ខេត្តស្ទឹងត្រែង ៖ នៅរសៀលថ្ងៃទី១៤ ខែធ្នូ ឆ្នាំ២០១៧ សមត្ថកិច្ចចម្រុះខេត្តបានរួមដៃគ្នាប្រដេញស្ទាក់ចាប់បានរថយន្តសាំយ៉ុងដឹកជញ្ជូនឈើ៤គ្រឿង គ្រារថយន្តទាំងនោះបាននឹងកំពុងផ្ទុកទៅដោយក្តារ បើកចេញពីស្រុកថាឡាបរិវ៉ាត់ឆ្លងកាត់ដីក្រុងស្ទឹងត្រែងហើយសមត្ថកិច្ចបានស្ទាក់ចាប់បាននៅរង្វង់មូលផ្លូវបំបែកជា៣នៃចំណុចប្រសប់អូរពងមាន់ស្ថិតនៅក្នុងដី ក្រុងស្ទឹងត្រែង ។
ស្នងការនគរបាលស្តីទីខេត្តស្ទឹងត្រែងលោកឧត្តមសេនីយ៍ត្រី ឌៀប ចន្ធី បានប្រាប់ឲ្យដឹងថា រថយន្តដឹកឈើដែលរងការបង្ក្រាបនេះជាប្រភេទរថយន្តសាំយ៉ុងចំនួន៤គ្រឿង រថយន្តទាំងនេះបានផ្ទុកទៅដោយឈើក្តារប្រភេទលេខ២បានដឹកជញ្ជូនឈើចេញពីក្នុងភូមិសាស្ត្រស្រុកថាឡាបរិវ៉ាត់ យ៉ាងអនាធិបតេយ្យបំផុតក្នុងបំណងនាំឆ្ពោះទៅកាន់ទីផកសារគោលដៅ ។
លោកថា រថយន្តដឹកឈើទាំង៤គ្រឿងនោះត្រូវបានមន្ត្រីនគរបាលជំនាញខេត្តបានកសាងសំណុំរឿងហើយបាននាំយកទៅប្រគល់ទៅឲ្យមន្ត្រីព្រៃឈើខេត្តចាត់ការជាបន្ត ចំណែកម្ចាស់រថយន្តដឹកឈើទាំងនេះបានគេចខ្លួនអស់ទៅហើយ ។
កាលពីថ្ងៃទី១៣ ខែធ្នូ ឆ្នាំ២០១៧ សមត្ថកិច្ចចម្រុះខេត្តក៏បានធ្វើការប្រដេញស្ទាក់ចាប់បានរថយន្តសាំយ៉ុង៦គ្រឿងផងដែរនៅគ្រាដែលរថយន្តទាំងនោះបានផ្ទុកដោយឈើមូលធំៗ ហើយវែងៗ ដោយដឹកចេញពីស្រុកថាឡាបរិវ៉ាត់តែត្រូវចាប់បាននៅដីក្រុងស្ទឹងត្រែង ។
រយៈពេលពីរថ្ងៃបន្តបន្ទាប់គ្នានេះសមត្ថកិច្ចបានបង្ក្រាបរថយន្តដឹកឈើបាន១០គ្រឿងប្រគល់ទៅឲ្យមន្ត្រីព្រៃឈើចាត់ការជាបន្តទៅតាមច្បាប់ ៕
ចែករំលែកព័តមាននេះ