រាជធានីភ្នំពេញ ៖ បុរសម្នាក់បានរងរបួសធ្ងន់និង២នាក់ទៀតរងរបួសស្រាលក្នុងឧប្បត្តិហេតុគ្រោះថ្នាក់ចរាចរណ៍មួយខណៈដែលពួកគេជិះម៉ូតូសេ១២៥មួយគ្រឿងឌុបគ្នាក្នុងល្បឿនលឿន ហើយជ្រុលទៅបុកម៉ូតូសណ្តោងរទេះមួយគ្រឿងពេញទំហឹងរួចបន្តទៅបុកម៉ូតូសង់កូរ៉េ មួយគ្រឿងទៀត បណ្ដាលឲ្យដួលបោកទៅលើថ្នល់រងរបួសតែម្ដង ។ ឧប្បត្តិហេតុនេះកើតឡើង កាលពីវេលាម៉ោង៧ព្រឹកថ្ងៃទី១៤ វិច្ឆិកា នៅលើកំណាត់ផ្លូវលេខ២១៧ ត្រង់ចំណុចភូមិសំបួរ សង្កាត់ដង្កោ ខណ្ឌដង្កោ ។
បុរសរងគ្រោះត្រូវបានគេស្គាល់ឈ្មោះ ម៉ី ជីវ៉េត អាយុ៣០ឆ្នាំ មានទីលំសង្កាត់បឹងកេងកង២ ខណ្ឌចំការមន ជិះម៉ូតូម៉ាកសេ១២៥ ស៊េរី២០១២ ពណ៌ខ្មៅ ។ ដោយឡែកភាគីម្ខាងទៀត គឺម៉ូតូសណ្ដោងរទេះមិនត្រូវបានគេស្គាល់ឈ្មោះអ្នកបើកបរទេ ឯម៉ូតូសង់កូរ៉េ ពណ៌ក្រហម បើកបរដោយបុរសម្នាក់ឈ្មោះសំ វុធ អាយុ៣០ឆ្នាំមានទីលំនៅភូមិក្រាំងធំ ឃុំលំពង ស្រុកបាទី ខេត្តតាកែវ បុរសនេះមិនបានរងរបួសទេ ។
តាមប្រភពព៌ត័មានបានឲ្យដឹងថា មុនពេលកើតហេតុគេបានឃើញភាគីទាំងសងខាង បើកបរធ្វើដំណើរក្នុងទិសដៅបញ្រ្ចាសគ្នាដោយម៉ូតូ សេ១២៥ជិះគ្នា៣នាក់ធ្វើដំណើរក្នុងទិសដៅពីជើងទៅត្បូង ដែលតាមការអះអាងពីក្រុមគ្រួសារថា ពួកគេទៅចូលរួមបុណ្យកឋិននៅខេត្តតាកែវ ។ ដោយឡែកភាគីម្ខាងទៀត គឺម៉ូតូសណ្ដោងរទេះ និងម៉ូតូសង់កូរ៉េបើកបរក្នុងទិសដៅពីត្បូងទៅជើង ។ លុះទៅដល់ចំណុចកើតហេតុម៉ូតូសេ១២៥នោះបានបុករះជាមួយម៉ូតូសណ្ដោងរទេះដឹកសម្ភារធ្វើសំណង់ចំកង់រទេះផ្នែកខាងឆ្វេងពេញទំហឹងរួចជ្រុលទៅបុកជាមួយម៉ូតូសង់កូរ៉េមួយគ្រឿងទៀត បណ្តាលដួលបោកទៅលើថ្នល់រងរបួសធ្ងន់ម្នាក់-ស្រាលម្នាក់ហើយត្រូវបានគេនាំទៅសង្គ្រោះនៅមន្ទីរពេទ្យភ្លាមៗដែរ ។
ចំណែកម៉ូតូសេ១២៥ ម៉ូតូសណ្ដោងរទេះ និងម៉ូតូសង់កូរ៉េ ត្រូវបានសមត្ថកិច្ចនាំយកទៅរក្សាទុកនៅអធិការដ្ឋានខណ្ឌដង្កោ រង់ចាំដោះស្រាយតាមផ្លូវច្បាប់ ៕
ចែករំលែកព័តមាននេះ