ខេត្តបន្ទាយមានជ័យ ៖ ជនសង្ស័យម្នាក់ត្រូវបានកំលាំងកងរាជអាវុធហត្ថខេត្តបន្ទាយមានជ័យរៀបចំសំណុំរឿងបញ្ជូនទៅសាលាដំបូងខេត្តនៅថ្ងៃទី១៦ ខែធ្នូ ឆ្នាំ២០១៧ ពីបទករណីលួចយកទ្រព្យអ្នកដទៃ ។
លោកវរសេនីយ៍ឯក ម៉ែន ភិរម្យ មេបញ្ជាការរងកងរាជអាវុធហត្ថខេត្តបន្ទាយមានជ័យទទួលផែនយុត្តិធម៌បានឲ្យដឹងថា ជនសង្ស័យដែលត្រូវបានកំលាំងកងរាជអាវុធហត្ថក្រុងសិរីសោភ័ណឃាត់ខ្លួនករណីលួចម៉ូតូនៅវេលាម៉ោង៧យប់ ថ្ងៃទី១៥ ខែធ្នូ ឆ្នាំ២០១៧ នៅចំណុចក្នុងក្រុងសិរីសោភ័ណ ខេត្តបន្ទាយមានជ័យ ឈ្មោះ សេង សុភត្រា ភេទប្រុស អាយុ២១ឆ្នាំ ទីលំនៅមិនពិតប្រាកដ ។
បើតាមលោកវរសេនីយ៍ត្រី យ៉ាន់ សុវណ្ណ មេបញ្ជាការមូលដ្ឋានកងរាជអាវុធហត្ថក្រុងសិរីសោភ័ណបានឲ្យដឹងដែរថា ក្រោយពីបានទទួលពាក្យបណ្តឹងរបស់ជនរងគ្រោះឈ្មោះ យូ យុក ភេទប្រុស អាយុ៤២ឆ្នាំ រស់នៅភូមិព្រះពន្លា សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ ថាគាត់បានបាត់ម៉ូតូ១គ្រឿងម៉ាកហុងដា ពណ៌ខ្មៅ ស៊េរីឆ្នាំ២០១៣ ត្រូវបានចោរលួចយកទៅបាត់នៅថ្ងៃទី១៥ ខែធ្នូ ឆ្នាំ២០១៧ ។ លោកវរសេនីយ៍ត្រី យ៉ាន់ សុវណ្ណ ដឹកនាំកម្លាំងអាវុធហត្ថ១ក្រុមចុះអន្តរាគមន៍ហើយបានឃាត់ខ្លួនជនសង្ស័យនៅចំណុចក្រុងសិរីសោភ័ណយកមកទីបញ្ជាការកងរាជអាវុធហត្ថខេត្តដើម្បីសាកសួរបន្ត ។
លោកវរសេនីយ៍ឯក ម៉ែន ភិរម្យ បានបញ្ជាក់ទៀតថា ជនសង្ស័យនៅមុខកំលាំងអាវុធហត្ថបានឆ្លើយសារភាពថា នៅថ្ងៃទី១៥នោះខ្លួនបានលួចម៉ូតូ១គ្រឿងពិតប្រាកដមែន បន្ទាប់ពីលួចបានយកទៅលាក់ទុកចោលនៅសាលារៀនកងវ៉ា ។ ក្រោយមកក៏ត្រូវបានកំលាំងអាវុធហត្ថនាំខ្លួន និងម៉ូតូមកបញ្ជាការមូលដ្ឋានរដ្ឋាកងរាជអាវុធហត្ថតែម្តង ។
ផ្អែកតាមចម្លើយសារភាពរបស់ជនសង្ស័យ និងដកហូតបានវត្ថុតាងជាក់ស្តែង បច្ចុប្បន្នជនសង្ស័យឈ្មោះ សេង សុភត្រា ត្រូវបានកម្លាំងកងរាជអាវុធហត្ថខេត្តរៀបចំសំណុំរឿងបញ្ជូនទៅសាលាដំបូងខេត្តដើម្បីចាត់ការតាមនីតិវិធី ។ ចំណែកម៉ូតូបានធ្វើការប្រគល់ទៅឲ្យម្ចាស់គេវិញផងដែរ ៕
ចែករំលែកព័តមាននេះ