កម្មកររោងចក្រនៅតែបន្តបិទផ្លូវជាតិ តវ៉ាទាមទាររឿងប្រាក់ខែ
- កណ្តាល
ខេត្តកណ្ដាល ៖ កម្មករ កម្មការិនី រោងចក្រកាត់ដេរ សម្លៀកបំពាក់ហ្គាវ័ន្ត អឹភែរឹល ប្រមាណជាង៤០០នាក់ ក្នុងចំណោមជាង៩០០នាក់ នៅភូមិព្រែកសំរោង…
ខេត្តកណ្ដាល ៖ កម្មករ កម្មការិនី រោងចក្រកាត់ដេរ សម្លៀកបំពាក់ហ្គាវ័ន្ត អឹភែរឹល ប្រមាណជាង៤០០នាក់ ក្នុងចំណោមជាង៩០០នាក់ នៅភូមិព្រែកសំរោង…
ខេត្តកណ្ដាល ៖ កម្មករ កម្មការិនី រោងចក្រកាត់ដេរ សម្លៀកបំពាក់ហ្គាវ័ន្ត អឹភែរឹល ប្រមាណជាង៤០០នាក់ ក្នុងចំណោមជាង៩០០នាក់ នៅភូមិព្រែកសំរោង សង្កាត់តាខ្មៅ ក្រុងតាខ្មៅ កាលពីព្រឹកថ្ងៃទី១៨ធ្នូ បាននាំគ្នាបន្តបោះតង់ ក្រាលកន្ទល ចងអង្រឹងលើផ្លូវជាតិ២១ បិទផ្លូវ នៅខាងមុខរោងចក្រ ដើម្បីធ្វើការតវ៉ាឱ្យថៅកែរោងចក្រគោរពតាមកិច្ចសន្យា តាមច្បាប់ស្ដីពីការងារ បើកប្រាក់ខែឲ្យគ្រប់ចំនួន និងរារាំងមិនឲ្យថៅកែរោងចក្រ ដឹកសម្ភារចេញខាងក្រៅ គ្រាដែលថៅកែ ប្រកាសព្យួរការងារ កម្មករជាង៩០០នាក់។ ក្នុងខែធ្នូនេះ កម្មកររោងចក្រ បានធ្វើការតវ៉ាបិទផ្លូវ ជាតិលេខ២១ ចំនួនបីលើក ហើយនៅតែគ្មានដំណោះស្រាយ ដល់កម្មករ។ ក្រុមកម្មករបាននាំគ្នាចងខ្សែ កាត់ទទឹងផ្លូវ ក្រាលកន្ទេល បោះតង់លើផ្លូវ បិទកំណាត់ផ្លូវជាតិលេខ២១ ខាងមុខរោងចក្រ ចាប់ពីម៉ោង៧ព្រឹក មិនអាចចរាចរណ៍ធ្វើដំណើរឆ្លងកាត់បាន។ ប៉ុន្តែអាជ្ញាធរ និងសមត្ថកិច្ចបានបញ្ចៀសចរាចរណ៍តាមផ្លូវវាង មិនស្ទះចរាចរណ៍ទេ ដោយមានលើករូបថត សម្ដេចនាយយករដ្ឋមន្ត្រី និងសម្ដតចកិត្តិព្រឹទ្ធបណ្ឌិត ក្នុងគោលបំណងស្នើសុំឱ្យ សម្ដេចទាំងពីរជួយ អន្តរាគមន៍រកដំណោះស្រាយឱ្យពួកគាត់ដោយសារថៅកែរោងចក្រ មិនគោរព តាមកិច្ចសន្យាច្បាប់ស្ដីពីការងារ។
ការតវ៉ាបិទផ្លូវជាតិនេះ គឺបន្ទាប់ពីក្រុមកម្មករបាននាំបោះតង់ ក្រាលកន្ទេល ចងអង្រឹងយាមនៅខាងមុខ និងខាងក្រោយរោងចក្រទាំងយប់ ថ្ងៃ រយៈពេលបីថ្ងៃ និង បិទផ្លូវច្រើនលើករួចមកហើយ មុននេះខ្លាចថៅកែលួចដឹកជញ្ជូនសម្ភារចេញមិនបើកប្រាក់ខែ និងលុយ ផ្សេងៗមួយចំនួនទៀត។ តំណាងកម្មករ បានប្រាប់ឱ្យដឹងថា មានកម្មករដែលបម្រើការងារនៅរោងចក្រនេះ ភាគច្រើនបាននាំគ្នា ធ្វើការតវ៉ា និងមួយចំនួនតូច មិនមក គ្រាដែលថៅកែរោងចក្របានប្រកាសព្យួរការងារកម្មករ ជាង៩០០នាក់ កាលពីពេលថ្មីៗនេះ។ ពួកគាត់បានប្ដេជ្ញាថា និងបន្តប្ដូរវេននាំគ្នាទាំងយប់ ថ្ងៃចងតង់ខាងមុខ និងខាងក្រោយច្រកចេញចូលរោងចក្រនេះ ដោយក្រាលកន្ទេល ចងអង្រឹង ការពារមិនឱ្យថៅកែ រោចក្រ ដឹកញ្ជូនសម្ភារចេញបានឡើយ លុះត្រាណាតែ ធ្វើការដោះស្រាយជាមួយកម្មករឱ្យបានចប់ ត្រឹមត្រូវតាមច្បាប់ស្ដីពីការងារ។ ក្រុមកម្មករបានឱ្យដឹងថា ប្រាក់ខែគោលរបស់កម្មករចំនួន១៤៥ ដុល្លារ ប៉ុន្តែសម្រាប់ខែវិច្ឆិការនេះ បើកបានតែ១២០ និងខ្លះទៀតបើកបានតែ៩០ដុល្លារទេ នេះមិនទាន់ គិតទាំងប្រាក់ថែមម៉ោង ប្រាក់មធ្យោយធ្វើដំណើរ និងប្រាក់ផ្សេងៗមួយចំនួនទៀត មិនត្រូវបាន ថៅកែរោងចក្រនេះ បើកឱ្យកម្មករទេ គ្រាដែលប្រកាសព្យួរការងារកម្មករជាង៩០០នាក់នេះ ហើយថៅកែរោងចក្របានព្យាយាមដឹកជញ្ជូនសម្ភារចេញពីក្នុងរោងចក្រ ដោយប្រាប់កម្មករថា ម៉ាស៊ីនដេរខូច និងសម្ភារចាស់ៗ ត្រូវយកទៅដូរថ្មី។
កម្មករលើកឡើងថា ការព្យូរការងារកម្មករនេះ ខុសច្បាប់ ព្រោះក្នុងឆ្នាំ២០១៧ នេះ ថៅកែព្យួរការងារកម្មករចំនួនពីរលើក ដែលកាលពីដើមឆ្នាំ មួយលើករួចមកហើយ តាមច្បាប់អនុញ្ញាតឲ្យព្យួរការងារតែមួយលើកទេ។ ក្រុមកម្មករបាន លើកឡើងថា ពួកគាត់លែងមានជំនឿ លើថៅកែរោងចក្រនេះ ព្រោះកន្លងទៅនេះ មិនបើកប្រាក់ខែឱ្យកម្មករ បានគ្រប់ចំនួនហើយ កម្មករបាននាំគ្នាធ្វើការតវ៉ា ហើយថៅកែរោងចក្របាន សន្យាដោយមានមន្ត្រី មកពីមន្ទីការងារបានដឹងឮថានឹងបើកប្រាក់ខែឱ្យកម្មករបានគ្រប់ចំនួន តែ មិនបានដូចការសន្យានោះទេ។ បើទោះជាបែបនេះក្ដី កម្មករបានសំណូមពរ ដល់ក្រសួងការងារ ជួយអន្តរាគមន៍ ពិសេសសម្ដេចអគ្គមហាសេនាបតីតេជោ ហ៊ុន សែន នាយយករដ្ឋមន្ត្រី និងសម្ដេចកិត្តិព្រឹទ្ធបណ្ឌិត មេត្តារកដំណោះ តាមច្បាប់ស្ដីពីការងារ ដល់កម្មករឲ្យបានឆាប់រហ័សផង ។ ព្រោះអីពួកគាត់ជាកម្មករ រោងចក្រកាត់ដេរ មានសង្ឃឹមតែលើប្រាក់ខែនេះ សម្រាប់ការធ្វើដំណើរ ការស្នាក់នៅ និងផ្គត់ផ្គង់ជីវភាពប្រចាំថ្ងៃជាចាំបាច់បំផុត។ រហូតមកដល់រសៀលថ្ងៃដដែល ក្រុម កម្មករ នៅតែបន្តបិទផ្លូវនេះដដែល ដោយសារអាជ្ញាធរ និងមន្ត្រី មន្ទីរការងារខេត្ត បានទៅធ្វើការ សម្របសម្រូលថៅកែរោងចក្ររកដំណោះស្រាយ តែគ្មានលទ្ធផលជូនដល់កម្មករ។
គេមានការកត់សម្គាល់ថា កន្លងទៅ រោងចក្រ ហ្គាវ័ន្ត អឹភែរឹលនេះ កម្មករបាននាំគ្នា ធ្វើការតវ៉ា ញឹកញាប់ ដោយសារតែថៅកែ បើកប្រាក់ខែឱ្យកម្មករមិនគ្រប់ចំនួនស្ទើររាល់ខែ និងមិនគោរព តាមកិច្ចសន្យា ច្បាប់ការងារ។ ជាក់ស្ដែងកាលពីថ្ងៃទី១៩ វិច្ឆិកា និងថ្ងៃទី១៤-១៥ ធ្នូ កន្លងទៅនេះ កម្មកររោងចក្រនេះ បាននាំគ្នាធ្វើការតវ៉ា ដោយលើកបដានាំគ្នាបិទផ្លូវជាតិលេខ២១ ខាងមុខរោងចក្រ មិនអាចធ្វើដំណើរ ចរាចរណ៍ឆ្លងកាត់កំណាត់ផ្លូវនេះបាន ដោយសារតែថៅកែរោងចក្រ មិនបើកប្រាក់ខែឲ្យកម្មករមួយខែកម្មករទាមទារឲ្យថៅកែរោងចក្រ បើកប្រាក់ខែឲ្យគ្រប់ចំនួន។ បន្ទាប់ពី បិទផ្លូវមួយព្រឹក កម្មករបានបើកផ្លូវវិញ បន្ទាប់ពី តំណាងរោងចក្រ និងអាជ្ញាធរ បានសន្យា និង បើកប្រាក់ខែឲ្យយកម្មករគ្រប់ចំនួន។ តែរហូតមកដល់ពេលនេះថៅកែរោងចក្រនេះ មិនបើកប្រាក់ខែឲ្យកម្មករបានគ្រប់ចំនួន និងព្យួរការងារកម្មករទៀត ដោយអះអាងថា រោងចក្រ គ្មានការងារធ្វើ។ រហូតមកដល់ពេលនេះ ការសន្យាមាននៅតែលើក្រដាស តែថៅកែក្រុមហ៊ុនមិនអនុវត្តតាម និងបើកប្រាក់ខែឱ្យកម្មករបានគ្រប់ចំនួនទេ ទើបនាំគ្នាតវ៉ាបិទផ្លូវ បន្តទៀត៕
https://youtu.be/63F-9LETU9c
ចែករំលែកព័តមាននេះ