ខេត្តបាត់ដំបង ៖ ក្រុមអ្នកជិះកង់ខ្មែរ-ថៃ យ៉ាងតិចជាង១ពាន់នាក់ គ្រោងនឹងបើកព្រឹត្តិការណ៍ជិះកង់ដើម្បីមិត្តភាព និងដើម្បីលើកស្ទូយវិស័យទេសចរណ៍រវាងប្រទេសក្បែរខាងទាំង២ នៅព្រឹកថ្ងៃទី១៧ ខែធ្នូ ស្អែកនេះ ដែលជាការផ្ដួចផ្ដើមឡើងរវាងក្រុមអ្នកជិះកងនៅស្រុកភ្នំព្រឹក ខេត្តបាត់ដំបង ជាមួយក្រុមអ្នកជិះកង់នៅស្រុកសយដាវ ខេត្តច័ន្ទបុរី ប្រទេសថៃ ។ នេះបើតាមការជួនដំណឹងរបស់រដ្ឋបាលខេត្តបាត់ដំបង។
សេចក្ដីរាយការណ៍បានឲ្យដឹងថា អាជ្ញាធរខេត្តបាត់ដំបង បានឯកភាពរៀបចំឲ្យមានព្រឹត្តិការណ៍ជិះកង់មិត្តភាពខ្មែរ-ថៃ នេះ ដើម្បីឆ្លើយតបទៅនឹងការស្នើសុំរបស់ភាគីថៃ ក្រោមប្រធានបទ «ជិះកង់ឡើងភ្នំសយដាវ ស្រុកសយដាវ ប្រទេសថៃ និងឡើងភ្នំព្រឹក ស្រុកភ្នំព្រឹក ប្រទេសកម្ពុជា» ដែលអាជ្ញាធរស្រុកសយដាវ ខេត្តច័ន្ទបុរី ប្រទេសថៃ ស្នើសុំឲ្យភាគីខ្មែរជួយសម្របសម្រូលកម្មវិធីនេះ ដើម្បីបានភាគីទាំង២ រៀបចំកម្មវិធីជិះកង់រួមគ្នា ក្នុងគោលបំណងបង្កើនចំណងមិត្តភាព ព្រមទាំងជំរុញដល់វិស័យសេដ្ឋកិច្ច និងពាណិជ្ជកម្ម ក៏ដូចជាការប្រឹងប្រែងលើកស្ទូយលើវិស័យទេសចរណ៍រវាងប្រទេសក្បែរខាងទាំង២ ។
បើតាមសេចក្ដីជួនដំណឹង ចុះថ្ងៃទី១១ ខែធ្នូ ឆ្នាំ២០១៧ ដែលមានចុះហត្ថលេខា លោក ងួន រតនៈ អភិបាលខេត្តបាត់ដំបង បានឲ្យដឹងថា កម្មវិធីជិះកង់រវាងកម្ពុជា-ថៃ នេះ គឺចាប់ផ្ដើមនៅវេលាម៉ោង0៩ព្រឹក ថ្ងៃទី១៧ ខែធ្នូ ឆ្នាំ២០១៧ នឹងបញ្ចប់នូវម៉ោង១១ ថ្ងៃត្រង់ថ្ងៃដដែល ។ បើតាមអ្នករៀបចំកម្មវិធីបានឲ្យដឹងថា ក្រុមអ្នកជិះកង់នៃប្រទេសទាំង២ នឹងត្រូវជួបជុំគ្នានៅមាត់ច្រកទ្វាតំបន់ «អូរអន្លក់» ស្ថិតក្នុងឃុំតាសែន ស្រុកកំរៀង ខេត្តបាត់ដំបង ដែលភាគីថៃហៅច្រក «សួនសុំ» ស្ថិតក្នុងស្រុកសយដាវ ខេត្តច័ន្ទបុរី ។
ក្រុមអ្នកជិះទាំង២ភាគីជាង១ពាន់នាក់ និងចាប់ផ្ដើមចេញដំណើរពីច្រកទ្វារព្រំដែនខាងលើនេះតាមបណ្ដោយផ្លូវជាតិលេខ៥៩ ហើយនឺងទៅជួបជុំសំណេះសំណាលគ្នាថតរូបអានុស្សាវរីយ៍នៅលើភ្នំព្រឹក ស្រុកភ្នំព្រឹក ហើយត្រឡប់មកជួបជុំនៅមាត់ច្រកទ្វាព្រំដែនដដែលវិញ មុនពេលបញ្ចប់កម្មវិធីជិះកង់មិត្តភាពកម្ពុជា-ថៃ នេះ ៕
ចែករំលែកព័តមាននេះ