រាជធានីភ្នំពេញ ៖ ថ្នាក់ដឹកនាំរាជបណ្ឌិតកម្ពុជានៅព្រឹកថ្ងៃទី ១៨ ខែធ្នូនេះ បានលើកឡើងថា កម្ពុជាត្រូវការមហាអំណាច និងត្រូវការខ្សែពួរ ព្រោះកម្ពុជាជាប្រទេសតូច ដូច្នេះត្រូវតែចេះទាញយកប្រយោជន៍ពីប្រទេសមហាអំណាច។ នេះគឺជាការលើកឡើងរបស់លោក សុំ ឈុំប៊ុន អនុប្រធានរាជបណ្ឌិតសភាកម្ពុជានៅក្នុងកម្មវិធីតុមូលមួយស្តីពី «តួនាទីរបស់មហាអំណាចក្នុងកិច្ចការតំបន់ និងពិភពលោក» ។
ជាមួយគ្នានោះ លោកបណ្ឌិតសភាចារ្យ សុខ ទូច ប្រធានរាជបណ្ឌិតសភាកម្ពុជាបានលើកឡើងថា មហាអំណាចខ្លះដូចជា អាមេរិកបានប្រើគ្រាប់បែកទម្លាក់នៅជប៉ុន ដើម្បីកុំឲ្យជប៉ុនបែងចែកជាពីរដូចប្រទេសកូរ៉េ (កូរ៉េខាងជើង និងកូរ៉េខាងត្បូង) ។
លោកប្រធានបណ្ឌិតសភាបានលើកឡើងទៀតថា ការទម្លាក់សម្តេចនរោត្តម សីហនុបាននាំមកអ្វីខ្លះ? ក្នុងពេលនោះសម្តេចនរោត្តម សីហនុ ត្រូវបានឃុំឃាំង។ លោកថា មិនចាំបាច់យកឯកសារបរទេសមកប្រៀបធៀបនោះទេ គឺលោកបានរកនៅក្នុងរបបខ្មែរក្រហមស្រាប់ វាមហាសែនមហាវេទនាណាស់។ នៅក្នុងរបបខ្មែរក្រហមអាមេរិក និងចិនបានគាំទ្រខ្មែរក្រហម ហើយកៅអីខ្មែរក្រហមនៅអង្គការសហប្រជាជាតិ នៅតែមានមហាអំណាចទាំងនោះគាំទ្រ បើទោះបីដឹងថា ខ្មែរក្រហមសម្លាប់មនុស្សក៍ដោយ។
លោក សុខ ទូច បន្តថា មហាអំណាចមិនគិតពីប្រទេសតូចតាច ក្រៅតែពីប្រយោជន៍របស់មហាអំណាចខ្លួនគេទេ។ លោកថា អាមេរិកមិនដែលរំលាយអាមេរិក ដើម្បីប្រជាធិបតេយ្យនៅកម្ពុជាទេ ។ លោកបន្ថែមថា អ្នកខ្លះគេថាសម្តេចតេជោ ហ៊ុន សែន ផ្តាច់ការ ហើយកម្ពុជាប្រជាធិបតេយ្យដើរថយក្រោយ គឺមិនត្រឹមត្រូវនោះទេ ព្រោះកម្ពុជាមិនមែនដឹកនាំដោយបក្សមួយដូចនៅប្រទេសវៀតណាម និងឡាវនោះទេ ។
លោកប្រធានបណ្ឌិតសភាកម្ពុជាបានលើកឡើងថា ប្រទេសកម្ពុជាត្រូវបានបារាំងដាក់អាណានិគមនៅប្រទេសកម្ពុជា ទើបអាចធ្វើឱ្យប្រទេសកម្ពុជាអាចជៀសផុតពីការបែងចែកប្រទេសទៅជាពីរ ។ លោកថា ប្រសិនបើមិនមានបារាំងមកដាក់អាណានិគមទេ ម៉្លេះ កម្ពុជាចែកជាពីរមិនខាន ។ លោកបន្តទៀតថា អាមេរិកចាប់ដៃជាមួយវៀតណាម និងអឺរ៉ុបសម្រាប់ទប់ទល់ និងប្រទេសចិន ហើយនេះជាប្រយោជន៍របស់អាមេរិកតែមួយ។
លោកបណ្ឌិតសភាចារ្យ សុខ ទូច បានលើកឡើងថា ប្រទេសចិនបានដឹងកំហុសដែលបានធ្វើមកលើកម្ពុជា ពេលនេះចិនបានសងកម្ពុជាតាមរយៈការផ្តល់នូវជំនួយឥតសំណង ។ ចំពោះជប៉ុនបានប្រព្រឹត្តខុសចំពោះកម្ពុជាដែលពេលនោះជប៉ុនថា សងមកកម្ពុជាវិញ តែកម្ពុជាមិនទទួលទេ ព្រោះពេលនោះជប៉ុនវេទនាណាស់។ លោកបានលើកឡើងថា បើទោះបីជាជប៉ុនជាដៃស្តាំរបស់អាមេរិកនៅអាស៊ីតែបញ្ហាកម្ពុជា គឺជប៉ុនរក្សាជំហរនៅកណ្តាល។
លោក សុខ ទូច បន្តថា៖ «ហាំប៊ីហ្គើឆ្ងាញ់នៅអាមេរិក តែប្រហុកឆ្ងាញ់នៅកម្ពុជា»។ លោកបណ្ឌិតសភាចារ្យបានលើកឡើងថា «គ្មានបរទេសណាស្រឡាញ់កម្ពុជា ដូចពលរដ្ឋកម្ពុជានោះទេ»។ លោកបានបញ្ជាក់ថា ពលរដ្ឋកម្ពុជាត្រូវរៀនសូត្រឲ្យបានច្រើន កុំចេះតែជឿតាមអ្នកនយោបាយខ្លះ ចេះតែបកស្រាយខុស ហើយនៅពេលមានបញ្ហានាំគ្នារត់ចោលប្រទេសជាតិទៅបរទេស ៕
ចែករំលែកព័តមាននេះ