ខេត្តស្វាយរៀង ៖ លោកឧត្តមសេនីយ៍ឯកកេ ដា អគ្គលេខាធិការរងអាជ្ញាធរអាវុធគីមី ក្រសួងការពារជាតិ បានថ្លែងប្រាប់អ្នកសារព័ត៌មាននៅព្រឹកថ្ងៃទី១៥ ខែធ្នូ ឆ្នាំ២០១៧ នេះថាថ្ងៃនេះក្រុមបច្ចេកទេសអង្គការហាមឃាត់អាវុធគីមីនៃអង្គការសហប្រជាជាតិ(Organization…
ខេត្តស្វាយរៀង ៖ លោកឧត្តមសេនីយ៍ឯកកេ ដា អគ្គលេខាធិការរងអាជ្ញាធរអាវុធគីមី ក្រសួងការពារជាតិ បានថ្លែងប្រាប់អ្នកសារព័ត៌មាននៅព្រឹកថ្ងៃទី១៥ ខែធ្នូ ឆ្នាំ២០១៧ នេះថាថ្ងៃនេះក្រុមបច្ចេកទេសអង្គការហាមឃាត់អាវុធគីមីនៃអង្គការសហប្រជាជាតិ(Organization for the Prohibition of Chemical Weapons – OPCW) នឹងបន្តចុះពិនិត្យទីតាំង និងវាយតម្លៃសារធាតុគីមីក្នុងគ្រាប់បែកគីមីដែលទម្លាក់ដោយសហរដ្ឋអាមេរិកនៅឃុំគគីរ ស្រុករមាសហែក ខេត្តស្វាយរៀង ។
លោកឧត្តមសេនីយ៍ឯកបានបញ្ជាក់ថា «ក្រុមបច្ចេកទេសរបស់អង្គការ OPCW បានទៅដល់ឃុំគគីរ នៅវេលាម៉ោង៩និង០០ព្រឹកមិញនេះ ដើម្បីបន្តប្រតិបត្តិការពិនិត្យ និងពិសោធន៍វាយតម្លៃគ្រាប់បែកគីមីទាំងនោះ» ។
លោកឧត្ថមសេនីយ៍ឯកបន្តទៀតថា ក្រុមបច្ចេកទេសរបស់អង្គការOPCW ចំនួន៤នាក់ ជាមួយម៉ាស៊ីនធ្វើតេស្តពិសោធន៍ដែលដឹកពីប្រទេសហូឡង់ បានចុះប្រតិបត្តិការរួចរាល់ហើយ នៅខេត្តដែលរកឃើញគ្រាប់បែកគីមីទម្លាក់ដោយអាមេរិក គឺខេត្តមណ្ឌលគិរី១០ទីតាំង និងខេត្តត្បូងឃ្មុំ២ទីតាំង ហើយនៅខេត្តស្វាយរៀងត្រូវបន្តនៅថ្ងៃទី១៥ ខែធ្នូនេះ ។ លោកបន្ថែមទៀតថា បន្ទាប់ពីបញ្ចប់ប្រតិបត្តិការនៅខេត្តស្វាយរៀង ជាខេត្តប្រតិបត្តិការចុងក្រោយ ក្រុមបច្ចេកទេសនឹងត្រឡប់មកភ្នំពេញវិញ ដើម្បីសរុបការវាយតម្លៃបញ្ចប់ អំពីលទ្ធផលធ្វើពិសោធន៍លើគ្រាប់បែកគីមីអាមេរិកនៅខេត្តទាំង៣ខាងលើនេះ ។
ចំពោះការផ្តិតរូបភាព គឺគួរឲ្យសោកស្តាយដោយក្រុមការងារលោកកេ ដា អគ្គលេខាធិការរងអាជ្ញាធរអាវុធគីមី ក្រសួងការពារជាតិមិនអនុញ្ញាតិឲ្យក្រុមអ្នកសារព័ត៌មានណាម្នាក់ បានចូលទៅផ្តិតរូបភាព នៃសកម្មភាពការងារក្រុមបច្ចេកទេសរបស់អង្គការ OPCW ឡើយ រហូតមកដល់វេលម៉ោង១២និង០០នាទីថ្ងៃត្រង់នេះមិនដឹងថាមានបញ្ហាអ្វីនោះទេ ។
បញ្ហាគ្រាប់បែកគីមីដែលសហរដ្ឋអាមេរិកបានទម្លាក់នៅខេត្តស្វាយរៀង ដែលអង្គការCMAC បាន
រកឃើញមានចំនួន១៦ទីតាំង នៅក្នុងឃុំ គគីរ និងឃុំអំពឹល ស្រុករមាសហែក ហើយក៏ជាទីតាំងដ៏ក្តៅគគុកដែលប្រជាពលរដ្ឋឃុំគគីរនិងឃុំអំពឹល តវ៉ាទាមទាឲ្យលោកដូណាត្រាំប្រធានាធិបតីសហរដ្ឋអាមេរិក ផ្តល់សំណងដល់ក្រុមគ្រួសារជនរងគ្រោះ ហើយសុំឲ្យសហរដ្ឋអាមេរិកលុបបំណុលខ្មែរ ដែលជំពាក់ក្នុងរបបសាធារណៈរដ្ឋ លោកលន់ ណុលយកប្រាក់ទាំងនោះមកអភិវឌ្ឍន៍តាមតំបន់រងគ្រោះដោយគ្រាប់បែកគីមីដែលសហរដ្ឋអាមេរិកបានទម្លាក់ក្នុងសម័យសង្គ្រាមលើទឹកដីនៃព្រះរាជាណាចក្រកម្ពុជា។ដោយមានការតវាប្រជាពលរដ្ឋរងគ្រោះ និងការតស៊ូមតិរបស់រាជរដ្ឋាភិបាលកម្ពុជា អង្គការសហប្រជាជាតិបានបញ្ជូន ក្រុមបច្ចេកទេសរបស់អង្គការOPCW បានមកដល់កម្ពុជានៅយប់ថ្ងៃទី១០ ខែធ្នូ ឆ្នាំ២០១៧ ដើម្បីមកពិនិត្យ និងវាយតម្លៃគ្រាប់បែកគីមី ដែលទម្លាក់ដោយអាមេរិក តាមសំណើររបស់រាជរដ្ឋាភិបាលកម្ពុជា ។
បើតាមរបាយការណ៍របស់អង្គការCMACបានបង្ហាញថា សហរដ្ឋអាមេរិកបានទម្លាក់គ្រាប់បែកនៅកម្ពុជា មានកាកសំណល់ជាតិផ្ទុះសង្គ្រាមច្រើនឥតគណនា បានបន្តសម្លាប់កូនចៅខែ្មរទាំងក្នុង និងក្រោយសង្គ្រាមបានបញ្ចប់ ។ ដោយឡែកគ្រាប់បែកជាអាវុធគីមី ប្រភេទពណ៌ទឹកក្រូច និងប្រភេទអាវុធគីមីមួយចំនួនទៀត មិនសិ្ថតក្នុងទិន្នន័យនេះនៅឡើយទេ ។ ហើយអ្វីគួរឲ្យសោកស្តាយនោះគឺក្រុមការងារ
បច្ចេកទេសរបស់អង្គការOPCW ក្រុមការងារ អាជ្ញាធរអាវុធគីមីក្រសួងការពារជាតិមិនអនុញ្ញាតិឲ្យក្រុមអ្នកសារព័ត៌មានចូលថតផ្តិតរូបភាពទេ ដោយប្រាប់ថារង់ចាំក្រុមការងារបច្ចេកទេសយកសំណាកគ្រាប់បែកទៅរាជធានីភ្នំពេញ ដើម្បីដាក់ចូលមន្ទីរពិសោធន៍ សិនទើបប្រកាសលទ្ធផលជាផ្លូវការ សឹមអ្នកសារព័ត៌មានទៅថតចុះផ្សាយគឺពុំទាន់ហួសពេលទេ ៕
ចែករំលែកព័តមាននេះ