ប្រទេសរុស្ស៊ី-កូរ៉េខាងជើង ៖ ប្រធានាធិបតីរុស្ស៊ី លោកវ្ល៉ាឌីមៀរ ពូទីន អះអាងកាលពីថ្ងៃទី១៤ ធ្នូ ថា ការវាយប្រហារខាងយោធារបស់អាមេរិកនៅកូរ៉េខាងជើងនឹងនាំឱ្យមានផលវិបាកប្រកបដោយគ្រោះមហន្តរាយនានា ហើយសង្ឃឹមថា អាចធ្វើការជាមួយសហរដ្ឋអាមេរិក ដើម្បីស្វែងរកដំណោះស្រាយមួយចំពោះវិបត្តិកូរ៉េ ។
ក្នុងសន្និសីទសារព័ត៌មានជាប្រពៃណីមួយនាចុងឆ្នាំប្រធានាធិបតីរុស្ស៊ីគូសបញ្ជាក់ថា ប្រទេសរបស់លោកពុំទទួលស្គាល់លក្ខន្តិកៈមហាអំណាចនុយក្លេអ៊ែរ ដែលទាមទារដោយរបបកូរ៉េខាងជើងឡើយ ។
ទោះបីយ៉ាងណា លោកថា ការផ្តួចផ្តើមគំនិតជាច្រើនរបស់អាមេរិកចាត់ទុកជាការបង្កហេតុសម្រាប់កូរ៉េខាងជើង ដោយរំលោភបំពានលើកិច្ចព្រមព្រៀងឆ្នាំ២០០៥ ដែលគ្រោងកម្រិតកម្មវិធីនុយក្លេអ៊ែរកូរ៉េខាងជើង ។ លោកមានប្រសាសន៍ថា យើងគិតថា ភាគីទាំង២ត្រូវបញ្ឈប់បំពុលសភាពការណ៍ ។
កូរ៉េខាងជើងឱ្យដឹងនាថ្ងៃទី១៤ ធ្នូ ថា ខ្លួននឹងចាត់វិធានការស្វ័យការពារដោយគ្មានត្រាប្រណីនានា ប្រសិនបើសហរដ្ឋអាមេរិកអនុវត្តការហ៊ុមព័ទ្ធខាងជើងទឹក ដែលនឹងចាត់ទុកថាជា «អំពើនៃសង្គ្រាម» មួយ ។
ទីភ្នាក់ងារព័ត៌មានផ្លូវការកូរ៉េខាងជើង KCNA បានផ្សាយសេចក្តីថ្លែងការណ៍មួយ
របស់អ្នកនាំពាក្យក្រសួងការបរទេសដែលនិយាយថា ការហ៊ុមព័ទ្ធខាងជើងទឹកនឹងជាការរំលោភបំពានជាក់ស្តែងមួយដល់អធិបតេយ្យភាព និងភាពថ្លៃថ្នូររបស់កូរ៉េខាងជើង។
អ្នកនាំពាក្យរូបនេះបន្តថា ប្រធានាធិបតីអាមេរិក លោកដូណាល់ ត្រាំ កំពុងតែចាត់វិធានការយ៉ាងគ្រោះថ្នាក់បំផុតមួយឆ្ពោះទៅរកសង្គ្រាមនុយក្លេអ៊ែរ ដោយចង់ធ្វើការហ៊ុមព័ទ្ធបែបនេះ ។ ប្រសិនបើសហរដ្ឋអាេមរិក និងបណ្តាដៃគូប៉ុនប៉ងអនុវត្តការហ៊ុមព័ទ្ធខាង
ជើងទឹកប្រឆាំងប្រទេសយើង នោះយើងនឹងចាត់ទុកថា វាជាអំពើនៃសង្គ្រាមមួយ ហើយ
យើងនឹងតបតវិញតាមរយៈបណ្តាវិធានការស្វ័យការពារដោយគ្មានការត្រាប្រណីដូចដែលយើងធ្លាប់បាននិយាយជាច្រើនលើករួចមកហើយ ។
ក្រុងប៉េកាំង និងក្រុងសេអ៊ូលថា គ្មានសង្គ្រាមនៅឧបទ្វីបកូរ៉េឡើយប្រធានាធិបតីចិន លោកស៊ី ជីនពីង និងសមភាគីកូរ៉េខាងត្បូង លោក MOON JAE IN អះអាងកាលពីថ្ងៃទី១៤ ធ្នូ ថា មេដឹកនាំទាំង២នឹងមិនអនុញ្ញាតឱ្យមានសង្គ្រាមមួយនៅឧបទ្វីបកូរ៉េឡើយ ។
យោងតាម YONHAP ថា ប្រទេសទាំង២នឹងរួមសហការគ្នាក្នុងការអនុវត្តបណ្តាទណ្ឌកម្ម និងក្នុងការគាបសង្កត់កូរ៉េខាងជើង ។ លោកស៊ី ជីនពីង ដែលជួបជាមួយប្រធានាធិបតីកូរ៉េខាងត្បូងនៅក្រុងប៉េកាំង ក៏ថ្លែងដែរថា ទិសដៅរំសាយនុយក្លេអ៊ែរនៅឧបទ្វីបកូរ៉េត្រូវតែរក្សាទុក ហើយសង្គ្រាម និងភាពជ្រួលច្របល់ពុំត្រូវឱ្យមានឡើយ ។ បញ្ហាឧបទ្វីបកូរ៉េទីបំផុតត្រូវតែដោះស្រាយតាមរយៈការចរចា និងការពិគ្រោះពិភាក្សាគ្នា ។
ចំណែកប្រធានាធិបតីរុស្ស៊ីវិញនិយាយថា លោកសង្ឃឹមអាចធ្វើការជាមួយសហរដ្ឋអាមេរិកដើម្បីស្វែងរកដំណោះស្រាយមួយចំពោះវិបត្តិកូរ៉េ ៕
ចែករំលែកព័តមាននេះ