពលរដ្ឋសរុបទូទាំងប្រទេស ។
លោក នីកូឡា ណូតបា ប្រធានក្រុមប្រឹក្សាភិបាលរូបនេះបានបន្ដថា នៅក្នុងរយៈពេលប៉ុន្មានឆ្នាំនេះ កំណើនអ្នកដំណើរតាមអាកាសបានកើនឡើងជាបន្តបន្ទាប់ ។ ជាក់ស្ដែង កាលពីឆ្នាំ២០១៦កន្លងទៅ អ្នកដំណើរឆ្លងកាត់តាមអាកាសយានដ្ឋានទាំងបី មានចំនួន៣,៤លាននាក់ ។ នៅរយៈពេល៩ខែឆ្នាំ២០១៧នេះ អ្នកដំណើរឆ្លងកាត់អាកាសយានដ្ឋានអន្តរជាតិកម្ពុជា បានកើនឡើងដល់៤លាននាក់ ហើយចំនួនអ្នកដំណើរឆ្លងកាត់នឹងកើនឡើងបន្តទៅទៀត នៅថ្ងៃអនាគតដ៏ខ្លីខាងមុខ ។
លោកបន្តថា ដោយសារតែកំណើនអ្នកដំណើរនេះហើយ ទើបអាកាសយានដ្ឋានកម្ពុជា ត្រូវពង្រីកបន្ថែមទៀតទាំងស្ថានីយមកដល់ និងស្ថានីយចេញដំណើរ ។ ជាក់ស្ដែង អាកាសយានដ្ឋានកម្ពុជាបានពង្រីក និងដាក់ដំណើរការនូវស្ថានីយចេញដំណើរអន្តរជាតិមួយកន្លែងនៅអាកាសយានដ្ឋានអន្តរជាតិខេត្តសៀមរាប ហើយថ្មីៗនេះដែរ ក៏បានដាក់ដំណើរការនូវស្ថានីយរង់ចាំចេញដំណើរថ្មីមួយទៀតនៅអាកាសយានដ្ឋានអន្តរជាតិភ្នំពេញ ពោលគឺកន្លែងសម្រាប់ភ្ញៀវរង់ចាំឡើងយន្តហោះ ។
លោកថា ៖« ប៉ុណ្ណេះ មិនទាន់គ្រប់គ្រាន់សម្រាប់កំណើនភ្ញៀវឆ្លងកាត់អាកាសយានដ្ឋានកម្ពុជាឡើយ ដោយនៅថ្ងៃខាងមុខនេះ អាកាសយានដ្ឋានកម្ពុជានឹងពង្រីកបន្ថែមទៀតនៅខេត្តព្រះសីហនុផងដែរ ព្រោះថ្មីៗនេះ អាកាសយានដ្ឋានមួយនេះក៏បានទទួលជើងហោះហើរថ្មីៗពីអន្តរជាតិចុះចតនៅទីនោះ ដោយសារតែខេត្តព្រះសីហនុ គឺជាខេត្តទាក់ទាញទេសចរណ៍ និងវិនិយោគិន » ។
ប្រធានក្រុមប្រឹក្សាភិបាលរូបនេះបានបន្ថែមថា អាកាសយានដ្ឋានអន្តរជាតិទាំងបី ពិតជាមានលទ្ធភាពឆ្លើយតបយ៉ាងពេញទំហឹងក្នុងការទទួលភ្ញៀវចំនួន៧លាននាក់ដែលនឹងមកដល់កម្ពុជានៅក្នុងឆ្នាំ២០២០ ឬច្រើនជាងនេះទៅទៀត ។ លោកថា ៖« ការសិក្សាបានបង្ហាញថា យើងពិតជាមានលទ្ធភាពគ្រប់គ្រាន់ក្នុងការបង្កើនសមត្ថភាពផ្លូវយន្តហោះ និងស្ថានីយ អ្នកដំណើរនៃអាកាសយានដ្ឋានរបស់យើង ក្នុងបរិវេណដែលមានស្រាប់នាពេលបច្ចុប្បន្ននេះ។ ការបណ្ដុះបណ្ដាលត្រូវបានធ្វើឡើងជាប់ជាប្រចាំទៅតាមតម្រូវការជាក់ស្ដែងរបស់បុគ្គលិក ដោយប្រើប្រាស់បច្ចេកវិទ្យាឌីជីថលថ្មីៗកាន់តែច្រើនថែមទៀត ។ ដូច្នេះ ប្រតិបត្តិការទូទៅក៏កាន់តែមានប្រសិទ្ធភាព ជាពិសេសការគ្រប់គ្រងលំហូរអ្នកដំណើរ » ។
បើតាមការបញ្ជាក់របស់លោក នីកូឡា ណូតបា នៅមុនដំណាច់ឆមាសទី១ ឆ្នាំ២០១៨ អាកាសយានដ្ឋានកម្ពុជា នឹងដាក់ដំណើរការស្ថានីយអ្នកដំណើរថ្មីមួយទៀតសម្រាប់អ្នកដំណើរនៅអាកាសយានដ្ឋានអន្តរជាតិក្រុងព្រះសីហនុ ព្រមជាមួយការពង្រីកផ្លូវយន្តហោះចុះចត ដើម្បីឲ្យមានសមត្ថភាពទទួលយន្តហោះកាន់តែធំអាចចុះចតញឹកញាប់ថែមទៀត ។ រាល់ការវិនិយោគទាំងនេះ គឺសំដៅឆ្លើយតបជាពិសេសដល់បញ្ហាសំខាន់នៃតំណភ្ជាប់កម្ពុជា ជាមួយអាស៊ាន អាស៊ី និងបណ្ដាប្រទេសផ្សេងទៀតនៅក្នុងពិភពលោក ។
គួរបញ្ជាក់ថា តាមទិន្នន័យរបស់អាកាសយានដ្ឋានកម្ពុជាបានបង្ហាញថា អាកាសយានដ្ឋានអន្តរជាតិខេត្តសៀមរាប ទទួលបានអ្នកដំណើរច្រើនជាងគេ ក្នុងចំណោមអាកាសយានដ្ឋានអន្តរជាតិកម្ពុជាទាំងបី ខណៈអាកាសយានដ្ឋានអន្តរជាតិភ្នំពេញទទួលបានអ្នកដំណើរបន្ទាប់ ហើយអាកាសយានដ្ឋានអន្តរជាតិក្រុងព្រះសីហនុ ក៏ទទួលបានកំណើនអ្នកដំណើរគួរឲ្យកត់សម្គាល់ផងដែរ បន្ទាប់ពីជើងហោះហើរថ្មីៗបានពង្រីកទៅកាន់ទីនោះ ៕
ចែករំលែកព័តមាននេះ