រាជធានីភ្នំពេញ ៖ បន្ទាប់ពីដំណើរការរថយន្តត្រួតពិនិត្យគុណភាព និងបរិមាណប្រេងឥន្ធនៈរយៈពេលជិត១ឆ្នាំនេះ ក្រសួងពាណិជ្ជកម្មបានរកឃើញថា ស្ថានីយប្រេងឥន្ធនៈនៅទូទាំងប្រទេសប្រមាណពី៦០ទៅ៧០% លក់សាំងមិនគ្រប់លីត្រឲ្យអតិថិជន ។ នេះបើតាមការអះអាងពីមន្ត្រីអ្នកនាំពាក្យក្រសួងពាណិជ្ជកម្ម ។…
រាជធានីភ្នំពេញ ៖ បន្ទាប់ពីដំណើរការរថយន្តត្រួតពិនិត្យគុណភាព និងបរិមាណប្រេងឥន្ធនៈរយៈពេលជិត១ឆ្នាំនេះ ក្រសួងពាណិជ្ជកម្មបានរកឃើញថា ស្ថានីយប្រេងឥន្ធនៈនៅទូទាំងប្រទេសប្រមាណពី៦០ទៅ៧០% លក់សាំងមិនគ្រប់លីត្រឲ្យអតិថិជន ។ នេះបើតាមការអះអាងពីមន្ត្រីអ្នកនាំពាក្យក្រសួងពាណិជ្ជកម្ម ។
លោក ស៊ាង ថៃ អ្នកនាំពាក្យរូបនេះបានប្រាប់កោះសន្តិភាពនៅថ្ងៃទី១៨ ធ្នូ ថា ក្រោយពីរកឃើញបែបនេះ ក្រសួងបានដាក់វិធានការ៣ដំណាក់កាលដូចជា ៖ ១-ចំពោះស្ថានីយដែលបានរកឃើញថាលក់ប្រេងមិនគ្រប់ចំណុះ ក្រសួងបានឱ្យធ្វើលិខិតជាលាយលក្ខណ៍អក្សរហើយសន្យាថា ថ្ងៃក្រោយលក់ឱ្យគ្រប់លីត្រ ដោយទុករយៈពេល១ខែ ក្រសួងនឹងចុះពិនិត្យមើលម្តងទៀត ។ ប្រសិនបើក្រសួងនៅតែពិនិត្យឃើញថា ស្ថានីយលក់ប្រេងឥន្ធនៈនោះនៅតែប្រព្រឹត្តខុសទៀត ក្រសួងនឹងព្រមានតាមដំណាក់កាល។ ២-បង្ហាញឈ្មោះម្ចាស់ស្ថានីយនៅតាមកាសែត ទូរទស្សន៍ និងបណ្តាញសង្គម និង៣-ប្រសិនបើនៅតែមិនរាងចាល ក្រសួងនឹងបិទអាជ្ញាប័ណ្ណមិនឱ្យធ្វើអាជីវកម្មតែម្ដង ។
លោកបញ្ជាក់ថា ៖« វិធានការដែលយើងធ្វើ គឺទើបតែចាប់ផ្តើមទេ ពីមុនយើងចុះទៅឃើញវាតិចតួច ប៉ុន្តែឥឡូវនេះ យើងឃើញច្រើន ។ យើងចាប់ផ្តើមដាក់វិធានការ៣ហ្នឹង ហើយកំពុងអនុវត្តវិធានការទី១ ប្រហែលជាកន្លះខែទៀតចូលដល់ដំណាក់កាលទី២ហើយ » ។
កាលពីដើមឆ្នាំ២០១៧ ក្រសួងពាណិជ្ជកម្មបានដាក់ដំណើរការរថយន្តត្រួតពិនិត្យគុណភាពនិងបរិមាណប្រេងឥន្ធនៈ ដើម្បីបញ្ឈប់ការឆ្លៀតឱកាសកេងចំណេញ និងបន្លំពីម្ចាស់ស្ថានីយប្រេងឥន្ធនៈ ។ រថយន្តដែលមានឧបករណ៍ត្រួតពិនិត្យនេះ បានធ្វើដំណើរឆ្មក់ចូលស្ថានីយ និងផ្ទះលក់សាំងក្នុងខេត្ត-ក្រុងទូទាំងប្រទេស ដើម្បីពិនិត្យគុណភាព បរិមាណប្រេងសាំង និងប្រេងម៉ាស៊ូតដែលអាជីវករកំពុងដាក់លក់ ។
រហូតមកដល់នេះ បើទោះបីជារថយន្តនេះ បានដាក់ដំណើរការជិត១ឆ្នាំហើយក៏ដោយ ក្រសួងនៅតែរកឃើញស្ថានីយប្រេងឥន្ធនៈមួយចំនួនកេងបន្លំពីអតិថិជន ដោយការចាក់ប្រេងមិនគ្រប់លីត្រ ឬបន្លំយកសាំងធម្មតាមកចាក់ប្រភេទសាំងស៊ុបពែរ ។
លោក សន ជ័យ នាយកប្រតិបត្តិអង្គការសម្ព័ន្ធគណនីភាពសង្គមកម្ពុជាយល់ថា មូលហេតុដែលនាំឲ្យមានការកេងបន្លំចំពោះការលក់សាំងនៅកម្ពុជានេះ អាចបណ្តាលមកពីទំនាស់ផលប្រយោជន៍ក្នុងអាជីវកម្មលក់សាំង និងភាពមិនស្មើគ្នាក្នុងការបង់ពន្ធ ដែលកន្លែងខ្លះអាចទម្លាក់តម្លៃសាំងបានតាមចិត្ត នាំឱ្យលក់សាំងមិនគ្រប់លីត្រ និងបន្លំគុណភាព ។
លោក សន ជ័យ គូសបញ្ជាក់បន្ថែមថា ៖«កម្ពុជា រឿងស្តង់ដាតម្លៃសាំងមួយហ្នឹង គឺជារឿងឈឺក្បាលណាស់ទៅហើយ ដោយសារតែមានសាំងខ្លះតម្លៃសូម្បីតែនៅស្ថានីយ និងដេប៉ូវាខុសគ្នា ហើយសាំងនៅតំបន់ខ្លះមានតម្លៃទាបជាងកន្លែងផ្សេង អីចឹង យើងសង្ស័យថា តម្លៃដែលគេអាចទម្លាក់បានតាមចិត្ត ទី១-វាអាចមិនគ្រប់លីត្រ និងទី២-វាអាចថា ពួកគេលក់សាំងគេចពន្ធផងដែរ ។ ភាពមិនស្មើគ្នាក្នុងការបំពេញកាតព្វកិច្ចបង់ពន្ធ ក៏ជាមូលហេតុនាំឱ្យមានការលក់សាំងប្រកួតប្រជែងគ្នា នាំឱ្យសាំងខ្លះលក់ក្នុងតម្លៃទាប ដោយមិនគ្រប់លីត្រ ហើយរឿងនេះបណ្តាលមកពីការត្រួតពិនិត្យមិនបានដិតដល់ ពិសេសនៅតាមផ្លូវជាតិ តម្លៃខុសគ្នាគួរឱ្យចាប់អារម្មណ៍ » ។
លោក សន ជ័យ មានប្រសាសន៍ថា ក្រសួងគួរតែមានវិធានការតឹងរ៉ឹងចំពោះស្ថានីយលក់សាំងទាំងឡាយណាដែលមានការបន្លំ ។ បើការកេងបន្លំនេះធ្វើឱ្យប៉ះពាល់ដល់ប្រជាពលរដ្ឋ គួរធ្វើការព្រមានជាលាយលក្ខណ៍អក្សរ ហើយបើអាច គួរតែឈានទៅដល់ការព្យួរអាជ្ញាប័ណ្ណអាជីវកម្ម ដើម្បីជាការព្រមានកុំឱ្យអ្នកលក់ទាំងនោះប្រព្រឹត្តអំពើទុច្ចរិតនៅក្នុងអាជីវកម្មរបស់ខ្លួន ។
ការចរាចរលក់ប្រេងឥន្ធនៈក្នុងប្រទេសកម្ពុជាហាក់មានសេរីភាពជ្រុល ។ ការលក់សាំង រាប់ចាប់តាំងពីស្ថានីយខ្នាតធំៗ ដេប៉ូចែកចាយ រហូតដល់សាំងដបតាមដងផ្លូវ ដែលអាជីវករខិលខូចមួយចំនួនបានលក់សាំងមិនគ្រប់បរិមាណ ឬសាំងគេចពន្ធពីបរទេសជាដើម ។
លោក សន ជ័យ យល់ថា នៅពេលដែលអាជីវករលក់សាំងទាំងនោះនៅប្រព្រឹត្តទុច្ចរិតបែបនេះ បានធ្វើឱ្យប៉ះពាល់ដល់មុខមាត់ប្រទេសកម្ពុជា ដែលគ្មានការត្រួតពិនិត្យការធ្វើអាជីវកម្មសាំងឱ្យបានត្រឹមត្រូវបណ្តោយឱ្យមានការកេងបន្លំ ។ ជាមួយគ្នានេះ វាក៏ធ្វើឱ្យខាតប្រយោជន៍អ្នកប្រើប្រាស់ដោយមិនដឹងខ្លួនផងដែរ ។ លោក សន ជ័យ ថ្លែងបែបនេះថា ៖« បានន័យថា គាត់បង់លុយពេញថ្លៃ ប៉ុន្តែគាត់បានផលប្រយោជន៍មកវិញ ឬការតបស្នងមិនគ្រប់ » ។
យល់ស្របនឹងការលើកឡើងនេះ លោក ស៊ាង ថៃ បានអះអាងថា ក្រសួងនឹងចាត់វិធានការឱ្យបានតឹងរ៉ឹងចំពោះករណីលក់សាំងមិនគ្រប់លីត្រនេះ ដោយសារតែធ្វើឱ្យប្រជាពលរដ្ឋខាតប្រយោជន៍ និងប៉ះពាល់ដល់កេរ្តិ៍ឈ្មោះប្រទេសកម្ពុជា ។
លោក ស៊ាង ថៃ បានបន្ថែមថា ៖« វាពិបាកដែរ អ្នករកស៊ីគាត់មានគំនិតមិនស្មោះត្រង់ ដោយសារតែអាបូមហ្នឹង វាបូមមកយើងមើលមិនឃើញ វាចាក់ចូលទៅក្នុងរថយន្ដបាត់ ប្រសិនបើដាក់ចូលក្នុងដប ចេះតែមើលឃើញហើយ ។ បើយើងបណ្ដោយឱ្យគាត់ធ្វើអីចឹង គឺកោរគេទាំងរស់ ហើយប្រជាពលរដ្ឋយើងមិនបានដឹងខ្លួន ចេះតែចាញ់បោកគេអីចឹងទៅ ហើយបើថ្ងៃក្រោយទៅ កម្ពុជានឹងស្អុយឈ្មោះ » ៕
ចែករំលែកព័តមាននេះ