ខេត្តស្វាយរៀង ៖ ក្តីសោកសង្រេងម្តាយ និងនាងគូដណ្តឹងយំបោកខ្លួនស្តាយស្រណោះជីវិតកូន ស្តាយស្រណោះគូដណ្តឹងដែលជិតដល់ថ្ងៃចូលរោងការទៅហើយ អនាគតស្វាមីត្រូវឆក់ខ្សែភ្លើងស្លាប់ តើ ស្រីណាមិនយំ ម្តាយឪពុកណាមិនសោកស្តាយ។ ករណីឆក់ខ្សែភ្លើងស្លាប់នេះ…
ខេត្តស្វាយរៀង ៖ ក្តីសោកសង្រេងម្តាយ និងនាងគូដណ្តឹងយំបោកខ្លួនស្តាយស្រណោះជីវិតកូន ស្តាយស្រណោះគូដណ្តឹងដែលជិតដល់ថ្ងៃចូលរោងការទៅហើយ អនាគតស្វាមីត្រូវឆក់ខ្សែភ្លើងស្លាប់ តើ ស្រីណាមិនយំ ម្តាយឪពុកណាមិនសោកស្តាយ។ ករណីឆក់ខ្សែភ្លើងស្លាប់នេះ កើតឡើងកាលពីវេលាម៉ោង២ និង២៥នាទីរសៀល ថ្ងៃទី១៧ ធ្នូ ២០១៧ នៅភូមិចេកសង្កាត់ចេក ក្រុងស្វាយរៀង។ បើតាមសមត្ថកិច្ចនគរបាលក្រុងស្វាយរៀងបានឲ្យដឹងថា ជនរងគ្រោះឈ្មោះ ងិន វាសនា ភេទប្រុស អាយុ៣០ឆ្នាំ មុខរបរជាងផ្សារដែក មានទីលំនៅភូមិរោងបន្លែ សង្កាត់ស្វាយរៀង ក្រុងស្វាយរៀង។
ប្រភពដដែលបន្តទៀតថា មុនពេលកើតហេតុ ថ្ងៃទី១៦ ធ្នូ ២០១៧ ជនរងគ្រោះបានទទួលម៉ៅការ ផ្សារដំបូលផ្ទះ ឲ្យម្ចាស់ផ្ទះនៅភូមិកើតហេតុខាងលើ ហើយបានផ្សារផ្ទោងរួចនៅថ្ងៃកើតហេតុ គឺចាប់ផ្តើមផ្សារបង្កង់ ខណៈនោះពីរនាក់កូនជាង បានឡើងលើដំបូល ដោយឲ្យម្ចាស់ផ្ទះជួយហុចដែកបង្កង់ឲ្យ ម្ចាស់ផ្ទះបានយកដែកធ្វើបង្កង់ដាក់បញ្ឈរផ្អែកនឹងជញ្ជាំងផ្ទះ ជនរងគ្រោះបានលើកដែកបង្កង់ឡើងលើដំបូលដើម្បីផ្សារ ស្រាប់តែលើកដែកបង្កង់ទៅប៉ះខ្សែកាបអគ្គីសនី នៅចំពីលើដំបូលកម្ពស់ ប្រមាណជាង២ម៉ែត្រ ក៏ឆក់ខ្ទាតផ្កាភ្លើងខ្ទាតជនរងគ្រោះធ្លាក់ពីលើដំបូលផ្ទះកម្ពស់០៥ម៉ែត្រមកទើលើគ្រែ ស្លាប់ភ្លាមៗ។
ក៏ប៉ុន្តែ ម្ចាស់ផ្ទះមិនអស់ចិត្តបានយកជនរងគ្រោះកប់ក្នុងដីខ្សាច់ ជិតមួយម៉ោង ទើបដឹកជនរងគ្រោះមកកាន់មន្ទីរពេទ្យបង្អែកខេត្តស្វាយរៀង ដើម្បីសង្គ្រោះ ក៏ប៉ុន្តែក្រុមគ្រូពេទ្យបានពិនិត្យហើយប្រាប់ថា ជនរងគ្រោះបានស្លាប់បាត់ទៅហើយ។ ក្រោយមកសមត្ថកិច្ចបានចុះទៅពិនិត្យកន្លែងកើហេតុ បានធ្វើការសន្និដ្ឋានថា មូលហេតុ សង់ផ្ទះនៅខាងក្រោមបង្គោលខ្សែ ភ្លើងអគ្គីសនី ជិតពេកខុសច្ចេកទេស កម្ពស់តែជាង២ម៉ែត្រ បើតាមបច្ចេកគឺត្រូវឲ្យសាងសង់ផ្ទះឆ្ងាយពី បង្គោលភ្លើង ឬខ្សែកាបស្រាតយ៉ាងតិចចម្ងាយ៣,៥ម៉ែត្រទៅ៥ម៉ែត្រ តែម្ចាស់ផ្ទះសង់ខាងក្រោមខ្សែកាបអគ្គីសនីតែម្តង ហើយជាងផ្សារដែកខ្វះការប្រុងប្រយត្ន័ទើបគ្រោះថ្នាក់ដល់អាយុជីវិត។
ចំណែកនាងជាគូដណ្តឹង ឈ្មោះ ញាន សុខពិសី អាយុ២៧ឆ្នាំ មានទីលំនៅភូមិទួលទ្រា ឃុំស្វាយធំ ស្រុកស្វាយជ្រំ បានរៀបរាប់ទាំងទឹកភ្នែកថា នាងបានភ្ជាប់ពាក្យ ជាមួយ អនាគតស្វាមីដែលជាជនរងគ្រោះ តាំងពីដើមខែកុម្ភៈ ឆ្នាំ២០១៧ ហើយមានគម្រោង រៀបអាពាហ៍ពិពាហ៍ នៅថ្ងៃទី០៤ ខែកុម្ភៈ ឆ្នាំ២០១៨ ខាងមុខនេះ ដោយបានរៀបចំធ្វើច្បាប់រៀបអាពាហ៍ពិពាហ៍រួចហើយ និងបានកក់សម្អាងការ ភ្លេងខ្មែរ អកកេះ និងកំពុងត្រៀមបោះសំបុត្រអញ្ជើញភ្ញៀវទៅហើយ មិនគួរអកុសល អនាគតស្វាមីជួបគ្រោះធំ ឆក់ខ្សែភ្លើងស្លាប់ចោលរូបនាងដូច្នេះឡើយ។ រីឯកូនជាងម្នាក់ទៀតសមត្ថកិច្ចមិនបានបង្ហើបឲ្យស្គាល់អត្តសញ្ញាណទេ ដោយក្រោយពេលកើតហេតុ កូនជាងរូបនោះអាចឆក់ដែរតែស្រាលហើយបានចុះពីលើដំបូលផ្ទះភិតភ័យរត់គេចខ្លួនពីកន្លែងកើតហេតុទៅផ្ទះបាត់ សម្ថកិច្ចកំពុងស្រាវជ្រាវដើម្បីហៅមកសាកសួរ ក៏ប៉ុន្តែមិនទាន់មានអ្នកផ្តល់ព័ត៌មានទេ ។ ក្រោយពីពិនិត្យសពរួចសមត្ថកិច្ចបានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី៕
ចែករំលែកព័តមាននេះ