ខេត្តប៉ៃលិន ៖ ផ្លូវ១ខ្សែមានប្រវែង១៤គីឡូម៉ែត្រតែងតែទទួលរងនៅការខូចខាតក្រឡុកតូច-ធំស្ទើររៀងរាល់ឆ្នាំ រហូតមកដល់ពេលនេះខាងមន្ទីរសាធារណការ និងដឹកជញ្ជូនខេត្តបានរៀបចំធ្វើផ្លូវនេះ ដោយក្រាលកៅស៊ូប្រវែង៧គីឡូម៉ែត្រ និងជួសជុលក្រាលក្រួសក្រហមប្រវែង៧គីឡូម៉ែត្រផងដែរ ។
អាជ្ញាធររៀបចំកសាងសង់ផ្លូវ១ខ្សែនេះចាប់ពីភូមិប៉ាងរលឹម រហូតដល់ភូមិភ្នំដំបង សង្កាត់អូរតាវ៉ៅ ក្រុងប៉ៃលិន ដើម្បីសម្រួលដល់ការធ្វើដំណើររបស់ប្រជាពលរដ្ឋ ក៏ដូចជាបង្កភាពងាយស្រួលដល់ការដឹកកសិផលចេញ-ចូលទៅមកបានលឿនផងដែរ ។
ព័ត៌មានពីលោកអ៊ាត សារ៉ាត់ ប្រធានមន្ទីរសាធារណការ និងដឹកជញ្ជូនខេត្តបានឱ្យដឹងថា តភ្ជាប់ពីផ្លូវជាតិលេខ៥៧ ឆ្ពោះទៅទិសខាងត្បូងជាប់នឹងភូមិមួយស្រុកសំឡូត ខេត្តបាត់ដំបង ។ លោកបន្តទៀតថា ផ្លូវ១ខ្សែនេះបានទទួលរងការខូចខាតជារៀងរាល់ឆ្នាំ ខណៈរដូវវស្សាម្តងៗ មានភ្លៀងធ្លាក់ជោកជាំបណ្តាលឱ្យមានការលំបាកដល់ការធ្វើដំណើររបស់ប្រជាពលរដ្ឋ ។ ប៉ុន្តែរហូតមកដល់ពេលនេះ ខាងលោកបានទទួលគម្រោងកញ្ចប់ថវិកាថ្នាក់ខេត្ត យកទៅឈូសឆាយក្រាលកៅស៊ូពាក់កណ្តាល និង៧គីឡូម៉ែត្រទៀតខាងលោកគ្រាន់តែចាក់ក្រួសក្រហម ដើម្បីឱ្យប្រជាពលរដ្ឋធ្វើដំណើរជាធម្មតាសិន ហើយនៅពេលក្រោយ បើអាជ្ញាធរមានថវិកាគ្រប់គ្រាន់នឹងរៀបចំក្រាលកៅស៊ូដូចគ្នា ។
ចំណែកប្រជាពលរដ្ឋរស់នៅភូមិខាងលើ មានសេចក្តីរំភើងរីករាយដែលឃើញអាជ្ញាធរខេត្តក៏ដូចជាខាងមន្ទីរសាធារណការ និងដឹកជញ្ជូនបានយកគ្រឿងចក្រទៅឈូសឆាយធ្វើផ្លូវសម្រាប់ ពួកគាត់ធ្វើដំណើរចេញចូលទៅមក និងដឹកកសិផលទៅលក់ឱ្យឈ្មួញនៅតាមស្តង់នានាក្នុងក្រុងប៉ៃលិន បានយ៉ាងឆាប់រហ័ស ។ ប្រជាពលរដ្ឋក៏មិនភ្លេចអ្វីដែលគាត់ទទួលបានសមិទ្ធផលថ្មីៗដែរ ហើយសង្ឃឹមទុកជាមុនថា នៅពេលក្រោយនឹងក្រាលកៅស៊ូទាំងអស់តែម្តង ៕
ចែករំលែកព័តមាននេះ