«BBC»កាលពីពេលថ្មីៗកន្លងមកផ្សាយថា នារីម្នាក់ និងសហាយស្មន់ បានរួមគំនិតគ្នាសម្លាប់ប្តី ហើយក្រោយមកប្រុសសហាយកែមុខមាត់បន្លំធ្វើជាប្តី ដោយយកលំនាំតាមភាពយន្តដ៏ល្បីនៅលើពិភពលោក ។ ហេតុការណ៍កើតឡើងនៅក្រុង Nagarkurnool រដ្ឋ Telanguna ប្រទេសឥណ្ឌា ។
នាង Swathi Reddy អាយុ២៧ឆ្នាំ មានអាជីពជាអ្នកថែទាំអ្នកជំងឺ និងរ៉ាជេស អាចាកូឡា ជាសហាយស្មន់ មានអាជីពជាអ្នកម៉ាស្សា បានសម្លាប់បុរសជាប្តីឈ្មោះស៊ុតកា រ៉េតឌី អាយុ៣២ឆ្នាំ កាលពីថ្ងៃទី២៦ វិច្ឆិកា ២០១៧ ហើយយកសពទៅកប់ចោល ។
បុរសជាជនដៃដល់សុខចិត្តឈឺចាប់លើដោយប្រើអាស៊ីដស្រោចលើមុខធ្វើជាមនុស្សរងគ្រោះដោយការជះទឹកអាស៊ីដ ហើយឪពុកម្តាយរបស់បុរសជាប្តីមើលមិនស្គាល់ក៏ចំណាយប្រាក់ព្យាបាលចំនួនជាង៧ពាន់ដុល្លារ ព្រោះស្មានថា ជាកូនប្រុសរបស់ខ្លួន ។
ក្រោយមកអាថ៌កំបាំងបែកធ្លាយនៅពេលប្អូនប្រុសរបស់លោកស៊ុតកា រ៉េតឌី ទៅសួរសុខទុក្ខនៅមន្ទីរពេទ្យកាលពីថ្ងៃទី៩ ធ្នូ និងចាប់កំហុសបានថា អ្នកជំងឺមិនមែនជាបងប្រុសរបស់ខ្លួនទេ ។ ការចាប់កំហុសបាន ព្រោះនៅពេលលោកគ្រូពេទ្យយកស៊ុបចៀមឱ្យទទួលទានបែរជាមិនព្រម ដោយបញ្ជាក់ថា ជាអ្នកហូបម្ហូបបួស ខុសពីបងប្រុសរបស់គេ ។ ដូច្នេះហើយប្អូនប្រុសបានប្តឹងទៅប៉ូលិសឱ្យជួយត្រួតពិនិត្យស្នាមមេដៃ ទើបដឹងថាមិនមែនជាបងប្រុសរបស់គេទេ ។
ពេលប៉ូលិសសាកសួរ នាងជាប្រពន្ធបានសារភាពថាចង់ឱ្យសហាយស្មន់បន្លំដើរតួជាប្តីរបស់នាង ។ ក្រោយពីនាងរៀបការ និងរស់នៅរួមគ្នាអស់រយៈពេល៣ឆ្នាំមានកូន២នាក់ នាងបែរជាស្រឡាញ់សហាយស្មន់ទើបឱ្យរូបគេបំលែងខ្លួនបែបនេះ ។
បច្ចុប្បន្នប៉ូលិសកំពុងរង់ចាំឱ្យលោករ៉ាដេស ព្យាបាលជាសះស្បើយទើបចាប់ខ្លួនដំណើរការរឿងក្តីតាមផ្លូវច្បាប់ ៕
ចែករំលែកព័តមាននេះ