រាជធានីភ្នំពេញ ៖ សាលាចំណេះទូទៅឯកជនសំពៅមាស នាព្រឹកថ្ងៃទី២១ មករា បាននាំអំណោយរបស់បុគ្គលិកនិងសិស្សានុសិស្សចំនួន១.១៨៧.៦០០រៀល ទៅឧបត្ថម្ភដល់គ្រួសារអ្នកស្រីសរ សុខខេង ជាអាជីវករលក់ស្បង់ចីវរនៅផ្សារអូរឫស្សីដែលរងគ្រោះដោយអគ្គីភ័យកាលពីព្រឹកថ្ងៃទី១២ ខែមករា ។ ពិធីប្រគល់-ទទួលអំណោយនេះ បានរៀបចំឡើងនៅសាលប្រជុំសាលាចំណេះទូទៅឯកជនសំពៅមាស ស្ថិតនៅក្រោយវត្តសំពៅមាស ក្នុងខណ្ឌ៧មករា ។
កញ្ញាម៉េត សុគន្ធារ័ត្ន នាយិការង និងជាតំណាងលោកនាយកសាលាបានឱ្យដឹងថា អំណោយដែលប្រគល់ឱ្យដល់គ្រួសារជនរងគ្រោះនៅពេលនេះមានចំនួន១.១៨៧.៦០០រៀល ជាអំណោយបានមកពីការចូលរួមរបស់បុគ្គលិកនិងសិស្សានុសិស្សសាលាចំណេះទូទៅឯកជនសំពៅមាស ។ ក្រៅពីនេះ លោកនាយកសាលាក៏បានផ្តល់ជាអំណោយអាហារូបករណ៍១០០% ដល់កូនស្រីទាំងពីរនាក់របស់ម្ចាស់ផ្ទះរងគ្រោះសិក្សារយៈពេល១ឆ្នាំដោយមិនគិតថ្លៃផងដែរ ។
កញ្ញាម៉េត សុគន្ធារ័ត្ន បានឱ្យដឹងទៀតថា កន្លងមកសាលាចំណេះទូទៅឯកជនសំពៅមាសតែងតែចូលរួមផ្នែកមនុស្សធម៌ ដោយផ្តល់ជាអំណោយដល់ជនរងគ្រោះផ្សេងៗ ជាពិសេសជួយដល់ក្រុមគ្រួសារជនរងគ្រោះដែលមានកូនសិក្សានៅសាលានេះ ។ ទោះបីជាអំណោយទាំងនេះតិចតួចក្តី តែជាទឹកចិត្តស្មោះសរនិងជាការចូលរួមជួយសំរួលការលំបាកពីសំណាក់លោកនាយកសាលា បុគ្គលិកសិក្សា និងសិស្សានុសិស្សដែលបានរួមគ្នាជួយដល់ជនរងគ្រោះ ។ កញ្ញានាយិការងបានបញ្ជាក់ទៀតថា អំណោយជាអាហារូបករណ៍របស់សាលាសំរាប់កូនទាំងពីររបស់ម្ចាស់ផ្ទះរងគ្រោះសិក្សារយៈពេល១ឆ្នាំគិតជាប្រាក់ចំនួន២.៦៤០.០០០រៀល រួមនឹងអំណោយរបស់បុគ្គលិកនិងសិស្សានុសិស្សចំនួន១.១៨៧.៦០០រៀល សរុបមានចំនួន៣.៨២៧.៦០០រៀល ។
អ្នកស្រីសរ សុខខេង អាយុ៣៦ឆ្នាំ ស្នាក់នៅផ្ទះជួលលេខ១០៨E1 ផ្លូវលេខ១៨២ សង្កាត់បឹងព្រលឹត ខណ្ឌ៧មករា បានឱ្យដឹងថា កាលពីវេលាម៉ោង១០និង៤០នាទីព្រឹកថ្ងៃទី១២ មករា គ្រោះអគ្គីភ័យបានឆាបឆេះផ្ទះជួលរបស់គាត់បណ្តាលឱ្យអីវ៉ាន់ស្បង់ចីវររបស់គាត់គិតជាទឹកប្រាក់ជាង៣ម៉ឺនដុល្លារ ត្រូវភ្លើងឆេះម៉ដ្ឋហើយត្រូវសងគេទៀត ។ អ្នកស្រីបានលើកដៃសំពះថ្លែងអំណរគុណដល់លោកនាយកសាលា នាយិការង គណៈគ្រប់គ្រង បុគ្គលិក និងសិស្សានុសិស្ស សាលាចំណេះទូទៅឯកជនសំពៅមាស ដែលបានផ្តល់ជាអំណោយដើម្បីជួយសំរួលការលំបាកដល់ក្រុមគ្រួសារអ្នកស្រី ជាងនេះទៀតបានផ្តល់អំណោយជាអាហារូបករណ៍ឱ្យកូនអ្នកស្រីទាំង២នាក់សិក្សារយៈពេល១ឆ្នាំទៀតផង ។ គួរបញ្ជាក់ថា សាលាចំណេះទូទៅឯកជនសំពៅមាសជាសាលាឯកជនមួយដែលបានបង្កើតមុនគេនៅក្នុងព្រះរាជាណាចក្រកម្ពុជា ដោយធ្វើការបណ្តុះបណ្តាលពីថ្នាក់មត្តេយ្យដល់ថ្នាក់ទី១២ និងបានចូលរួមចំណែកក្នុងសកម្មភាពសង្គមយ៉ាងច្រើនផងដែរ ៕
ចែករំលែកព័តមាននេះ